Özgün istedad sahibi

Vaqif Səmədoğlu - 70

Dünən Azərbaycan Yazıçılar Birliyində iyunun 5-də 70 yaşı tamam olmuş şair və dramaturq Vaqif Səmədoğlunun yubileyi qeyd olunub.

Tədbirdə çıxış edən birliyin sədri Anar, millət vəkilləri Cəmil Həsənli və Elmira Axundova, şair və yazıçılar Fikrət Qoca, Sabir Rüstəmxanlı, Səyavuş Məmmədzadə, Gülhüseyn Hüseynoğlu Vaqif Səmədoğlunun müstəsna və özgün istedad sahibi olduğunu qeyd etdilər, onun əsl vətəndaşlıq keyfiyyətlərinə malik olduğunu, ictimai və mədəni həyatda obyektiv mövqe ilə çıxış etmək bacarığını vurğuladılar. Çıxışçılar dedilər ki, həyatı boyunca müxtəlif ictimai-siyasi formasiyalarda yaşamasına baxmayaraq V.Səmədoğlu zəmanəmizin o nadir şəxsiyyətlərindəndir ki, istər yaradıcılıq meyarlarında, istərsə də ictimai həyatda haqqındakı təsəvvürlərə xələl gətirən addım atmayıb. Ona görə yox ki göründüyü kimi olmaq istəyib, ona görə ki, olduğu kimi görünməyi bacarıb. "Şöhrət" ordenli V.Səmədoğlu 70 illik yubileyi ərəfəsində ölkə başçısı İlham Əliyev tərəfindən "Şərəf" ordeni ilə də təltif edilib. Onun ilk kitabı 1960-cı illərdə işıq üzü görüb. Kitabları bir-birinin ardınca nəşr olunan ədiblərdən olmasa da, poeziyasevərlər arasında əsərləri həmişə gözlənilən şairlərdən olan V.Səmədoğlunun "Uzaq yaşıl ada" və "Mən burdayam, ilahi" kitabları oxucularının əsl sevincinə səbəb olmuşdu. V.Səmədoğlu yaradıcılığına xas olan azad düşünmək, düşüncə, təəssürat və yaşantılarını səmimi şəkildə ifadə etmək tərzi şairin əsərlərinin maraqlılığını təmin edən əsas cəhətdir. Onun teatr və kino rejissorları üçün keyfiyyətli material olan əsərlərində toxunduğu məqamlar aktuallığını itirmir. Vaqif Səmədoğlunun sözlərinə bəstələnmiş mahnılar isə mədəniyyətimizin inciləri adlanmaq hüququnu elə yarandıqları gündən qazanıblar.

Samirə

Həftə içi.- 2009.- 10 iyun.- S. 7.