Ədalətin
cəzası, cəzanın ədaləti
(Əvvəli
ötən sayımızda)
Bu yaxınlarda
hüquq elmləri doktoru İlham Rəhimov təzə
çapdan çıxmış “Din və cəza” adlı
kitabını mənə göndərmişdi. Mən İ.Rəhimovun
bir çox kitablarını oxumuşam, eləcə də
onunla bəzi hüquqi məsələlər, o cümlədən
ölüm cəzası ilə bağlı müzakirəyə
çıxarılmış məsələ ətrafinda
fikir mübadiləsi aparmış və ölümün cəza
kimi təyin edilməsinin düzgün olmadığı
fikrində həmfikir olmuşuq. Vaxtilə “Demokratik Azərbaycan”
qəzetində hər ikimiz öz fikirlərimizi elmi məqalə
formasında da geniş ictimayyətə
çatdırmışıq. Bir çox məsələlərdə
fikirlərimizin üst-üstə düşməsinə gorə
də İ.Rəhimovun yeni kitabı məndə xüsusi
maraq dogurdu və kitab əlimə çatan andan çox həvəs
və diqqətlə oxumağa və müəllifin bu kitabda
müdafiə etdiyi əsas ideyanı özüm
üçün müəyyənləşdirməyə cəhd
etdim.
Bəşəri cəzalar
ədalətliliyə görə ilahi cəzaya oxşayır.
Əgər cəza pozulmuş ədalətin bərpası
kimi təsəvvürə gəlirsə, onda ədalətsiz
istənilən cəza özü-özlüyündə cinayətin
bir forması kimi meydana çıxır. Bir çoxları cəzanın
sərtliyini cəzanın ədalətliliyi kimi təsəvvür
edir. Əksinə, hüquq təcrübəsi göstərir
ki, cəzaların sərtliyi islaha yer qoymur və belə cəzalar
aşağı dərəcəli, ədalətsiz cəzalar
kimi meydana çıxır. Qurani-Kərimin “Əraf” surəsinin
181-ci ayəsində bəyan edilir: “Yaratdıqlarımız
içərisində haqq ilə hidayət edən və haqqa əsaslanaraq
hökm çıxarıb, ədalətli olan bir dəstə
vardır”. Bu ayə göstərir ki, bəzi bəşəri
cəzalar Allah-təalanın cəzalarına oxşar
özündə ədalətlilik keyfiyyətini saxlayır. Bu
ayədən görünür ki, əgər insanlar
arasında da ədalətə əsaslanıb, ədalətli
hökm çıxaranlar vardırsa, əksikliklərdən
dolayı məntiq üsulu ilə sübut olunur ki, bunun əksinə,
həm də ədalətə əsaslanmadan ədalətsiz
hömk çıxaran insanlar da vardır.
Allahın ədaləti
mütləq, bəşəri ədalət nisbi olduğundan,
bəşəri cəzalar ədalələtliliyə görə
bir-birindən fərqlənir. Bəşər tarixində cəzanın
tarixi inkişafi da özündə məhz cəzanın ədalətliliyinin
inkişafi kimi baş vermişdir. Cəzanın kamilləşməsi
onun ədalətliliyi və düzgünlüyü ilə
baş verir. Beləliklə, ilahi cəzada ədalət təyinedici,
bəşəri cəzada cəza təyinedicidir. Məhz cəzanın
təyinedici olmasına görə, bir çox hallarda bəşəri
cəzaların özü cinayətin bir formasına
çevrilir.
Cəzanın ədalətliyinin
bir əlaməti cəzanın dərəcələnməsindən
ibarətdir. Qurani-Kərimin “Həcc” surəsinin 10-cu ayəsində
bəyan edilir: “Bu əzab sənin öz əllərinin
qabağa göndərdiyi əməllərə görədir.
Allah bəndələrinə əsla zülm edən deyildir”. ”Ənam” surəsinin 132-ci ayəsində bəyan
edilir: “Hər bir kəs üçün etdiyi əməllərdən
dərəcələr vardır. Sənin Rəbbin onlarin
etdiklərindən qafil deyildir”. Buradan da belə
anlaşılır ki, əgər günahlar dərəcələnirsə,
buna uyğun olaraq cəzalar da zərurətə görə dərəcələnməlidir.
Qurani-Kərimin
“Nisa” surəsinin 92-ci ayəsində bəyan edilir: “Heç
bir möminə səhv və xəta istisna olmaqla, hansısa
bir mömini öldürmək yaraşmaz. Kim səhvən bir
mömini öldürsə, bağışlamadıqları təqdirdə
qanbahası verməlidir. Əgər öldürülən
şəxs sizinlə düşmən olan bir dəstədən
olsa, özü də mömin olsa, onda mömin bir qulun azad
edilməsi vacibdir. Əgər sizinlə aralarında əhd-peyman
bağlamış bir dəstədən olsa, onda onun
qanbahası qohumlarına verilməli və mömin bir qul azad edilməlidir...
Kim bir mömini qəsdən öldürsə, onun cəzası
cəhənnəmdir ki, orda əbədi qalacaqdır. Həmçinin,
Allah ona qəzəb edər, onu Öz rəhmtindən
uzaqlaşdırar və onun üçün böyük bir əzab
hazırlayar”. Bu ayələrdən görünür ki, səhv
və xəta nəticəsində insan öldürmək qəsdən
adam öldürməkdən fərləndirilmiş və qəsdən
adam öldürmə ağır cinayət kimi təyin
edilmişdir. Qurani-Kərimdə bir insanın
öldürülməsi bütün insanlığın
öldürülməsinə qiyas verilir ki, bu da qəsdən
insan öldürmənin bəşəriyyətə
qarşı qəsd kimi dəyərləndirilməsini tələb
edir. Amma dünyəvi cəza sistemlərində qəsdən
adam öldürmə fərdə qarşı yönəlmiş
cinayət kimi tövsif olunur.
