Qanıyla tarix yazan qəhrəman!

2020-ci ilin 27 sentyabrında başlayan Vətən müharibəsi cəmi 44 gün sonra bizim böyük zəfərimizlə başa çatdı. Zəfərimizə mənəvi məna verən isə 30 il işğal altında olan torpaqlarımızın, ən əsası da siyasi və strateji əhəmiyyət daşıyan Şuşa şəhərinin hərbi döyüşlərlə azad edilməsi oldu. Bu xoşbəxtliyi, bu qüruru isə bizə rəşadətli Azərbaycan Ordusu yaşatdı.

44 günlük Vətən müharibəsində qazandığımız şanlı Qələbədə payı olan Naxçıvan torpağının igid oğulları da düşmən tapdağında qalan torpaqlarımızın işğaldan azad edilməsi uğrunda gedən döyüşlərdə əsl igidlik, şücaət göstərərək uca zirvəyə - Şəhidlik zirvəsinə yüksəldilər. Bu firəvan günlərimizi canlarından keçən qəhrəman oğullarımıza, sağlamlığını itirən qazilərimizə borcluyuq. Onlar heç zaman unudulmayacaq.

Şükür Bayram oğlu Hacıyev də belə mərd oğullarımızdan biridir. Qəhramanın şəhid olmasından 4 il ötür. Bu münasibətlə onun Babək şəhəri qəbristanlığındakı məzarı ziyarət olundu. Ruhuna dular oxundu, məzarına tər çiçəklər düzülüb, xatirə əkilləri qoyuldu.

Muxtar respublikanın bütün bölgələrindən gələn şəhid ailələrinin, qazilərin, müharibə veteranlarının, Naxçıvan Muxtar Respublikası Ali məclisi deputatlarının, İcra Hakimiyyəti orqanı vəzifəli şəxslərinin və ictimayət nümayəndələrinin iştirak etdiyi tədbirdə əvvəlcə ölkəmizin ərazi bütövlüyü uğrunda canlarından keçmiş Vətən övladlarının əziz xatirəsi bir dəqiqəlik sükutla yad edildi. Azərbaycan Respublikasının Dövlət Himni səsləndirildi. Cəsur döyüşçünün döyüş yoluna nəzər salındı, tədbir iştirakçılarına məlumat verildi.

Tədbirdə çıxış edən Babək Rayon İcra başçısı Ovni Muradov Vətən uğrunda canından keçən bütün şəhidlərimizə Allahdan rəhmət, ailələrinə səbir diləyib, əziz xatirələrini ehtiramla anıb. Cənab Prezident, Müzəffər Ali Baş Komandan İlham Əliyevin rəhbərliyi altında 44 günlük Vətən müharibəsində hərb tariximizə, xalqımızın yaddaşına adlarını qızıl hərflərlə yazan igid oğullarımızla, şəhidlərimizlə, qazilərimizlə bu gün hər kəsin fəxr etdiyini, qürur duyduğunu bildirib. Müstəqil dövlətimiz, xalqımız var olduqca şəhidlərimizin də daim qəlblərdə yaşayacağını qeyd edib. Şəhidlərimizin adlarını əziz tutmağın, yaşatmağın hər birimizin vəzifəsi olduğunu vurğulayıb.

Sonra şəhidimizin anası Fatma xanımın çalışdığı Babək Rayon Xəstəxanasının direktoru Feruz Zehirov çıxışında qeyd etdi ki:"Ölkə başçısı şəhidlərimizin, qazilərimizin ailələri, valideynləri qarşısında baş əyirəm söyləyirsə, bu, hər birimizə nümunə olmalıdır. Özümə borc bildim ki, şəhidlərimizin məzarlarını ziyarət edim. Eyni zamanda Fatma ananın çalışdığı kollektivin böyük əksəriyyəti bu gün burdadır. Çalışırıq ki, qəhrəmanlarımızın ruhları qarşısında mənəvi borcumuzu az da olsa qaytaraq. Hesab edirəm ki, burada iştirak edən dövlət rəsmiləri tək dövlət məmuru olaraq deyil, həm də bir vətəndaş olaraq şəhidlərimizi yad etdir. Bu ilk növbədə bir vətəndaşlıq borcudur".

Tədbirdə iştirak edən şəhid Göydağlı Ramazanın atası Əbülfət müəllim, şəhid leytenant Ramil Əliyevin anası Gülnarə xanım, rayon dini icmasının nümayəndələri, qazilər, müharibə veteranları, N saylı Hərbi Hissənin zabit və əsgərləri çıxış etdilər.

Sonra tədbir Naxçıvan şəhər Gənclik Mərkəzində davam etdi. Şəhidimizin yaxınları onunla bağlı xatirələrini bölüşdülər. Hacıyev Şükürün əziz xatirəsi yad edildi.

Sonda şəhidin Anası Fatma xanım çıxış edərək bütün tədbir iştirakçılarına təşəkkürünü bildirdi. Xatirə fotosu çəkdirilib.

Hacıyev Şükür 1999-cu il avqustun 25-də Babək şəhərində anadan olub. 2005-2013-cü illərdə Babək şəhərində 1 nömrəli tam orta məktəbdə, 2013-2016-cı illərdə isə Heydər Əliyev adına Hərbi Liseydə təhsil alıb. 2016-2020-ci illərdə Heydər Əliyev adına Azərbaycan Ali Hərbi Məktəbində (AAHM) ali hərbi təhsil alıb.

Azərbaycan Ordusunun leytenantı olan Şükür Hacıyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Tərtər rayonunun Suqovuşan qəsəbəsinin azadlığı uğrunda gedən döyüşlərdə savaşıb. Şükür Hacıyev oktyabrın 12-də Suqovuşan döyüşləri zamanı şəhid olub. Babək şəhərində dəfn olunub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin müvafiq Sərəncamlarına əsasən Şükür Hacıyev ölümündən sonra "Vətən uğrunda", "Döyüşdə fərqlənməyə görə", "Suqovuşanın azad olunmasına görə", medalları və 3-cü dərəcəli "Vətənə xidmətə görə" ordeni ilə təltif edildi.

Ruhu şad olsun!

Bəxtiyar ƏLİYEV

Azərbaycan Jurnalistlər Birliyinin üzvü

Hərbi And .- 2024.- 29 noyabr(№45).-S.13.