"Qızım dağıntılar altında qalmışdı"

Qəzzada yaşayan Azərbaycan vətəndaşı bir daha ora qayıtmaq istəmir.

İsrailin Qəzzada keçirdiyi hərbi əməliyyatlar zamanı Qəzzada olmuş, sonradan Azərbaycanın Misirdəki səfirliyinin köməyi ilə oranı tərk edərək Bakıya gətirilmiş Azərbaycan vətəndaşı Səbinə Şanaa APA-ya açıqlamasında ailəsi ilə birlikdə Qəzzada yaşadıqları haqda danışıb.

Əməliyyatların başladığı zaman ailəsi ilə birlikdə evdə olduğunu deyən S.Şanaanın əri müalicə olunmaqçün başqa ölkədə olduğundan o, müharibənin dəhşətlərini uşaqları ilə tək yaşayıb. S.Şanaanın sözlərinə görə, Qəzzada radikal HƏMAS hərəkatının hakimiyyətə gəlişindən sonra onların banklardakı hesabları da dondurulub: "Bu səbəbdən də nə maaş, nə ərzaq, nə də başqa zəruri şeyləri ala bilirik".

   S.Şanaa bildirib ki, Qəzza zolağında hələ də Azərbaycan vətəndaşları qalmaqdadır: "Onlardan bəzilərini tanıyıram, məsələn, Səadət adlı bir xanım bir neçə uşaq anasıdır, həmçinin hazırda hamilədir. O, ərinin Azərbaycan vətəndaşı olmadığını əsas gətirərək Qəzzadan çıxmaq istəmədi. Qadınlarımız ərlərini orada qoyub gəlmək istəmirlər".

   S.Şanaa son müharibəni belə xatırlayır: "Nə qaz, nə işıq, nə də su var. Hər gün bombardmandan qorunmaq üçün birinci mərtəbədə gizlənməli olurduq.

   Gördüklərimiz mənim və övladlarımın gözlərinin önündən çəkilmir. Əməliyyatların birinci günü İsrail təyyarələri övladlarımın da təhsil aldığı məktəbi bombaladılar. Nəticədə qızım dağıntılar altında qalmışdı. O, xilas edildiyi vaxt qan içində qışqıran insanlar, başsız, qolsuz, ayaqsız cəsədlər görüb. Nəticədə ürəyi gedən qızımı xəstəxanaya aparıblar". S.Şanaa artıq həmin xəstəxananın da olmadığını söyləyib. "Məktəb evimizin yaxınlığında olsa da, bombardman gedib uşaqlarımı evə gətirməyə imkan vermirdi", - deyə hadisələrin şahidi olmuş azərbaycanlı bildirir.

   Qeyd edək ki, S.Şanaa Qəzzanı Rusiya və Ukrayna Fövqəladə Hallar Nazirliyinin əməkdaşlarının köməkliyi ilə tərk edib: "Bu işdə mənə əvəzsiz köməklik göstərmiş Rusiyanın konsulu Yevgeni Nikolayeviçə, Azərbaycanın Misirdəki səfirliyinə, xüsusilə konsul Vüqar Yusifova təşəkkürümü bildirirəm. Misirdən Azərbaycana məhz onun köməkliyi ilə gəlmişik".

   S.Şanaa Bakıda heç kiminin olmadığı üçün əvvəlcə qardaşı və bacısının yaşadığı Həştərxana getmək istədiyini, lakin Azərbaycan vətəndaşı olduğu üçün Bakıya göndərildiyini bildirib: "Bakıda başqasının mənzilində qalmaq məcburiyyətindəyəm. Sonrasının necə olacağını isə bilmirəm. Əsas odur ki Qəzzadan sağ-salamat çıxa bildik".

S.Şanaa daha Qəzzaya qayıtmaq fikrində deyil.   

Cahangir.

Həftə içi.- 2009.- 23 yanvar.- S. 1-3.