"Yurdum, yuvam, məskənimsən, Azərbaycanım" rəsm müsabiqəsi keçirilib

YUNESKO-nun XXXIV Assambleyasının qərarı ilə 2009-cu il Səttar Bəhlulzadə ili elan olunub.

Bu münasibətlə Media və Təhsil İnnovasiyaları Mərkəzi (MTİM) İctimai Birliyi məktəblilər arasında "Yurdum, yuvam, məskənimsən, Azərbaycanım" rəsm müsabiqəsi elan edib. Qısa müddət ərzində şagirdlər tərəfindən hazırlanan 100-dən çox rəsm əsərinin sərgisi Azərbaycan Milli Konservatoriyasının tərkibindəki Respublika İncəsənət Gimnaziyasında təşkil olunub. Tədbirin keçirilməsində İncəsənət Gimnaziyası, Mədəniyyət və Turizm Nazirliyi, Köçərli adına Uşaq Kitabxanası da iştirak edib.

Müxtəlif janrlarda çox rəngarəng rəsmlər çəkildiyindən qalibləri müəyyənləşdirmək heç də asan olmadı. MTİM sədri Səidə Hüseynova 30 nəfər müsabiqə qaliblərinə diplom və hədiyyələr təqdim edib. O həmçinin çıxışında qeyd edib ki, vətənə məhəbbət mücərrəd anlayış deyil, o, təşkilatçılıq, inkişaf və mədəniyyət tələb edən real mənəvi qüvvədir. Daha sonra S.Hüseynova təhsilin, mədəniyyət və incəsənətin inkişafına xidmət göstərən İncəsənət Gimnaziyasının direktoru Mahizər Şabanbəyovaya, incəsənət işləri üzrə direktor müavini Kəmalə Kərimovaya MTİM İB təsis etdiyi diplomları təqdim etdi.

Tədbirdə S.Bəhlulzadənin həyat və yaradıcılığından bəhs edildi, tələbəsi Əlisəttar müəllim xatirələri ilə bölüşdü. Ölməz sənətkarın portret büstünü hazırlayan Nəriman müəllim mükafatlandırıldı. Bildirildi ki, İncəsənət Gimnaziyasının sənətkarın xatirəsinə həsr etdiyi ilk tədbir Bakının İslam mədəniyyətinin paytaxtı elan edilən mərasimdə Azərbaycan haqqında çəkilən film də yer almışdı. İncəsənət Gimnaziyasının rəqs ansamblı və skripkaçılar qrupu sənətkarın xatirəsinə həsr edilmiş sərgini daha dolğun və yaddaqalan etdi.

Səma

Həftə içi.- 2009.- 22 may.- S. 7.