Jurnalist Sona Bağırova anıldı

Dünən Mətbuat Şurasında (MŞ) görkəmli jurnalist Sona Bağırovanın anadan olmasının 80 illik yubileyi qeyd edildi. MŞ sədri Əflatun Amaşov tədbiri açaraq bildirdi ki, toplantı şuranın görkəmli jurnalistlərin xatirəsinin anımı istiqamətində reallaşdırmağa başladığı silsilə mərasimlərdən ikincisidir. Bu təşəbbüs çərçivəsində milli mətbuatımızda xüsusi yeri və xidmətləri olmuş ahıl jurnalistlərin, dünyasını dəyişmiş qələm sahiblərinin yubileylərinin, anım günlərinin təşkili nəzərdə tutulub. Sonra mərhumun uzun müddət çalışdığı "Azərbaycan gəncləri" qəzetinin müxtəlif illərdə redaktoru olmuş Cəmil Əlibəyov, Yusif Kərimov, həmçinin onunla birgə işləmiş Əlirza Balayev, Şəmsiyyə Kərimova, Hafiz Hüseynxanlı, yaxından tanıyanlar Teyyub Qurban, Tahir Aydınoğlu, Zakir Abbas, MŞ sədrinin müavini Umud Rəhimoğlu və başqaları Sona xanımın həyat və yaradıcılıq yoluna nəzər salaraq xatirələrini dilə gətirdilər. Qeyd edək ki, Sona Bəhrəli qızı Bağırova 1929-cu il mayın 1-də Bakıda anadan olub. 1952-ci ildə Bakı Dövlət Universitetini bitirdikdən sonra həyatının 40 ilini "Azərbaycan gəncləri" qəzeti ilə bağlayıb. Burada o, ədəbi işçi, şöbə müdiri vəzifələrində çalışıb. Ötən əsrin 90-cı illərində "Açıq söz", "Bakı-post" qəzetlərinin əməkdaşı olub. Azərbaycanın əməkdar jurnalisti adına layiq görülüb. Həmçinin media sahəsindəki fəaliyyətinə görə çoxsaylı mükafatlarla təltif edilib. 2001-ci il mayın 10-da dünyasını dəyişib. Tədbirin sonunda iştirakçılara Sona Bağırovanın 2002-ci ildə "Elm və həyat" nəşriyyatında çapdan çıxmış "Pozulmaz izlər" kitabı təqdim olundu. Mərhumun qızı Sevda Xanbutayeva Sona xanımın övladları adından anasının xatirəsinə göstərilən ehtirama görə mərasim iştirakçılarının hər birinə təşəkkürünü bildirdi.

Naibə

Həftə içi.- 2009.- 1 may.- S. 6.