Alimimizin kitabı Moskvada nəşr edilib

Moskvanın "Flint" nəşriyyatında tarix elmləri doktoru, millət vəkili Cəmil Həsənlinin "Xruşşov dövrünün "mülayimləşmə" dövrü və Azərbaycanda milli məsələ (1954-1959)" kitabı işıq üzü görüb. Uzun illərin elmi araşdırmalarının nəticəsi olaraq ərsəyə gələn kitabda keçmiş SSRİ respublikalarından biri olan Azərbaycanın nümunəsində mərkəzlə əyalətin münasibətləri göstərilib. Müəllif vurğulayır ki, münasibətlərin bu həddə çatması Stalinin ölümündən sonra qabarıq şəkil aldı. Belə münasibətlər bütün SSRİ respublikaları üçün səciyyəvi idi. Kitabın əsas leytmotivi Stalinin ölümü və stalinizm böhranının başa çatması ilə müttəfiq respublikaların əhalisinin məhdud səviyyədə olsa da, milli "mən"lik, öz məmləkətlərinə sahiblik hissi ilə yaşamağa başlaması üzərində qurulub. Bütün SSRİ boyunca sosial-siyasi kataklizmlərə qəsdən meydan verən mərkəzi orqanlar Azərbaycanda baş verən hadisələri millətçilik kimi qiymətləndirirdilər. Cəmil Həsənlinin kitabının elmi redaktoru Rusiya Humanitar İnstitutunun direktoru A.Bezborodov, resenziya müəllifi isə Azərbaycan Milli Elmlər Akademiyasının həqiqi üzvü A.Daşdəmirovdur.

Samirə

Həftə içi.- 2009.- 23-25 may.- S. 7.