"Rəsmi Bakı sülhün təminində israrlıdır"

NATO - Azərbaycan əlaqələrinin 15 ili tamam oldu

Dünən Azərbaycan - NATO Beynəlxalq Məktəbinin təşəbbüsü ilə "NATO - Azərbaycan: Keçmişi qiymətləndirərək gələcəyə baxış" adlı konfrans keçirildi. Tədbiri giriş sözü ilə açan xarici işlər nazirinin müavini Araz Əzimov bildirdi ki, bu tədbir Azərbaycan üçün tarixi məna daşıyır.

Daha sonra NATO-nun baş katibi Yaap de Hoop Sxefferin NATO - Azərbaycan əlaqələrinin 15 illiyi ilə bağlı təbriki videoçəkiliş vasitəsilə göstərildi. Baş katib vurğuladı ki, bu əməkdaşlıq 1994-cü ildə ümummilli lider Heydər Əliyevin Azərbaycanın NATO-nun "Sülh naminə tərəfdaşlıq proqramı"na qoşulmasına imza atması ilə başlayıb. Onun sözlərinə görə, bu gün azərbaycanlı hərbçilər Əfqanıstanda NATO qüvvələri tərkibində xidmət göstərirlər: "Azərbaycan burada sülh və sabitliyin əldə edilməsinə töhfəsini verməkdədir. İSEF qüvvələri tərkibində azərbaycanlı hərbçilərin Əfqanıstanda olması Azərbaycanın iradəsindən xəbər verir. Bu bir daha göstərir ki, Azərbaycan öz məsuliyyətini dərk edərək sülhün təminində israrlıdır". Baş katib onu da vurğuladı ki, rəsmi Bakı Silahlı Qüvvələrinin NATO standartlarına uyğunlaşdırılması istiqamətində də iş aparır. Ötən müddətdə təşkilatla Bakı arasındakı əlaqələr çox yüksək səviyyədə olub: "NATO Azərbaycan ordusunda, hüquq-mühafizə orqanlarında və güc strukturlarında islahatların aparılmasına da yardım göstərir. SNT proqramı siyasi dialoq deməkdir. Biz tərəfdaş kimi bölgədə təhlükəsizlik məsələləri ilə bağlı dialoq aparırıq. Artıq irəliyə doğru baxmalıyıq. İnanıram ki, yaradılmış möhkəm bünövrə üzərində uğurlu əməkdaşlığımız bundan sonra da davam edəcək".

Daha sonra Türkiyənin keçmiş xarici işlər naziri və spikeri olmuş, hazırda isə Əfqanıstanda NATO-nun baş mülki zabiti vəzifəsində çalışan Hikmət Çətin söz aldı. Bildirdi ki, ilk dəfə Azərbaycana 1991-1992-ci illərdə gəlib. Həmin dövrdən bu vaxta qədər 20 dəfədən artıq Azərbaycanda olub. Hər gəlişində də ciddi irəliləyişlərin şahidi olub: "Bu bölgə böyük önəm daşıyır. Lakin indi çətin anlarını yaşayır. Qafqazda hazırda çox mühüm hadisələr cərəyan etməkdədir. Biz burada Gürcüstana Rusiyanın hərbi müdaxiləsinin, Türkiyə ilə Ermənistan arasında münasibətlərin normallaşmasının və Azərbaycanla NATO əlaqələrinin daha da da dərinləşməsinin şahidi oluruq". H.Çətin onu da bildirdi ki, hazırkı çağırışları bölgədə imkana dönə biləcək fürsət kimi görmək lazımdır. Qafqaz elə bölgədir ki, burada əməkdaşlıq müxtəlif ola bilər: "Burada müxtəlif enerji layihələri reallaşdırılır. Cənubi Qafqaz Şərqlə Qərbi birləşdirən enerji dəhlizinin mərkəzində yerləşir. Bu çox əlverişlidir". H.Çətinin sözlərinə görə, bölgədəki sülh və sabitlik üçün təhdidlərdən biri də həll olunmamış münaqişələrin mövcudluğudur. Onların həlli çox vacibdir. Bu səbəbdən də bir çox dövlətlər öz sərvətlərindən gələn gəlirin çox hissəsini Silahlı Qüvvələrin formalaşdırılmasına və inkişafına yönəldirlər. Lakin bu gün milli təhlükəsizlik tək milli məsələ deyil: "Gürcüstan hadisələri bir daha göstərdi ki, Dağlıq Qarabağ problemi həllini tapmadan bölgədə silahlı toqquşma təhlükəsi qalacaq. Ona görə də bölgə dövlətlərinin müstəqilliyi, ərazi bütövlüyünün toxunulmazlığı təmin olunmalıdır. Azərbaycan bu gün NATO-nun "Sülh naminə tərəfdaşlıq proqramı"nda uğurla inkişaf edir". H.Çətin Bakının 2005-ci ildən qurumun "Fərdi tərəfdaşlıq proqramı"na qoşulduğunu da xatırlatdı. Həmçinin Əfqanıstanda sabitliyin təminində göstərdiyi yardıma görə Bakıya təşəkkürünü də bildirdi. Onun sözlərinə görə, Azərbaycan Silahlı Qüvvələrinin NATO standartlarına uyğunlaşdırılması istiqamətində müvafiq addımlar atır: "Bu regiona NATO-ya tam üzvlük üçün bütün imkanlar açılmalıdır. Çünki kollektiv müdafiə bu günün zərurətidir". H.Çətin Türkiyənin NATO-nun genişləndirilməsinə tərəfdar olduğunu, Şimali Atlantika Alyansının Balkanlar, Orta Asiya və Cənubi Qafqazda fəaliyyətini genişləndirməsini istədiyini də söylədi.

A.Əzimov isə vurğuladı ki, Azərbaycanın ərazi bütövlüyünün tanınması NATO-nun rəsmi sənədlərində də əksini tapıb.

Azad Əliyev

Həftə içi.- 2009.- 6 may.- S. 2.