Yunanıstan energetikləri qonağımızdır

Dünən Azərbaycan Respublikası sənaye və energetika nazirinin müavini cənab Gülməmməd Cavadov Yunanıstan - Azərbaycan parlamentlərarası işçi qrupunun rəhbəri cənab Konstantinos Tsiarasın rəhbərlik etdiyi nümayəndə heyəti ilə görüşüb. Nazirliyin mətbuat xidmətindən qəzetimizə verilən məlumata əsasən, görüşdə nümayəndə heyətinə daxil olan Yunanıstan parlamentinin deputatları cənab Xristos Folias, cənab Maksimos Harakopulus, cənab Nikolaos Stavroyanis, xanım Antonia Antoniu, xanım Anastasiya Kioysi, xanım Maria Antoniu iştirak ediblər. Azərbaycan Respublikası Milli Məclisinin Azərbaycan - Yunanıstan parlamentlərarası əlaqələr işçi qrupunun sədri cənab Hadı Rəcəbli və Yunanıstan Respublikasının Azərbaycan Respublikasındakı səfiri cənab İoannis Metaksas qonaqları müşayiət edib.

Sənaye və energetika nazirinin müavini cənab Gülməmməd Cavadov Azərbaycanla Yunanıstan arasında əməkdaşlığın müxtəlif sahələrdə, o cümlədən iqtisadi, enerji və digər sahələrdə genişləndiyini vurğulayaraq bildirib ki, Yunanıstan parlamentinin nümayəndə heyətinin ölkəmizə səfəri bu əlaqələrin daha da möhkəmləndirilməsinə xidmət edəcək.

Həmçinin nazir müavini Azərbaycanla Yunanıstan arasında təşəkkül tapmış qarşılıqlı faydalı əməkdaşlıq münasibətlərinin səviyyəsindən məmnunluğunu ifadə edərək bildirib ki, bəzi beynəlxalq əməkdaşlıq layihələrinin reallaşdırılması, xüsusilə Azərbaycanın enerji daşıyıcılarının Yunanıstan vasitəsilə Avropaya ötürülməsi sahəsində yaxşı perspektivlər var və onların həyata keçirilməsi regionun iqtisadi inkişafına, sabitliyinin və təhlükəsizliyinin daha da möhkəmlənməsinə xidmət edəcək.

G.Cavadov Yunanıstan parlamentinin deputatlarına respublikamızın bugünkü sosial-iqtisadi vəziyyəti barədə də ətraflı məlumatlar verərək qeyd edib ki, ikitərəfli münasibətlərimiz əlaqələrin gələcək inkişafına geniş imkanlar açır. Nazir müavini ölkəmizin təşəbbüsçüsü və təşkilatçısı olduğu böyük enerji layihələrinin həyata keçirilməsinin Azərbaycanın iqtisadi və siyasi mövqeyinin daha da möhkəmlənməsində mühüm rol oynadığını bir daha diqqətə çatdıraraq ölkəmizlə Avropa İttifaqı arasında enerji sahəsində əməkdaşlığın yüksələn xətt üzrə inkişaf etdiyini vurğulayıb.

Yunanıstan - Azərbaycan parlamentlərarası işçi qrupunun rəhbəri cənab Konstantinos Tsiaras isə öz növbəsində bildirib ki, Yunanıstan Azərbaycanın Avropa İttifaqı ilə əməkdaşlığını dəstəkləyir və qurumla daha sıx yaxınlaşmaqda Azərbaycana yardım göstərmək üçün öz təcrübəsini bölüşməyə hazırdır. İki ölkə arasında əməkdaşlığın daha da güclənəcəyinə əminliyini ifadə edən cənab K.Tsiaras Yunanıstan parlamentinin deputatlarının səfərini Azərbaycanla əməkdaşlığa ölkəsinin verdiyi yüksək qiymətin təzahürü kimi dəyərləndirib. Həmçinin qeyd edib ki, səfərdə əsas məqsəd iki ölkə arasında mümkün əməkdaşlıq imkanlarını araşdırmaqdır. Qonaq bildirib ki, ölkəsi enerji sektoruna maraq göstərir və Azərbaycanla bu sahədə əməkdaşlığın tərəfdarıdır. Görüşdə həmçinin qarşılıqlı maraq doğuran digər məsələlər də müzakirə olunub.

Mirvari

Həftə içi.- 2009.- 7 may.- S. 5.