"Vəfa" balacalara sevinc bəxş edib

"Vəfa" Ziyalı Qadınlar İctimai Birliyinin növbəti xeyriyyə tədbiri "Ümid" uşaq evində 1-10 yaş həddində olan uşaqlara kiçik toy məclisi keçirməsi olub.

Toy məclisini "Xəzər" TV də lentə alaraq yayımlayıb. Onu da bildirək ki, tədbirə ölkənin tanınmış ziyalıları, mədəniyyət və incəsənət xadimləri qatılıblar. "Vəfa" Ziyalı Qadınlar Birliyinin sədri, Bakı şəhəri üzrə Təhsil İdarəsinin qiymətləndirmə və monitorinq bölməsinin müdiri Əsmayə Cavadova bildirib ki, QHT Forumunun prezidenti Rauf Zeyni, xalq artistləri Xuraman və Fidan Qasımovalar, qarmon ifaçısı Gülbahar Şükürlü və bir çox ziyalılar keçirdiymiz tədbirlərdə fəal iştirak etdiklərinə görə təsis etdiyimiz diplomlarla təltif olunublar: "Məclisin şən keçməsində Qafqaz Universitetinin tələbələri fəallıq göstəriblər. Həm tədbir iştirakçılarını, həm də tədbirin əsas "qəhrəmanlar"ını şənləndiriblər. "Hippokrat" Cəmiyyətinin sədri iki həkimlə xeyirxah iş gördülər, müsəlman adət-ənənəsini həyata keçirməkdə bizə yardımçı oldular. 12 balacanın bəziləri qaçqın və imkansız ailənin övladları idi". Ə.Cavadova onu da qeyd edib ki, "Ümid" uşaq evində həmin günün əsl bayram əhval-ruhiyyəsində olmasını şərtləndirən məqamlardan biri də "bəylik" paltarlarının geyindirilməsi idi. Ə.Cavadova vurğulayıb ki, paltarlar xüsusi olaraq alınıb: "Süfrənin bəzədilməsi, müxtəlif cür yeməklər də uşaqların istəyi ilə hazırlanıb. Belə ki, bir gün öncə "Ümid" uşaq evində olmuşdum və balacalardan ürəklərindən hansı yemək-içmək keçdiklərini öyrəndim. Toy günü də arzuları çin oldu. Uşaqların sevincinin həddi-hüdudu yox idi və biz də bu sevinci onlarla birgə bölüşdük. Balacalarla 4 saata yaxın təmasda olduq. 80 nəfərin qaynayıb-qarışması, bayram əhval-ruhiyyəsi, uşaqların özlərini kimsəsiz hiss etməməsi, sanki üstümüzdən bir yük götürdü". İctimai Birliyin rəhbəri onu da qeyd edib ki, 2009-cu il "Uşaq ili" elan olunduğundan onlar bu kimi xeyirxah aksiyalarını davam etdirəcəklər. Birlik tərəfindən bu istiqamətdə bir sıra layihələr planlaşdırılıb: "Pis tərbiyə olunmuş insanı yenidən tərbiyə etməkdən çətin heç nə yoxdur. Bütün imkanlarımızı tərbiyə, xeyriyyə tədbirlərinin həyata keçirilməsinə səfərbər etmişik. Sıralarımız mətinləşib, üzvlərimizin sayı çoxalıb və hər bir kəs bu xeyirxah və vacib olan missiyanın həyata keçməsində böyük əzmlə çalışır".

Səma

Həftə içi.- 2009.- 22 may.- S. 6.