Şəhadətin mübarək cənab leytenant

ŞƏHİD - Vətən, torpaq, millət yolunda öz istəyi ilə canından keçməyə razı olan insanların fəth etdiyi ən yüksək, şərəfli zirvədir. ŞƏHİDLƏR xalqın azadlığını canı ilə qazanıb, qanı ilə yazanlardır. Onların canı, qanı bahasına qazandıqları azadlıq və müstəqillik xalq tərəfindən heç vaxt unudulmur.

Qəhrəman oğullarımız vətən sevgisi ilə illərdir işğal altında əzab çəkən torpaqlarımızı vətən etdilər. Yurda azadlıq,qəlblərə rahatlıq gətirdilər. Belə qəhrəmanlarımızdan biri də Şəhid Zamanlı Məmməddir.

Qəhrəmanımızın anadan olduğu Naxçıvan MR Püsyan kəndində cənnətdəki üçüncü ildönümü qeyd edilib. Tədbirdə kənd İcra nümayəndəliyi, məktəblilər, hərbçilər, şəhid ailələri və kənd ictimayəti iştirak edib.

Vətən müharibəsinin başladığı ilk gündən komandiri olduğu bölmənin şəxsi heyəti ilə birlikdə döyüşlərə qatılan Məmməd Zamanlı ermənilərin keçilməz dediyi “Ohanyan səddi”nin dağıdılmasında şücaət göstərib. Sentyabrın 27-də Füzuli istiqamətində düşmənin atdığı mərminin partlaması nəticəsində şəhidlik zirvəsini fəth edib. Qeyd edək ki, şəhidimizin adını daşıdığı babası Məmməd kişi İkinci Dünya müharibəsində, atası Rəhman Zamanov isə Birinci Qarabağ savaşında iştirak edib. Məmmədin atası Rəhman Zamanov uzun müddət daxili işlər orqanlarında xidmət keçib.

Məmməd Rəhman oğlu Zamanlı 1998-ci il avqustun 3-də Şərur rayonunun Püsyan kəndində anadan olub.

Qəhrəman şəhid Məmməd Zamanlı 2019-cu ildən Azərbaycan Silahlı Qüvvələrinin sıralarında xidmət edib. Azərbaycan Ordusunun leytenantı olan Məmməd Zamanlı 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Füzulinin azadlığı uğrunda gedən döyüşlərdə savaşıb. Məmməd Zamanlı sentyabrın 27-də Füzuli döyüşləri zamanı şəhid olub. Şərur rayon Püsyan kəndində dəfn olunub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti İlham Əliyevin 15.12.2020-ci il tarixli Sərəncamına əsasən Məmməd Zamanlı ölümündən sonra "Vətən uğrunda" medalı ilə təltif edilib.

Azərbaycanın ərazi bütövlüyünün bərpa edilməsi zamanı döyüş əməliyyatlarının rəhbəri olan, düşmənin canlı qüvvəsinin məhv edilməsində rəşadət göstərən, vəzifə borcunu ləqayətlə və vicdanla yerinə yetirdiyinə görə Azərbaycan Respublikasının Prezidenti İlham Əliyevin 15.12.2020-ci il tarixli Sərəncamına əsasən Məmməd Zamanlı ölümündən sonra "Azərbaycan Bayrağı" ordeni ilə təltif edilib.

Azərbaycanın Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Respublikasının Prezidenti İlham Əliyevin 25.12.2020-ci il tarixli Sərəncamına əsasən Məmməd Zamanlı ölümündən sonra "Füzulinin azad olunmasına görə" medalı ilə təltif edilib.

Bəxtiyar ƏLİYEV

Azərbaycan Jurnalistlər Birliyinin üzvü,jurnalist,

Hərbi And.- 2023.- 6 oktyabr.- S.15.