"Aprel döyüşlərində "məğlubedilməz erməni ordusu" mifi darmadağın edildi": EMİN HƏSƏNLİ

"Aprel döyüşlərində "məğlubedilməz erməni ordusu" mifi darmadağın edildi": EMİN HƏSƏNLİ Azərbaycan Ordusunun parlaq tarixi qələbələrindən biri olan şanlı Aprel döyüşlərindən doqquz il ötür. Bu döyüşlər Vətən müharibəsinə aparan yolun mühüm mərhələsi kimi tarixə düşüb. 2016-cı ilin aprelində Azərbaycan Ordusu Ermənistan Silahlı Qüvvələrinin təxribatlarına layiqli cavab verdi və dördgünlük müharibə zamanı böyük uğurlar qazandı. Bu döyüşlər təkcə hərbi qələbə deyil, eyni zamanda xalqımızın milli ruhunun gücünü, birliyini və ordumuzun qüdrətini nümayiş etdirdi.

Mövzu ilə bağlı BiG.AZ-a açıqlama verən hərbi ekspert Emin Həsənli bildirib ki, Aprel döyüşlərinin hərb tariximizdə xüsusi yeri var. Aprel döyüşləri bizim ruhumuzun qələbəsidir. Bu döyüşlər bölgədəki vəziyyəti dəyişdi. Bütün dünya bildi ki, Azərbaycanın güclü ordusu var. Azərbaycan dövləti öz ərazi bütövlüyünü bərpa edəcək və işğalla barışmayacaq:

"Aprel döyüşlərində "məğlubedilməz erməni ordusu" mifi darmadağın edildi": EMİN HƏSƏNLİ"Aprel döyüşləri Azərbaycan xalqının özgüvənini daha da artırdı, xalqın orduya inamını gücləndirdi. Xalqımız orduda aparılan işlərdən xəbərdar idi, lakin bu döyüşlərdə ordumuzun gücünü praktik olaraq gördü. Xüsusi təyinatlılarımızın şücaətini izləyə bildi. Şəhidlərimiz canları və qanları bahasına bizi qələbəyə apardılar.

1994-cü ilin may ayında razılaşdırılan atəşkəsdən sonra Aprel döyüşləri şəhid verdiyimiz ən böyük döyüş idi. Ondan əvvəl müəyyən toqquşmalar baş vermişdi, lakin şəhid sayı çox deyildi. Qarabağ müharibəsindən sonra bölgədə ən böyük toqquşma və əməliyyat məhz Aprel döyüşlərində baş verdi. Azərbaycan Ordusu Ermənistana ağır zərbə vurdu. Əli azərbaycanlıların qanına batmış Sarkisyan-Ohanyan cütlüyü vəzifədən kənarlaşdırıldı. Dırnaqarası "məğlubedilməz erməni ordusu" mifi darmadağın edildi. Bu həm Ermənistanda, həm də beynəlxalq miqyasda öz təsirini göstərdi.

2020-ci ildəki 44 günlük Qarabağ zəfərinin müjdəçisi məhz Aprel döyüşləri oldu. Bu döyüş ümumilikdə hərb tariximizdə özünəməxsus yer tutdu. Biz şəhidlərimizin əziz ruhu qarşısında baş əyirik.

Aprel döyüşlərində iştirak edən şəhid ailələri və qazilərimiz cəmiyyət üçün böyük işlər gördülər. Onlar yüksək ruh yaratdılar. Məhz bu ruh yüksəkliyinin nəticəsində Ali Baş Komandan İlham Əliyevin rəhbərliyi ilə Azərbaycan xalqı və ordusu qələbə qazandı".

Hərbi And .- 2025. -4 aprel(№11).- S.3.