Prezidentlərin Moskva görüşü faydalı keçib

Vasitəçilər münaqişənin tezliklə çözüləcəyinə inanırlar

ATƏT-in Minsk Qrupu Azərbaycan və Ermənistan prezidentləri İlham Əliyevlə Serj Sarkisyanın iyulun 17-də Moskvada keçirəcəkləri görüşdən irəliləyiş gözləyir.

Bunu Minsk Qrupunun amerikalı həmsədri Metyu Brayza bildirib. Dövlət başçılarının görüşünün hansı nəticəni verəcəyini söyləməyin çətin olduğunu deyən diplomat vasitəçilərin bölgəyə son səfəri zamanı prezidentlərin Dağlıq Qarabağ münaqişəsinin nizamlanmasına konstruktiv yanaşma nümayiş etdirdiklərinin şahidi olduqlarını söyləyib. Ermənistanın "Panarmenian" agentliyinin məlumatına görə, məhz bu amil vasitəçilərin nikbinliyini artırır. "Sankt-Peterburq görüşünə nisbətən Moskva görüşündə irəliləyiş gözləyirik", - deyə M.Brayza qeyd edib.

Bu arada Rusiyanın Xarici İşlər Nazirliyi Azərbaycan və Ermənistandan bir qrup ziyalının iyulun 3-də Dağlıq Qarabağa baş tutmuş səfəri ilə bağlı bəyanat yayıb. Nazirliyin internet saytında yerləşdirilmiş bəyanatda bildirilir ki, bu səfər 2007-ci ilin iyununda keçirilmiş görüşlərin davamı olub. Bəyanatda qeyd edilir ki, aparılmış fikir mübadiləsi ictimaiyyət, vətəndaş cəmiyyəti institutlarının Dağlıq Qarabağ münaqişəsinə cəlb edilmiş tərəflər arasında inamın bərpası və möhkəmlənməsinə, münaqişənin sülh yolu ilə həlli üçün münbit atmosferin yaradılmasına töhfə verməli olduğunu üzə çıxarıb. "Nümayəndə heyətlərini qəbul etmiş Azərbaycan və Ermənistan prezidentləri İlham Əliyevlə Serj Sarkisyanın onların səylərini dəstəkləmələri çox vacibdir", - deyə bəyanatda qeyd olunur. Nazirlik Rusiya tərəfinin keçirilmiş görüşləri yüksək qiymətləndirdiyini də bildirir: "Biz Dağlıq Qarabağ münaqişəsinin nizamlanması prosesi və xalq diplomatiyasının addımlarına gələcəkdə də ciddi dəstək verəcəyik".

Elə dünən Türkiyənin Xarici İşlər Nazirliyi də Dağlıq Qarabağ münaqişəsi ilə əlaqədar bəyanat yayıb. "Todays Zaman" xəbər verir ki, bəyanatda Ankaranın ATƏT-in Minsk Qrupunun problemin həlli istiqamətində səylərini dəstəklədiyi bildirilir. "Qrupun təklif etdiyi prinsiplər tərəflərin ümumi mövqeyini əks etdirir. Azərbaycan və Ermənistan münaqişəni həll etmək üçün bütün səylərini ortaya qoymalı, bununla da uzun illərdir bütün Cənubi Qafqazın qanlı yarası sayılan problemin həllinə nail olmalıdırlar", - deyə Türkiyənin xarici siyasət idarəsinin açıqlamasında bildirilir.

Həsənli C.

Həftə içi.- 2009.- 14 iyul.- S. 3.