"İrəvan işğala son qoymalıdır"

"Ermənistan növbəti dəfə beynəlxalq ictimaiyyətin gözünə kül üfürmək istəyir"

Ermənistan parlamentinin spikeri Ovik Abramyan ATƏT Parlament Assambleyasının sədri Joao Soareşə etiraz məktubu göndərib. Erməni spikerin J.Soareşə müraciətinin əsas səbəbi isə Azərbaycanın ATƏT PA-dakı nümayəndə heyətinin sədri, vitse-spiker Bahar Muradovanın Sankt-Peterburqda keçirilmiş MDB parlamentlərarası sammitin 32-ci iclasındakı çıxışıdır. Erməni spiker iddia edib ki, B.Muradova çıxışında Dağlıq Qarabağ münaqişəsi ilə bağlı faktları təhrif edib. Vitse-spiker B.Muradovanın sözlərinə görə, erməni parlamenti, xüsusilə də onun spikeri O.Abramyanın ATƏT PA sədri J.Soareşə belə bir müraciət etməsi faktı açıq şəkildə göstərir ki, Ermənistan konstruktiv mövqe tutmaq istəmir. ATƏT PA, həmçinin sözügedən qurum Dağlıq Qarabağ münaqişəsinin həllinə cavabdeh olan beynəlxalq təşkilatdır. ATƏT çərçivəsində keçirilən bütün tədbirlərdə - Minsk Qrupunun vasitəçiliyi ilə prezidentlər və xarici işlər nazirlərinin görüşü də daxil olmaqla həmişə Azərbaycan ərazilərinin 20 faizinin işğal olunduğu vurğulanır. Həmçinin Ermənistanın işğal etdiyi ərazilərdən çıxmasının vacibliyi də ATƏT çərçivəçində qəbul edilən bütün sənədlərdə əksini tapıb: "Göndərilən məktubda da ATƏT PA-nın Qarabağ üzrə məruzəçisi Qoran Lenmarkerə istinadən balanslı siyasətin yürüdülməsi ideyası göstərilir. Mən də Lenmarkerin məruzəsinə istinadən demək istəyirəm ki, orada ən vacib məqamlardan biri kimi məhz işğal altındakı ərazilərin boşaldılması göstərilib. O öz çıxışında atəşkəs rejiminin olmasına baxmayaraq hər gün münaqişə tərəflərinin insan itkisi ilə üzləşdiyini dedi. Bu itkilərin böyük hissəsinin isə azərbaycanlı hərbçilər və dinc əhali olduğu vurğulandı". B.Muradovanın sözlərinə görə, MDB PA-nın 32-ci toplantısında ATƏT üzvü dövlətlərinin təmsilçisi və ATƏT PA-dakı azərbaycanlı nümayəndə heyətinin sədri kimi Azərbaycanın rəsmi mövqeyini səsləndirməkdə heç bir qəribəlik yoxdur. Vitse-spiker bildirib ki, həmin toplantıdakı çıxışı zamanı erməni nümayəndə heyəti bu məsələ ilə bağlı heç bir etiraz etməyib: "Bu tədbirin üstündən 1 həftə keçəndən sonra erməni spikerin ayılması və Soareşə belə bir məktub göndərməsi məni çox təəccübləndirdi. Bu səbəbdən də hesab edirəm Ermənistan növbəti dəfə beynəlxalq ictimaiyyətin gözünə kül üfürmək istəyir".

B.Muradova vurğulayıb ki, o yeni bir şey söyləməyib. Yalnız ermənilərin Azərbaycan torpaqlarını işğalı faktından danışıb. Əgər Ermənistan öz ünvanına ittihamlar eşitmək istəmirsə, qoşunlarını işğal altındakı torpaqlardan çıxarmalıdır.

Azad

Həftə içi.- 2009.- 26 may.- S. 2.