Lələtəpəyə ilk bayraq sancan polkovnik Şükür Həmidov

Şükür Həmidov 1975-ci il aprelin 1-də Qubadlı rayonunun Armudlu kəndində anadan olub. Həmin kənddə orta məktəbin 8-ci sinfini bitirdikdən sonra Cəmşid Naxçıvanski adına hərbi liseyə daxil olub. Liseyi bitirdikdən sonra 1993-cü ildə Bakı Birləşmiş Ali Hərbi Komandirlər Məktəbinə qəbul olub. Hələ təhsilini hərbi liseydə davam etdirən zaman könüllü olaraq döyüşlərə qatılmaq arzusunda olduğunu bildirib. Motoatıcı ixtisasına yiyələnən Şükür Həmidov 1995-ci ilin iyun ayında ilk hərbi rütbəsini, leytenant rütbəsini alaraq Naxçıvan Muxtar Respublikasında yerləşən “N” saylı hərbi hissələrin birində tağım komandiri kimi xidmətə başlayıb. Orada mayor hərbi rütbəsinə qədər yüksəlib.

2006-cı ildə Silahlı Qüvvələrin Hərbi Akademiyasına daxil olub. 2008-ci ildə Hərbi Akademiyanı bitirdikdən sonra cəbhə bölgəsində yerləşən “N” saylı hərbi hissələrin birində bölmə komandiri kimi xidmətimi davam etdirib. Sonra müxtəlif vəzifələrdə tabor komandiri, qərargah rəisi kimi xidmət edərək, hərbi hissə komandiri vəzifəsinədək yüksəlib. O, 2016-cı il Aprel döyüşlərində Lələtəpə yüksəkliyinin azad edilməsi uğrunda döyüşlərdə böyük şücaət göstərib. Lələtəpə yüksəkliyinin azad edilməsi əməliyyatı zamanı göstərdiyi şücaətə görə Şükür Həmidova vaxtından əvvəl polkovnik hərbi rütbəsi verilib. Azərbaycan Respublikası Prezidentinin 22 aprel 2016-cı il tarixli Sərəncamı ilə Şükür Həmidov “Azərbaycanın Milli Qəhrəmanı” adına layiq görülüb.

Şükür Həmidov atası Nəriman bəy və anası Şərqiyyə xanımın ailəsinin doqquzuncu övladı idi. 1993-cü il avqustun 31-də Qubadlı rayonunun ermənilər tərəfindən işğal edilməsindən sonra Həmidovlar ailəsi Sumqayıt şəhərinə gəlirlər və əvvəlcə birotaqlı mənzildə, 2 ay sonra isə yataqxanada yaşamağa başlayırlar.

2016-cı il aprelin 1-dən 2-nə keçən gecədən başlayaraq Azərbaycan və Ermənistan Silahlı Qüvvələrinin bölmələri arasında cəbhənin Tərtər və Cəbrayıl-Füzuli istiqamətlərində şiddətli döyüşlər başladı. Tarixə Aprel döyüşləri olaraq yazılan hərbi əməliyyatlar zamanı Şükür Həmidov Horadiz şəhərində "N" saylı hərbi hissənin Komandiri idi. Cəbhənin Cəbrayıl rayonu istiqamətində gedən döyüşlərin idarə edilməsi məhz ona həvalə olunub. Gecə döyüşləri zamanı Cəbrayıl rayonunun Lələtəpə istiqamətində olan əlverişli mövqelər, strateji nöqtələr, o cümlədən Lələtəpə zirvəsi Azərbaycan Ordusu tərəfindən işğaldan azad olunub. Həmin döyüşlərdə Ermənistanın müdafiə naziri Seyran Ohanyan tərəfindən qurulan və Ermənistan Ordusunun "yenilməz Ohanyan xətti" olaraq tanınan müdafiə xətti 40 dəqiqə ərzində darmadağın edilib.

2016-cı il mayın 10-da isə müdafiə naziri Zakir Həsənovun əmrinə əsasən Şükür Həmidova vaxtından əvvəl növbəti "polkovnik" hərbi rütbəsi verilib. Hərbi rütbə ona mayın 10-da Lələtəpə istiqamətində səngərdə təqdim edilib.

44 günlük Vətən müharibəsində 2-ci Ordu Korpusunun Komandir müavini olan Şükür Həmidov, cənub istiqamətində aparılan döyüşləri idarə edənlərdən biri idi. Əvvəlcə o, Füzuli rayonu istiqamətində döyüşlərə qatılıb.

Şəhidimizin həyat yoldaşı Həmidova Könül xanım bildirir ki, onlar 2003-cü ildə ailə həyatı qurublar: “2005-ci ildə qızımız Əzizə, 2008-ci ildə isə oğlumuz Nurlan doğulub. Böyük övladımız Azərbaycan Dövlət Pedaqoji Universitetində təhsil alır, kiçik övladımız isə 9-cu sinifdə oxuyur. Məktəblərarası bir neçə olimpiadalarda iştirak edib”.

Şəhidin anası Həmidova Şərqiyyə xanım deyir ki, oğlumun sinif müəllimi atası olub: “Bütün balalarımın hamısının sinif müəllimi atası olub. Belə deyək, bünövrəsi möhkəm olan bina heç zaman uçmur. Mənim balalarım atalarının tərbiyəsini alıb ailəcanlı, uşaqcanlıdırlar.

