"Azərsun-holdinq" qanvermə aksiyası keçirdi

Dünən "Azərsun-holdinq" şirkətlər qrupu ənənəvi olaraq talassemiya xəstəliyindən əziyyət çəkən uşaqlara yardım məqsədilə qanvermə aksiyası keçirdi.

Məlumdur ki, tibb elmi nə qədər inkişaf etsə və həkimlər nə qədər təcrübəli olsa da, donor qanı olmadan xəstəni xilas etmək mümkün deyil. Belə ki, qan əvəzedilməz müalicə vasitəsidir və qana tələbat hər zaman vardır. Bu tələbat xüsusi olaraq təbii fəlakətlər və müharibələr zamanı daha da artır. Bundan başqa, qana tələbat irsi xəstəliklər zamanı da yaranır.

Xeyirxah kampaniyaya "Azərsun-holdinq"in tərkibində fəaliyyət göstərən bütün müəssisələrin 630-dan çox əməkdaşı qatılıb. Aksiyaya "Azərsun-holdinq"in prezidenti cənab Abdolbari Goozal də qoşulub. Əvvəlcə o, aksiyanın əhəmiyyətindən danışdı və qeyd etdi ki, "Azərsun" ailəsi Azərbaycana canı və qanı ilə xidmət edir: "Həyata keçirilən aksiya ehtiyacı olan insanlar üçün həyat qədər önəmlidir. Belə aksiyaları mən hər zaman dəstəkləyəcəyəm".

Eləcə də A.Goozal qeyd etdi ki, artıq üçüncü ildir bu aksiyanı keçirirlər. Burdan yığılan bütün donor qanı Səhiyyə Nazirliyinin Qanköçürmə İnstitutunun qan bankına təhvil verilir. Növbəti illərdə də belə aksiyalar keçirməyi holdinq nəzərdə tutur.

Qanvermədən əvvəl və sonra qanverən şəxslərə yüksək səviyyədə tibbi yardım göstərildi. Səhər saat 09:30 radələrində başlayan aksiya saat 19:00 radələrində bitdi. Aksiyada qan verən donorlar öz təəssüratlarını bizimlə bölüşdülər. Qeyd etdilər ki, belə qanvermə aksiyaları hər yanda olsa, talassemiyadan əziyyət çəkənlərin sayı azalar. Lakin onu da qeyd etmək lazımdır ki, talassemiya xəstəliyinə tutulmuş uşaqlar əgər düzgün və vaxtında müalicə alarsa, sağlam həmyaşıdlarından heç nə ilə seçilməyəcəklər. Sadəcə, bizim onlara diqqətimiz və qayğımız lazımdır.

Aysel Hüseynqızı

Həftə içi.- 2009.- 20 may.- S. 5.