Uşaq bağçasında Novruz şənliyi

"Biz bağçamızda bütün bayramları keçiririk"

Novruz bayramı ilə əlaqədar paytaxtımızın məktəb və uşaq bağçalarında bir sıra bayram tədbirləri düzənlənir.

Bayram şənliklərindən biri də Səbail rayonunda yerləşən 46 saylı uşaq bağçasında keçirildi. Biz də bayram şənliyinin necə keçirildiyini görmək üçün adıçəkilən bağçaya yollandıq. Bağçaya daxil olarkən əsl bayram əhval-ruhiyyəsini hiss etdik. Bayram libaslarında olan uşaqlar böyük sevinclə öz çıxışlarını gözləyirdilər. Bildirək ki, bayram şənliyi rus və Azərbaycan bölməsinin uşaqlarının birgə iştirakı ilə düzənlənmişdi. Valideynlərin də iştirakı ilə keçirilən şənlikdə balacalar çıxışlarına öncə Novruz mahnısı ilə başladılar. Daha sonra uşaqlar hazırladıqları bayram şeirlərini sıra ilə qonaqlara söylədilər. Bundan başqa, uşaqlar bir-birindən gözəl rəqslər də nümayiş etdirdilər. Balaca Bahar qızının rəqsi və şeri isə bayrama daha da gözəllik gətirdi. Bayramın sonuna yaxın isə zala Novruzun simvolları olan Kosa və Keçəl təşrif buyurdular. Onların gəlişi isə uşaqların sevincini daha da artırdı. Kosa və Keçəlin məzəli söhbətləri, uşaqlarla oyunları bayramı daha da maraqlı etdi.

Bağçada müəllimə işləyən Nina Anatoliyevnadan bayram təəssüratlarını öyrəndik. O bizimlə söhbətində uşaqların çıxışlarından razı qaldığını bildirdi: "Bağçamızda çox istedadlı uşaqlar var. Onlar hər bir şeri, mahnını, rəqsi asanlıqla öyrənə bilirlər. Düzdür, bəzən dəcəllikləri ilə bizi incidirlər. Amma buna baxmayaraq, çox bacarıqlıdırlar. Mən onlardan çox razı qaldım".

Bağçanın direktoru Solmaz Verdiyeva isə bizimlə söhbətində bu cür bayramların həmişə təşkil olunduğunu bildirdi: "Biz bağçamızda nəinki Novruz bayramını, bütün bayramları keçiririk. Bundan əvvəl olan bayramları da yüksək səviyyədə keçirdik".

Bayramla əlaqədar valideynlərlə də söhbətləşdik. Elnarə Abbasova adlı valideyn uşaqların bayram şənliyindən çox razı qaldığını bildirdi: "Bayram çox yüksək səviyyədə keçirildi. Şənlikdə Novruza xas olan bütün atributlar var idi. Bu isə uşaqların sevincinə səbəb oldu. Belə gözəl bayram təşkil etdiklərinə görə bağçanın direktoruna və müəllimələrinə təşəkkürümüzü bildiririk". Digər valideynlər də bizimlə söhbətlərində bayram şənliyinin düzənlənməsindən çox razı qaldıqlarını söylədilər.

Səma, Aysel.

Həftə içi.- 2009.- 18-19 mart.- S. 6.