"Deyirdi, ana, vaxt tez gəlsəydi, əsgərliyə gedərdim"

Elvin Ağakərimov 2002-ci il aprelin 1-də Şamaxı şəhərində anadan olub.2008-2019-cu illərdə Şamaxı şəhər İnşaatçı qəsəbə tam orta məktəbində təhsil alıb. Erkən yaşlarından güləşlə məşğul olub. Subay idi.

Şəhidin anası Xədicə xanım deyir ki, o, mənə çox bağlı idi. Həmişə gəlib deyirdi ki, ana, mən polis olacağam:

"Deyirdi ki, səni kraliça kimi yaşadacağam. Həmişə deyirdi, ana, vaxt tez gəlsəydi, gedərdim əsgərliyə. Çox sevirdi Vətənini, millətini. Çox qorxmaz, cəsur, qəlbi təmiz insan idi. Böyüklə- böyük, kiçiklə-kiçik idi. Ən çox da mənə bağlı idi, mən də onunla nəfəs alırdım... ( Red. ağlayır)

Əsgər gedənə kimi kafe və restoranlarda işləyirdi. Maşını vardı, satdı, bacısını gəlin köçürtdü. Dedi, mən əsgər gedəcəyəm, qoy bacımın xeyir işini edim, sonra rahat gedim. 2020-ci il 2 oktyabrda bacısının övladı Emin dünyaya gəldi, balam dayı oldu. Oktyabrın 3-də oğlum şəhid oldu, gəldi torpağa qoyuldu...

Müəllimləri həmişə onu çox tərbiyəli, sakit uşaq olaraq tərifləyərdilər. O, böyük-kiçik yeri bilən uşaq idi. İnanın, o dostdan, tanışdan ötrü canın belə verməyə hazır idi. Heç qorxu nədi bilməzdi mənim balam.

Oğlumla son əlaqəmiz sentyabrın 26-sı olub. Bizdən öncə qonşumuzda Zaur adında dostuna deyiblər ki, Elvin şəhid olub. 2020-ci il oktyabrın 3-də axşam saat 6-da biz oğlumun şəhid olmasından xəbər tutduq. Dayısı Hüseynağa gətirdi şəhid balamın nəşini... (Red. ağlayır).

Ana - ata üçün çox çətindir, amma sevinirsən, təsəllin odur ki, oğlun Vətən, bayraq uğrunda qəhrəmanlıqla döyüşüb şəhid oldu. O, bizim fəxrimizdir!"

Şəhidin atası Ağakərimov Eldəniz bəy deyir ki, getmişdim yanına, mənə dedi, ata, məndən narahat olmayın, qətiyyən! Qonşumuzun oğlu var, onunla bir yerdə gəzib, dolaşırdı həmişə: "Ona zəng edib ki, gecə saat 4-də bizi müharibəyə aparırlar, salamat qalın, atama, anama bu barədə heç nə demə. O, dost- tanışa çox can yandıran oğul idi. Hamıya hörmətlə yanaşırdı.

Oğlumun adına Şamaxı şəhərindəki bir orta məktəbdə sinif otaqları və bulaq kompleksi var.

Vətən sağ olsun! Balam üçün onu deyə bilərəm ki, Allah cəmi şəhidləmizə və oğluma rəhmət eləsin! Allah Prezidentimizə, qazilərimizə cansağlığı versin!"

Elvin Ağakərimov 2020-ci ildə müddətli həqiqi hərbi xidmətə çağırılıb. Azərbaycan Silahlı Qüvvələrinin əsgəri olan Elvin Ağakərimov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Ağdərə və Suqovuşanın azadlığı uğrunda gedən döyüşlərdə iştirak edib. Elvin Ağakərimov oktyabrın 2-də Tərtər istiqamətində gedən döyüşlər zamanı şəhid olub. Şamaxı Şəhidlər Xiyabanında torpağa tapşırılıb.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin Sərəncamlarına əsasən Elvin Ağakərimov ölümündən sonra "Vətən uğrunda" və "Laçının azad olunmasına görə" medalları ilə təltif edilib.

Ruhun şad olsun, igid qardaşım!

Aydın Tağıyev

Müstəqil araşdırmaçı jurnalist

mr-aydin@mail.ru

Hərbi And.- 2023.- 5 may.- S.7.