“Anasına dedi ki, bəlkə gələ bilmədim, məni gözləməyin” – Şəhid atası

Bu gün haqqında söz açacağım qəhrəmanımız Vətən müharibəsi şəhidi Sərvan Mehman oğlu Göyüşovdur.

Sərvan Mehman oğlu Göyüşov 1997-ci il fevralın 28-də Bərdə rayonunun Türk Qızılay Çadır şəhərciyində anadan olub. 2003-cü ildə Ağdam rayon 2 nömrəli köçkün tam orta məktəbinin I sinfinə qəbul olub və 2014-cü ildə həmin məktəbin XI sinfini bitirib.

O, 2014-2018-ci illərdə Heydər Əliyev adına Azərbaycan Ali Hərbi Məktəbində (AAHM) ali hərbi təhsil alıb. Azərbaycan Ordusunun leytenantı olan Sərvan Göyüşov 2020-ci il sentyabrın 27-də başlanan Vətən müharibəsinə qoşulub.

Şəhid atası Göyüşov Mehman Ənvər oğlu. 1971-ci ildə 7 oktyabr Ağdam rayonu Qiyaslı kəndində andan olub. Birinci Qarabağ müharibəsində iştirak edib, Qarabağ qazisidir.

Şəhidin atası Göyüşov Mehman bəy deyir ki, o və qardaşı da Birinci Qarabağ müharibəsində döyüşüblər:

“Qardaşım Göyüşov Tanrıverdi Ənvər oğlu da Birinci Qarabağ savaşında 1992-ci ilin 17 iyununda şəhid olub. Özüm də Qarabağ qazisiyəm. Oğlum Sərvan bölük komandiri olub. O, Vətəninə, millətinə çox bağlı idi. Bir ildən artıq Qazaxda xidmət edib, bir il də Murovda Koroğlu zirvəsində olub.

Bizimlə 25 sentyabrda telefonla danışdı. Anası dedi Sərvan, oktyabrın 7-də sənin ad günündür, gələrsən. O da deyib ki, ana, bəlkə gələ bilmədim mənni gözləməyin. Çox mərd oğul idi. Döyüş vaxtı çıxarıb gülləkeçirməz jilet gənc əsgərə verib.

Komandirləri deyirdi ki, o, çox qəlbi təmiz adam idi. Əsgərlərini çox sevirdi. Bir dəfə məndən 300 azn pul yollamağımı istəmişdi ona. Əsgərləri xəstələnibmiş, dedi, ata, mən onlara yardım etdim, lazım olan dərmanları aldım.

Evdə namaz qılırdım. Əsr namazımı qılırdım, baxdım ki, camaat doldu qapıya. Dedim, oğlum şəhid olub ona görə gəlmisiniz? Oğlumun şəhidliyi mənə ayan olmuşdu...

Şəhid balamın adına Ağdam, Mingəçevir, Quzanlı və Əfətlilidə adına sinif otaqları, həmçinin abidə kompleksi var.

O, əmisinin də qanın aldı, Birinci Qarabağ şəhidlərinin də qanını aldı. Allah cəmi şəhidlərimizə rəhmət eləsin! Şəhid ailələrinə deyirəm ki, başınızı uca tutun! Xocalının, Xocavəndin, Qarakəndin və digər bütün erməni qətliamlarının qanını aldılar bizim qəhrəman oğullarımız. Başımızı uca etdilər! Allah Prezidentimizi , ordumuz var etsin! Bu xalq şəhdilərinə və Ali Baş Komandanına borcludur. Prezidentimiz ordunu formalaşdırdı, ölkəni inkişaf etdirdi. İllər boyu dedi gəlin barışığa sülh imzalayaq. Lakin gördü erməni qanmır, sonda düşmənin başını əzdi. Allah belə igid, qəhrəman oğullardan bir də versin bu xalqa, amin!”

Azərbaycan Ordusunun leytenantı olan Sərvan Göyüşov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Murovdağ istiqamətində gedən döyüşlərdə savaşıb. Sərvan Göyüşov oktyabrın 1-də Murovdağ döyüşləri zamanı şəhid olub. 3 oktyabr 2020 il Ağdam rayonu Quzanlı qəsəbəsi kənd qəbristanlığında salınmış Şəhidlər Xiyabanında dəfn olunub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin Sərəncamlarına əsasən, Sərvan Göyüşov "Vətən uğrunda", "Kəlbəcərin azad olunmasına görə" və "Hərbi xidmətlərə görə" medalları və Rəşadət ordeni ilə təltif edilib.

Ruhun şad olsun, qəhrəman qardaşım!

Aydın Tağıyev

Azərbaycan Jurnalistlər Birliyinin üzvü, müstəqil araşdırmaçı jurnalist

mr-aydin@mail.ru

Hərbi And.- 2023.- 31 mart.- S.5.