Vətən
müharibəsində qəhrəmancasına döyüşərək
şəhadətə yüksələn Hümbət Yaqubov
Vətən
müharibəsinin qəhrəmanlarından olan Hümbət
Yaqubovun arzusu hərbçi olmaq və vətənin
keşiyində dayanmaq idi. Bir döyüşçü olaraq
Vətənin harayına yollanan Hümbət düşmənə
qarşı qəhrəmancasına döyüşərək
şəhadətə ucaldı.
Hümbət Yaqubov döyüşlərdə
göstərdiyi şücaətə görə
ölümündən sonra “Vətən uğrunda” və
“Füzulinin azad edilməsinə görə” medalları ilə
təltif edilib.
Yaqubov Hümbət Mərhəmət
oğlu 1998-ci il sentyabrın 4-də Hacıqabul rayonu Meyniman kəndində
dünyaya göz açıb.
Şəhid anası Laçın
Yaqubova qəhrəman övladı haqqında qürurla
danışır. Deyir ki, Hümbət hələ
uşaqlıq illərindən vətənpərvər ruhda
böyüyüb. O, həm də idmanla məşğul idi.
Həmyaşıdlarından seçilən Hümbət kənddə
böyükdən kiçiyə hər kəsin sevgisini
qazanıb. Tək istəyi hərbçi olmaq və vətən
keşiyində dayanmaq idi. Qismət belə oldu ki, o, vətən
uğrunda ən şərəfli xidmətini yerinə yetirdi
və şəhadətə ucaldı.
Hümbət haqqında danışan
şəhid bacısı Əfsanə Yaqubova söyləyir
ki, Hümbət şərəfli bir ömür yolu
keçdi, döyüşlər zamanı tərəddüd
etmədən Vətənin harayına yollandı. “Nə zaman
əlaqə saxlayırıqdısa, qələbə bizimlədir
söyləyirdi. Həqiqətən də o, sözünə
sadiq çıxdı, bizlərə qələbəni bəxş
etdi. Bir tərəfdən arzusu yarıda qalsa da, digər tərəfdən
ən böyük məqama ucalmaqla istəyini gerçəkləşdirərək
həyatdan köçdü”, - deyə şəhid
bacısı bildirib.
Şəhid atası Mərhəmət
Yaqubov deyir ki, Hümbət həqiqi hərbi xidmətini
ön cəbhədə yerinə yetirib və pulemyotçu
olaraq vətən keşiyində dayanıb. Xidmətini
başa vurduqdan sonra bir müddət mülki işdə
çalışsa da, əsl arzusuna - hərbçi olmaq
üçün müraciət edib. Hümbət hərbçi
olmadan əvvəl ona səfərbərlik
çağırışı gəldi. O, tərəddüd
etmədən yüksək əhval-ruhiyyə ilə
döyüşlərə yollandı. İlk döyüş
yolu Füzuli istiqamətindən başlayan Hümbət Cəbrayıl,
Xocavənd uğrunda gedən döyüşlərdə fəal
iştirak edib. Oktyabrın 25-də isə ailəsi ilə
sonuncu dəfə əlaqə saxlayıb və qələbə
inamı hissi ilə atasından xahiş edib ki, qalib
olduğumuzda qurban kəsin. Noyabrın 10-u qələbə xəbəri
gəlsə də, Hümbətdən xəbər gəlmir.
Hümbətin Qırmızı Bazar uğrunda gedən
döyüşlərdə qəhrəmancasına şəhid
olduğu məlum olub. Hümbətin nəşinin kimliyi təsdiqləndikdən
sonra ailəsinə təhvil verilib. O, doğulub boya-başa
çatdığı Meyniman kəndində torpağa
tapşırılıb. Şəhid atası isə
oğlunun vəsiyyətini həmin zaman yerinə yetirərək
qurbanlıq kəsib.
Hərbi
and.-2021.-11 iyun-S.5.