"Həmişə deyirdi ki, şəhid oğlunla fəxr edəcəksən!" - Şəhid anası

Qəhrəmanlıq səlnaməmizin daha bir qəhrəmanı Allahyarov Şahin Hüseynbala oğlunun evində olub, ailəsi ilə birlikdə onun əziz xatirəsini yad etdik.

Baş gizir Allahyarov Şahin Hüseynbala oğlu 29 yanvar 1993-cü ildə Hacıqabul rayonunda anadan olub. 1999-2010-cu illərdə Quba rayonu Zizik kənd Əliyar Rüstəmov adına tam orta məktəbdə təhsil alıb. 2011-2012-cü illərdə müddətli həqiqi hərbi xidmətdə olub. Ailəli idi. 2 övladı var. Vəsiyyət etdiyi kimi, ölümündən sonra dünyaya gələn oğluna Şahin adı qoyulub.

2016-cı ildən Dövlət Sərhəd Xidməti sıralarına qəbul edilib. Zaqatala sərhəd dəstəsində müxtəlif vəzifələrdə xidmət etdiyi dövrdə özünü bacarıqlı hərbiçi kimi göstərib. 2019-cu ildən Sərhəd Qoşunlarının Qazax əlahiddə sərhəd diviziyasında kəşfiyyatçı vəzifəsində xidmət edib.

Şəhidin anası Allahyarova Nərgiz xanım deyir ki, 2022-ci il oktyabrın 26-da həyat yoldaşı balasının dərdinə dözməyib, rəhmətə getdi:

"Ailəmizdə dörd övladım var, sonbeşiyim şəhid balam Şahin idi. Onun da iki övladı var, özündən sonra yadigar qaldı. Şəhid balamın böyük qızı Oksana 2018-il də 14 oktyabrda anadan olub. Həmin vaxtı ailəsi ilə Qazaxda yaşayırdı. Deyirdi, ana, bir gün də olsa sən gəl, mən gəldiyin günü evə gələcəyəm. Şahinin oğlu isə 2020-ci il dekabrın 28-də anadan olub. Özünün vəsiyyəti ilə oğluna öz adını qoyduq.

Şahinin şəhid xəbəri gələndə axşam saat on idi. Rəhmətlik atası dedi, mən işə gedirəm televizoru söndür yat. Dedim, yox, yatmıram gizirləri göstərirlər. Bəlkə Şahin də ordadır. Yuxuda gördüm balam qırmzı tünd kostyum geyinib, tez-tez sağ ayağına baxır, bir də mənə. Nə irəli gəlir, nə geri gedir, bir-birimizə baxırıq, nə mən ondan soruşdum hara gedirsən, nə də o mənə dedi. Ayılanda gördüm bütün millət yığışıb bizim məhəlləyə, qardaşım da gəlib. Soruşdum nə olub? Dedi balam şəhid olub... Dedim, yox, ola bilməz mənim balam ölməz! Həmişə deyirdi ki, sən fəxr edəcəksən ki, sənin şəhid oğlun var. Arzusuna çatdı balam... (Red. ağlayır)

Çox rəhimli, o qədər xoş xasiyyətli, mülayim, gözəl insan idi. Deyirdi ki, ana, mən tarix yazacağam. Balam qanı ilə tarixi yazdı. Düşmənin qabağından qaçmadılar. Balam ürəyindən vuruldu, qəlpə yarasından şəhid oldu. Bu, çox acıdır, ancaq mən fəxr edirəm. Anasının adını şəhid anası, atasının adını şəhid atası etdi.

Ən böyük arzusu məni müqəddəs Məkkəyə aparmaq idi. Heç istəmirəm gecələr gəlsin. Gecələr hədsiz dərəcədə ağır olur mənə. Eləcə deyirəm, atam, yolunu nə yaman yaxın elədin?! Mən gəlib çata bilmədim Qazaxa, ancaq sən indi burdasan, evimizin yanındakı qəbiristanlıqdasan, hər gün gəlirəm...

Biz analar üçün təsəlli övladlarını unutmayan, unutdurmayanlardı. Var olsun bütün cavanlar! Kimisi kitab yazır, kimisi mahnı bəstələyir, kimisi şeir deyir, kimisi film çəkir, var olsun o adları yaşadanlara!

Bizim yeganə bir adımız, amalımız var, fərqi yoxdur, hansı rayondanıq. Allah Prezidentmizdən razı olsun! Hər bir şəhidimizi layiqincə qiymətləndirdi. O gün televizorda göstərdilər ki, ailələri Zəngilana qaytarırlar. Ağladım ki, o torpaqlardan birini də mənim oğlum döyüşərək qazanmışdı.

Şəhid balamın adına Quba rayonunda küçə verilib, Şahmat məktəbinə adı verilib, öz kəndimizdə abidə bulaq kompleksi tikilib, Şamaxıda yerləşən məktəblərdə adına sinif otaqları verilib".

Azərbaycan Ordusu Sərhəd Qoşunlarının baş giziri olan Şahin Allahyarov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Füzuli, Cəbrayıl, Xocavənd və Şuşanın azadlığı uğrunda gedən döyüşlərdə savaşıb. Cəbhənin Füzuli və Cəbrayıl istiqamətlərində gedən döyüşlərdə düşmənin xeyli sayda canlı qüvvəsini məhv edib, Hadrut qəsəbəsinin azad olunmasında fərqlənib. Oktyabr ayının 20-də baş gizir Allahyarov Şahin döyüşçü yoldaşları ilə birlikdə düşmən arxasına sızıb, Zoğalbulaq, Azıx, Böyük Tağlar, Tuğ, Ağdam, Düdükcü kəndlərinin düşməndən azad edilməsi, azad olunmuş yaşayış məntəqələrinin və ətraf ərazilərin düşməndən təmizlənməsində rəşadət göstərib. Şahin Allahyarov noyabrın 1-də Şuşa döyüşləri zamanı şəhid olub. Quba rayonunun Zizik kəndində dəfn olunub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılaraq hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Allahyarov Şahin Hüseynbala oğlu Azərbaycan Respublikası Prezidenti İlham Əliyevin Sərəncamlarına əsasən, ölümündən sonra "Vətən Müharibəsi Qəhrəmanı", "Vətən uğrunda", "Şuşanın azad olunmasına görə" , "Xocavəndin azad olunmasına görə" və “Cəsur döyçü” medalları ilə təltif olunub.

Ruhun şad olsun, şəhi qardaşım!

Aydın Tağıyev

Azərbaycan Jurnalistlər Birliyinin üzvü, müstəqil araşdırmaçı jurnalist

mr-aydin@mail.ru

Hərbi And.- 2023.- 31 mart.- S.13.