Şəhidin atası Həmidov Nəriman bəy deyir ki, belə bir qayda var, kiminsə haqqında söhbət gedəndə onu tərfləyirlər:

“İnanın, oğul,and olsun Şükür çox vətənpərvər adam idi. Onu uşaqlıqdan nə qədər çətin işə göndərirdik gedib bacarıb gələrdi. Şükür özün sevdirən adam idi. Hər kəsə məhəbbətlə hörmətlə yanaşırdı. Şükürə Cənab Prezident Milli Qəhrəman adını verdi, Allahdan arzumdur Vətənimiz həmişə sağlam əllərdə olsun!

Şükür çox istiqanlı oğul idi. Tez- tez işi ilə əlaqəli iş yerlərin dəyişirdi. Çox deyib-gülən idi, bir ata kimi həmişə məni əzizləyirdi. O bizim dərdimizə çox yanırdı. Bütün hərəkətlərində ata-anaya, qohum-qardaşa qarşı bir qram könül bulandırcı məqam görməmişəm. Şükürün oğlu çox istəyirdi hərbçi olsun, amma Şükür bunu istəmirdi. Atası çox istəyirdi qızı hüquqşünas ola. Şükür şəhid olandan sonra qərara gəldik ki, müəllimə olsun.

Şükür mənə deyirdi ki, ata, elə sakit hərəkət edib getdik. Lələtəpə mühüm məntəqə idi, Azərbaycanın nə qədər ərazisi düşmənin nəzarəti altında idi. Mən fəxr edirəm ki, mənim oğlum oranın azadlığı uğrunda gedən döyüşlərdə oraya bayraq sancdı!

44 günlük döyüşlərdə alınan yerlərlə bağlı Cənab Prezidentə məlumat verirdi. Oturub gözləyirdik. Şəhidlik xəbəri əsnasında yoldaşı Əsədə zəng edib ki, xəbərin var Şükürdən? Getdik hospitalın həyətində Füzulidə gecə saat 1-in yarısında, Peyğəmbər məscidində götürüb gəldik Bakıya. Allah cəmi şəhidlərmizə rəhmət eləsin, qazilərmizə şəfa versin! Allah Prezidentimizi var eləsin, onun dəmir yumruğunun ətrafında biz bir millət kimi toplaşaraq qalib olduq”.

Şəhidin qardaşı Həmidov Əsəd bəy deyir ki, 2016-ci il 1-2 aprel döyüşlərində bütün danışmalarından deyirdi ki, biz neçə illərdir buranı çox gözəl tanıyırıq:

"Komandanlıqdan əmr gələn kimi birinci erməni postunu götürüb qalxıblar Lələtəpəyə. Döyüş yoldaşları deyir, qalxdıq Lələtəpəyə silah-sursatımız bitmişdi. Bir də gördük ki, Şükür çiynində avtomatlar, belindən asılı gəlir. Dedi ki, mən gəlmişəm, silah gətirmişəm, igidlərim. Şükür qalxdı bayrağı sancdı Lələtəpənin başına”.

Polkovnik Şükür Həmidov 2020-ci il oktyabrın 22-də səhər radələrində Qubadlı rayonu istiqamətində döyüş zamanı ön xətdə şəhid olub. II Fəxri Xiyabanda dəfn olunub. Polkovnik Şükür Həmidov sağlığında Azərbaycan Ordusunda əvəzsiz xidmətlərinə görə dövlət başçısı tərəfindən "Azərbaycan Silahlı Qüvvələrinin 10 illiyi" yubiley medalı, "Qüsursuz xidmətə görə" 3-cü dərəcəli medalı, "Azərbaycan Silahlı Qüvvələrinin 90 illiyi" yubiley medalı, "Qüsursuz xidmətə görə" 2-ci dərəcəli medalı, "Hərbi xidmətdə fərqlənməyə görə" 3-cü dərəcəli medalı, "Azərbaycan Silahlı Qüvvələrinin 95 illiyi" yubiley medalı, "Qüsursuz xidmətə görə" 1-ci dərəcəli medalı, "Qızıl Ulduz" medalı, "Azərbaycan Ordusunun 100 illiyi" yubiley medalı, "Azərbaycan dövlət təhlükəsizliyi və xarici kəşfiyyat orqanlarının 100 illiyi" yubiley medalı, "Azərbaycan Xalq Cümhuriyyətinin 100 illiyi" yubiley medalı, "Azərbaycan Silahlı Qüvvələri Veteranı" medalı ilə təltif edilib.

Azərbaycanın ərazi bütövlüyünün təmin edilməsi uğrunda Vətən müharibəsindəki şücaətlərinə görə, Şükür Nəriman oğlu Həmidov Prezident İlham Əliyevin Sərəncamları ilə ölümündən sonra "Zəfər" ordeni, “Vətən uğrunda” medalı, "Füzulinin azad olunmasına görə", "Cəbrayılın azad olunmasına görə" və "Qubadlının azad olunmasına görə" medalları ilə təltif olunub.

Ruhun şad olsun, igid qardaşım!

Aydın Tağıyev

Müstəqil araşdırmaçı jurnalist

mr-aydin@mail.ru

Hərbi And.- 2023.- 28 aprel.- S.16.