Niyə məhz Neft Akademiyası?

Hadisənin şahidi olan "Neft-mexanika" fakültəsinin dekanı suallarımızı cavabandırdı

Azərbaycan Dövlət Neft Akademiyasında (ADNA) tükürpədən dəhşətli hadisədən sonra bu bilik ocağının 1000 tələbə və 350 əməkdaşının təhlükəsizliyinin təminatı hələ də tələbələrin ümidinə buraxılıb. "Həftə içi" qəzetinin müxbirinin apardığı müşahidəyə görə, ADNA-nın əsas binasının və 2-ci korpusunun təhlükəsizliyi 3 yaşlı şəxsə, bir də tələbələrin özlərinə tapşırılıb.

Neft Akademiyasının rektoru Səyavuş Qarayevlə görüşüb həmin təhsil müəssisəsinin hadisədən sonrakı vəziyyəti ilə bağlı söhbət etməyə çalışdıq. Güya mühafizəçi funksiyasını yerinə yetirən ahıl yaşlı şəxs rəhbərin aprelin 30-da baş verənlər barədə heç bir KİV nümayəndəsinə müsahibə vermədiyini bildirdi . O bizə prorektor Zaur Əhmədovla görüşməyi məsləhət gördü.

"Hadisədir oldu, bu haqda lazımınca deyildi də, yazıldı da. Mən bu haqda bir kəlmə də deməyəcəyəm", - Zaur müəllim bizi bu sözlərlə qarşıladı. Və bizi hadisənin şahidi olan "Neft-mexanika" fakültəsinin dekanı Qasım Məmmədovun üstünə göndərdi. Onu da xatırladaq ki, özünün dediyinə görə, həmin gün rəhbərlikdən ancaq o işdə olub. Baş verənləri yaxından müşahidə edən Qasım müəllim bu hadisədən sonra dərsdə davamiyyətin heç də yüksək səviyyədə olmadığını, hadisədən yalnız 5 - 6 gün sonra ADNA-nın öz fəaliyyətini əvvəlki qaydada bərpa etdiyini söylədi. Əgər faciə ilə əlaqədar hüquq-mühafizə orqanları akademiya daxilində təhqiqat aparmasaydı, bizim institutumuzda bu hadisənin baş verməsi barədə təsəvvür yarana bilməzdi.

Həlak olan və yaralanan tələbələrin qrup yoldaşlarının psixoloyi durumu ilə maraqlandıq. Qasım müəllim qeyd etdi ki, qrup yoldaşlarının itkisi nə qədər ağır olsa da, onlar baş verən hadisəyə düzgün yanaşır və başa düşürlər ki, biz təhsilimizi, ümumiyyətlə fəaliyyətimizi davam etdirməliyik. Onu da qeyd edə bilərəm ki, bizim "Neft-mexanika" fakültəsi üzrə yeganə bir tələbə Emin Abdullayev həlak oldu. O, qrup yoldaşlarının iştirakı ilə Daşkəsən rayonunda dəfn olundu.

Faciədən sonra akademiyada təhlükəsizlik sisteminin necə təşkil olunması ilə maraqlandıq. Müsahibimizin dediklərindən belə məlum oldu ki, hələlik təhlükəsizlik məsələlərində kardinal dəyişiklik yoxdur. Sadəcə, üç fakültənin aktiv tələbələrinin hesabına növbətçilik təşkil olunub. Yəni giriş-çıxış qapılarında gələnlər yoxlanılır, tələbə vəsiqəsi olmayan və kənar şəxslər akademiyaya buraxılmır. Bəlkə də gələcəkdə silahlı, videomüşahidə sistemi ilə əsl mühafizə təşkil olunacaq. Bu hadisənin nəyə görə məhz Neft Akademiyasında baş verməsi haqda Qasım müəllimin fərziyyəsi belə oldu ki, cani bu akademiyanı təsadüf nəticəsində seçib. O, hadisə zamanı beşinci mərtəbədə imtahan götürdüyünü bildirdi. "Mənə məlumat gəldi ki, tələbələri odlu silahla vurublar. Dəhlizə cıxdım və 4 əməkdaşımızın vurulduğunu gördüm. Bir mərtəbə qalxıb gördüm ki, boş dəhlizdə əli silahlı bir nəfər uzanıb can verir. Caninin məhz bu adam olduğunu sonradan bildim. Sonra mən 3-cü mərtəbədə əməliyyatçıları qarşılayıb özünə qəsd edən silahlını əməliyyatçılara göstərdim. Axıra qədər burada oldum, sonra isə vurulan tələbələri tanımaq üçün morqa getdik və s. Amma nəyə görə Neft Akademiyası, mənə belə gəlir ki, bu bəlkə də bir təsadüfdür, cani istənilən bir təşkilata və ya tədris ocağına girə bilərdi", - deyə Qasım müəllim qeyd etdi: "Bu sual bizdə də maraq doğurdu və hətta əməliyyatçılar onun ciblərindən sənəd və müxtəlif əşyalar çıxardarkən ilk növbədə mən onun sənədinə baxıb ad-familiyasını, doğum tarixini götürdüm. O saat tədris şöbəsinə zəng etdim ki, maraqlanıb görsünlər bizim 1980-ci il təvəllüdlü Fərda Qədirov adlı Gürcüstan vətəndaşı tələbəmiz var, ya yox. Yoxlanılıb bildirildi ki bu bizim tələbə deyil". Qasım müəllim bu hadisəni terror aktı kimi qiymətləndirərək belə hadisələrin dünyada baş verməsi haqda mətbuatda da tez-tez rast gəlindiyini bildirdi.

Neft Akademiyasında olduğumuz vaxt artıq hadisədən 2 həftədən çox vaxt keçmişdi. Gördüklərimizdən belə nəticə cıxarmaq olar ki, ADNA-da təşkil olunmuş "mühafizə"nin nəinki Fərda kimi silahlı cinayətkara, hətta tələbələr arasında dava-dalaşı yatırtmağa belə gücü çatmaz.

Arifə Yaqubqızı

Həftə içi.- 2009.- 20 may.- S. 6.