Şahbuzda qəhrəman şəhidimiz yad edilib

Vətənimizin azadlığı və bütövlüyü uğrunda canından keçən baş leytenant Firuz Qureyşlinin xatirəsi böyük ehtiramla anılıb.

Bu torpaq neçə-neçə igid oğulların qanı ilə yoğrulub, azadlığımız, bütövlüyümüz onların canı bahasına qorunub. Qəhrəmanlarımızın ruhu bu yurdun hər daşında, hər nəfəsində yaşayır. Onların həyat yolu gənclər üçün bir məktəb, xalqımız üçün qürur mənbəyidir.

"Naxçıvan Şəhid Ailələri" İctimai Birliyinin mətbuat xidməti bildirir ki, oktyabrın 12-də Şahbuz rayonunun Külüs kəndində qəhrəman şəhidimiz Qureyşli Firuz Əli oğlu yad edilib.

Muxtar respublikanın bütün bölgələrindən gələn şəhid ailələri, hökumət və dövlət nümayəndələri, hərbçilər, polislər, məktəblilər və ictimaiyyət nümayəndələri şəhidimizin məzarını ziyarət edərək üzərinə gül dəstələri düzüblər.

Ölkəmizin ərazi bütövlüyü uğrunda canlarından keçmiş qəhrəmanlarımızın əziz xatirəsi bir dəqiqəlik sükutla yad edildikdən sonra Azərbaycan Respublikasının Dövlət Himni səsləndirilib.

Tədbirdə çıxış edən qonaqlar və şəhidin ailə üzvləri iki yüz ilə yaxın bir müddətdə erməni qəsbkarlarının əzəli torpaqlarımızda törətdikləri qırğınlara nəzər salıblar. Bu tarixi hadisələrdə əhalimizin öz yurd-yuvalarından didərgin düşməsinin ağır nəticələri tədbir iştirakçılarının diqqətinə çatdırılıb.

Qeyd olunub ki, məhz 200 illik tariximizdə ilk dəfə Azərbaycan öz torpaqlarını geri qaytardı və işğalçılıq siyasətinin qarşısını tamamilə aldı. Bu da Ali Baş Komandan İlham Əliyevin sərkərdəliyi, cəsur döyüşçülərimizin əzmi və şücaəti sayəsində mümkün olub. Burada xalq amilini də unutmamaq lazımdır. Xalq öz sərkərdəsi və ordusu ilə sıx birləşərək Zəfərin qazanılmasına nail olub.

Bu Zəfər Azərbaycan xalqının, Azərbaycan Ordusunun və Ali Baş Komandan İlham Əliyevin Zəfəridir.

Zəfərin qazanılmasında canlarını fəda etmiş Firuz kimi igidlərin göstərdikləri qəhrəmanlıq nümunəsi tarixə düşmüş, gələcək nəsillərə örnək kimi təqdim edilmişdir.

Qeyd edək ki, şəhidimiz 2010–2013-cü illərdə Heydər Əliyev adına Hərbi Liseyə daxil olmuş, 2013–2017-ci illərdə Heydər Əliyev adına Azərbaycan Ali Hərbi Məktəbində təhsil almışdır. 2017–2018-ci illərdə Silahlı Qüvvələrin Təlim və Tədris Mərkəzində dinləyici olmuşdur.

2018-ci ildə leytenant kimi Beyləqan hərbi korpusunun N saylı hərbi hissəsində xidmətə başlamış, 2019-cu ildə baş leytenant rütbəsi almşdır.

Azərbaycan Ordusunun baş leytenantı olan Firuz Qureyşli, 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı döyüşlərdə fəal iştirak edib.

10 oktyabr 2020-ci ildə Füzuli rayonu istiqamətində gedən döyüşlərdə qəhrəmancasına şəhid olub. Şəhidimizin bir qız övladı yadigar qalıb.

Azərbaycan Respublikasının ərazilərinin işğaldan azad olunması və ərazi bütövlüyünün bərpa edilməsi zamanı döyüş əməliyyatlarında yüksək peşəkarlıqla hərbi qulluq vəzifəsini yerinə yetirərkən igidlik və mərdlik nümunəsi göstərdiyinə görə Azərbaycan Respublikası Prezidenti İlham Əliyevin Sərəncamlarına əsasən, Firuz Əli oğlu Qureyşli “Vətən uğrunda” və “İgidliyə görə” medalları ilə təltif edilib.

Dərin hörmət və ehtiramla yad edirik!

Bəxtiyar ƏLİYEV

"Naxçıvan Şəhid Ailələri" İctimai Birliyinin mətbuat katibi

Hərbi And .- 2025.- 17 oktyabr (№ 39).- S.8.