Bu il 250-yə yaxın müəssisə və obyekt özəlləşdirilib

Dövlət Əmlakının İdarə Edilməsi üzrə Dövlət Komitəsində müşavirə keçirildi

Dünən Azərbaycan Respublikasının Dövlət Əmlakının İdarə Edilməsi üzrə Dövlət Komitəsində mərkəzi aparatın məsul işçilərinin, ərazi şöbələrinin və tabeli qurumların rəhbərlərinin iştirakı ilə 2009-cu ilin yanvar - aprel aylarının yekunlarına və qarşıda duran vəzifələrə həsr olunmuş müşavirə keçirilib.

Müşavirəni giriş sözü ilə açan komitə sədri Kərəm Həsənov ulu öndərimiz Heydər Əliyevin müəyyənləşdirdiyi Azərbaycanın inkişaf konsepsiyasının bu gün də prezidentimiz cənab İlham Əliyev tərəfindən uğurla davam etdirildiyini bildirib. Tədbirdə həyata keçirilən uğurlu iqtisadi islahatlarda dövlət əmlakının idarə edilməsinin və özəlləşdirilməsinin əhəmiyyəti də qeyd edilib. 2009-cu ilin yanvar - aprel ayları ərzində yerinə yetirilən işlərdən danışan komitə sədri bildirib ki, özəlləşdirmə prosesində şəffaflığın daha da artırılması, dövlət əmlakının idarə edilməsinin effektivliyinin daha da yüksəldilməsi və inkişafı, yeni iş yerlərinin açılması, özəlləşdirilən müəssisələrdə investisiya qoyuluşlarına nəzarət edilməsi ilə bağlı vəzifələrin yerinə yetirilməsinə önəm verilib.

K.Həsənov müşavirədə iştirak edənlərin nəzərinə çatdırıb ki, cari ilin yanvar-aprel aylarında dövlət əmlakının idarə edilməsini və özəlləşdirilməsini tənzimləyən normativ-hüquqi bazanın təkmilləşdirilməsi ilə əlaqədar əvvəlki dövrlərdə hazırlanan və təsdiqlənmək üçün aidiyyəti üzrə təqdim edilən 20-yə yaxın normativ-hüquqi sənədin layihələri ilə bağlı işlər davam etdirilir: "2009-cu ilin ilk 4 ayında ümumilikdə respublika üzrə 250-yə yaxın kiçik müəssisə və obyekt özəlləşdirilib. Həmçinin 4 səhmdar cəmiyyəti yaradılıb. Səhmlərin özəlləşdirilməsi ilə bağlı keçirilən 16 hərracda isə 21 SC-nin səhmləri özəlləşdirilib. İnvestisiya müsabiqəsi vasitəsilə özəlləşdirilən müəssisələrə hesabat dövrü ərzində müqavilələr üzrə müsabiqə qalibləri tərəfindən 30 mln. manata yaxın investisiya qoyulub. Ümumilikdə özəlləşdirmə prosesi çərçivəsində keçirilən investisiya müsabiqələri üzrə özəlləşdirilən 82 müəssisəyə 430 milyon manata yaxın investisiya qoyulub və bu müəssisələrdə təqribən 12,5 mindən çox iş yeri açılıb. Dövlət əmlakının mövcudluğu, qorunub-saxlanılması və ondan səmərəli istifadə edilməsi məqsədilə dövlət müəssisə və təşkilatlarında təxminən 90 monitorinq keçirilib".

Dövlət torpaqları haqqında sistemləşdirilmiş informasiyaları özündə əks etdirən məlumat bankına SC-lər, dövlət müəssisələri, özəlləşdiriləcək və özəlləşdirilən müəssisə və obyektlərin yerləşdiyi torpaq sahələri barədə təxminən 8600-ə yaxın məlumat daxil edilib.

K.Həsənov həmçinin bildirib ki, yanvar-aprel aylarında 250-yə yaxın daşınmaz dövlət əmlakı hüquqi və fiziki şəxslərə icarəyə verilib: "2009-cu ilin ötən dövründə 80-ə yaxın obyektin torpaq sahəsi icarəyə verilib. Eyni zamanda icarəhaqlarını ödəməyən 120-dən çox icarəçiyə dövlət büdcəsində yaranmış icarəhaqqı borcunun tələbi ilə bağlı xəbərdarlıq məktubları göndərilib. Hesabat dövrü ərzində icarə haqqını ödəməyən icarəçilərlə bağlı 50-yə qədər iddia ərizəsi məhkəmələrə göndərilib. Əvvəlki dövrlərdə qaldırılan iddia ərizələri nəzərə alınmaqla 40-a yaxın məhkəmə qərarı qəbul edilib. 2009-cu ilin yanvar-aprel ayları ərzində avtomatlaşdırılan ödəniş sistemi vasitəsilə hüquqi və fiziki şəxslər tərəfindən 3050-yə yaxın ödəniş həyata keçirilib. Qeyri-yaşayış sahələrinin və özəlləşdirilmiş müəssisə və obyektlərin yerləşdiyi torpaq sahələrinin icarəyə verilməsindən hesabat dövründə dövlət büdcəsinə təxminən 1,7 mln. manat vəsaitin daxil olması təmin edilib".

Cari ilin yanvar - aprel ayları ərzində 400-ə yaxın müəssisə və obyektlərin texniki pasportları tərtib edilib. Bununla yanaşı, 1800-ə yaxın qeyri-yaşayış sahəsinin plan-cizgiləri çəkilib. 2009-cu ilin ilk 4 ayı ərzində komitə tərəfindən ərizəçilərə 500-dən çox şəhadətnamə təqdim edilib. Bunlar dövlət əmlakının hüquqi və fiziki şəxslərə satılması, torpaq sahələrinin özəlləşdirilməsi və mülkiyyət hüququnun əldə edilməsinə dair şəhadətnamələrdir.

Komitə sədrinin sözlərinə görə, dövlət əmlakının idarə edilməsi və özəlləşdirilməsi işinin təkmilləşdirilməsi, dövlət əmlakından daha səmərəli istifadə edilməsi məqsədilə DƏİEDK-da bir sıra struktur dəyişiklikləri aparılıb: "Məqsəd komitənin müəyyən şöbələrinin vəzifə və funksiyalarında təkrarçılığın aradan qaldırılması və onların fəaliyyətinin effektivliyinin daha da artırılması olub". Müşavirənin sonunda komitə sədri qurumun ərazi və rayon şöbələrinin işinin səmərəliliyinin artırılması və mövcud nöqsanların aradan qaldırılması üçün müəyyən təxirəsalınmaz tədbirlərin görülməsinin vacibliyini vurğulayıb.

Aysel Hüseynqızı

Həftə içi.- 7 may.- S. 5.