"Gənc alimlərə meydan verin"

Dünən Dövlət İqtisad Universitetində gənc tədqiqatçıların XIII elmi konfransı keçirildi. Azərbaycanın 20 ali məktəbindən 300-dək gənc tədqiqatçı-alim, universitet rektorları, prorektorların iştirak etdiyi konfransda çıxış edən təhsil naziri Misir Mərdanov Azərbaycanda elm sahəsinin zəif inkişafından danışdı. Nazir qeyd etdi ki, Azərbaycanda bütün sahələr üzrə inkişaf olmasına baxmayaraq, elmin inkişaf səviyyəsi qaneedici deyil. Xüsusən gənc tədqiqatçılar beynəlxalq elmi yarışmalara qoşulmur və bu, Təhsil Nazirliyini çox narahat edir.

M.Mərdanov bu məsələ ilə bağlı ona dəfələrlə irad tutulduğunu da gizlətmədi: "Ali məktəblərdə elmi konfranslar keçirilmir. Mən rektorlara, professorlara, dosentlərə, dekanlara, xüsusən də elmi işlər üzrə prorektorlara müraciət edirəm: gənc alimlərə meydan verin. Çünki ölkənin inkişafı həmin gənclərdən asılıdır. Mənə bu yaxınlarda universitetlərin birinin elmi işlər üzrə prorektorunu təqdim etdilər. O, 75 yaşlı bədən tərbiyəsi müəllimidir. Universitetlərdə elmi işlərə rəhbərliyi belə adamlara tapşırmaq olmaz". Təhsil naziri gəncləri bilik və bacarıqlarına uyğun haqlarını tələb etməyə də çağırıb. O, gəncləri əmin edib ki, onlar mübarizə aparsalar, elmi sahələrdə uğur qazana biləcəklər, haqq öz yerini tutacaq.

Tədbirdə çıxış edən İqtisad Universitetinin rektoru Şəmsəddin Hacıyev isə təhsil nazirinin özünütənqid ruhunda çıxış etdiyini xatırlatdı. Bildirdi ki, son 15 ildə elmin inkişafında çox ciddi nəticələr əldə edilib. O da etiraf etdi ki, elmi tədqiqat aparanların yaş tərkibində Azərbaycan elminin qocaldığı görünür: "Elmdə yaşlı nəsil tövsiyələr verməli, əsas tədqiqatları isə gənclər aparmalıdır. Əminəm ki, bugünkü konfransda aparılan diskussiyalar bu məqsədə xidmət edəcək".

Daha sonra Bakı Dövlət Universitetinin rektoru - millət vəkili Abel Məhərrəmov gənclərin elm sahəsində üzləşdiyi problemlərdən, beynəlxalq tədbirlərdə iştiraklarından və tutduqları mövqelərdən danışıb. Konfrans gənc tədqiqatçıların məruzələri ilə davam edib.

Naibə

Həftə içi.- 2009.- 7-10 mart.- S. 6.