Gürcüstanda Azərbaycan mədəniyyəti günləri

Müştərək komissiya ilə eyni vaxtda işə başladı

Dünən start götürən Gürcüstanda Azərbaycan mədəniyyəti günlərinin açılışında iştirak etməkdən ötrü qardaş respublikada səfərdə olan mədəniyyət və turizm naziri Əbülfəz Qarayevin başçılıq etdiyi nümayəndə heyəti Gürcüstanın Marneuli rayonuna baş çəkib.

Nazirliyin mətbuat xidmətindən verilən məlumata görə, Ə.Qarayev Marneulidə azərbaycanlıların Mədəniyyət Mərkəzinin rəhbərləri ilə görüş keçirib. Mərkəzin rəhbəri Fazil Həsənov qurumun fəaliyyəti və azərbaycanlıların kompakt yaşadıqları bölgələrdə mədəniyyətin inkişafı barədə Ə.Qarayevə məlumat verib. Görüş əsnasında nazir mərkəzin layihələri ilə tanış olub. Ə.Qarayev Gürcüstanda fəaliyyət göstərən azərbaycandilli məktəblərdə dərsliklərin vəziyyəti ilə maraqlanıb. Daha sonra Mədəniyyət Mərkəzinin nəzdində fəaliyyət göstərən "Sarvan" rəqs qrupunun çıxışlarını seyr edib.

Gürcüstanın və Azərbaycanın Mədəniyyət və Turizm nazirlikləri arasında isə abidələrin qorunması üzrə müştərək komissiyanın yaradılması barədə razılıq əldə olunub. Komissiyanın tərkibinə hər iki ölkənin mədəniyyət işçiləri, alimlər, tarixçi və arxeoloqlar daxil olacaq. Onlar iki ölkənin ərazisində qorunub-saxlanmış tarixi abidələrin vəziyyətini öyrənəcək və mübahisəli obyektlərdə yerləşən abidələrin tarixi mənsubluğu məsələsini həll edəcəklər. Komissiyanın başlıca məqsədi Azərbaycanın və Gürcüstanın ərazilərində yerləşən mədəni irsin qayğısına qalmaqdan ibarətdir. Qeyd edək ki, komissiya artıq öz işinə başlayıb. Onun fəaliyyətinin ilkin mərhələsi iki ölkənin abidələrinin qorunmasının mühafizə xidmətləri arasında məlumat mübadiləsinə nail olmaqdan ibarətdir. Gürcüstanın mədəniyyət naziri Nika Rurua ilə birlikdə keçirdiyi mətbuat konfransında Ə.Qarayev vurğulayıb ki, Gürcüstanla Azərbaycan ikitərəfli əlaqələrin möhkəmləndirilməsində və mədəni əlaqələrin inkişafında maraqlıdırlar. Rəcmi görüşlərdən sonra hər iki ölkənin nümayəndələri Gürcüstanda Azərbaycan mədəniyyəti günlərinin açılış mərasimində iştirak ediblər. Tbilisinin Opera və Balet Teatrında keçirilən açılış mərasimində Azərbaycan mədəniyyət və incəsənətinin ən layiqli nümayəndələri çıxış ediblər. Onların çıxışları böyük ruh yüksəkliyi ilə qarşılanıb. Mərasimdə çıxış edən Ə.Qarayev qeyd edib ki, Gürcüstanla Azərbaycan arasında sıx mədəni əlaqələr heç bir dövrdə zəifləməsə də, qarşılıqlı mədəniyyət günlərinin keçirilməsi vacib və əlamətdar hadisədir.

Öz növbəsində N.Rurua vurğulayıb ki, iki qardaş xalqlar arasında mədəni əlaqələrin möhkəmləndirilməsinə bölgələr arasında əlaqələrin genişləndirilməsi işindən başlamaq lazımdır. N.Rurua: "Azərbaycanla Gürcüstanın müxtəlif bölgələri arasında əlaqələri möhkəmləndirmək və xalq rəqs kollektivləri, müğənnilər, teatr kollektivləri, ifaçıların mübadiləsini təşkil etmək zəruridir. Bu, əlaqələrimizi daha da zənginləşdirməyə və əhalinin daha böyük hissəsini əhatə etməyə imkan verəcək".

Mədəniyyət günlərinin ilk tədbirlərindən biri Tbilisinin "Karvasla" sərgi salonunda azərbaycanlı rəssamların sərgisinin açılışı olub.

Samirə

Həftə içi.- 2009.- 19 iyun.- S. 7.