İlahi cəza ədalətli
cəza olduğundan, pislik kimi meydana çıxmır.
İlahi cəzanın ədalətliliyinə cəzanın təxirə
salınmasını - möminə özünü islah etmk
fürsəti verilməsini də aid etmək olar. İslam
dinində bəzi ilahi cəzalar təxirə salınır.
Bu, Halim olan Allahın, günahkarları cəzalandırmağa
səbr edən Allahın işi kimi təsəvvürə gəlir...
Qurani-Kərimin
“Fatir” surəsinin 45-ci ayəsində bəyan edilir: “Və əgər
Allah insanları etdiklərinə görə cəzalandırsaydı,
yer üzündə heç bir canlını sağ
qoymazdı. Lakin müəyyən bir müddətədək
təxirə salır. Əcəlləri yetişdikdə Allah
bəndələrini görəndir”. “Nəhl” surəsinin
61-ci ayəsində bəyan edilir: “Əgər Allah
insanları zülmlərinə görə cəzalandırsaydı,
yer üzündə heç bir canlını sağ
qoymazdı. Lakin onlara müəyyən müddətədək
möhlət verir. Beləliklə, müddətləri
başa çatdıqda nə bir saat gecikər, nə də
bir saat qabağa keçə bilərlər”. Bu ayələrdən
görünür ki, Allah-təala insanları əməllərinə
görə cəzalandırmağa tələsmir. Buradan da tələskən
verilmiş cəzaların ədalətdən uzaq olduğu
sübut olunur.
Qurani-Kərimin
“Ali İmran” surəsinin 88-89-cu ayələrində bəyan
edilir: “...O lənətdə həmişəlikdirlər.
Onların əzabi yüngülləşdirilməyəcək,
onlara nəzər salınmayacaq və qərara
alınmış əzablarının təxirə
düşməsi üçün onlara möhlət verilməyəcəkdir...
Ondan sonra tövbə edən və ləyaqət taparaq öz
işlərini islah etməyə başlyan kəslər istisna
olmaqla! Allah çox bağışlayan və mehribandır”.
İlahi hüqüqda istisnalar -yüngülləşdirici
halların nəzərə alınması öz əksini
tapıb. İkinci ayədən görünür ki, tövbə
edib islah olunan, iman gətirənlərin qərara
alınmış əzablarının təxirə
düşməsi üçün onlara möhlət verilir və
bu möhlət dövründə iman gətirənlər
tövbə edib, yaxşı işlər gördükdə
Allah onlar haqqında qərarını dəyişdirir.
İlahi cəzanın
ədalətliliyinə həm də əməllərin bir
çoxunun bağışlanması -üstündən
keçilməsi aiddir. Qurani-Kərimin “Şura” surəsinin
30-cu ayəsində bəyan edilir: “Sizə yetişən
müsibətlər özünüzün
qazandığınız günahlara görədir və O
onların çoxundan keçir”. Allahın insanın zəif
və aciz yaradıldığını bəyan edir və
insan əməllərinin bir çoxunun onun fitrəti ilə,
yəni acizliyi və zifliyi ilə bağlı olduğundan,
onlara görə cəza təyin etmir.
Bəşərti
cəza ila ilahi cəzanın əsas fərqi
aşağıdakılardan ibarətdir:
Birincisi,
mükafatla cəzanın eyni inistansiya tərəfindən təyin
edilməsi. Bəşəri hüquqda cəzalar məhkəmə
orqanları, mükafatlar qanunverici və ya icra orqanları tərəfindən
verilir. İlahi hüquqda Allah-təala həm cəza, həm
də mükafat verəndir. Bu, Allah-təalanın öz bəndələrinin
əməllərinə yalnız neqativ tərəfdən yox,
həm də pozitiv tərəfdən
yanaşdığını göstərir. Bu zaman mükafata
layiq əmllər cəzaya layiq əməllərlə
summasiya edilərək, son hökm çıxarılır. Bəşəri
hüquqda qanunları verənlərlə (parlament) cəzanı
verənlər (məhkəmə) fərqli hakimiyyət
qolları kimi fəaliyyət göstərir.
İkincisi, bəşəri
hüquqda cəza verənlərin özləri də dünyəvi
hökmranlığa tabe olur və buna görə cəzavermə
siyasi xarakter almış olur. İlahi cəzada cəza verən
- Allah həm də eyni anda Hökmdar kimi
çıxış edir. Yəni Allah-təala həm qanunlar
verir, həm də həmin qanunlar əsasında mühakimə
edir. Bəşəri məhkəmələr yalnız
başqa orqanların vermiş olduğu qanunları icra edir.
Üçüncüsü,
bəşəri cəzalar birdəfəlik akt kimi həyata
keçirilir, bundan fərqli olaraq ilahi cəzalar mərhələli
- həm bu dünyada, həm axirət aləmində verilir.
Buradan da ilahi cəzaların konkret və mücərrəd cəzalar
kimi iki yerə ayrıldığı aydın olur. Bəşəri
cəzalarda mücərrədlik yoxdur. Qurani-Kərimin “Ali
İmran” surəsinin 56-ci ayəsində bəyan edilir: “Kafirlərə
gəldikdə isə, onlara dünyada və axirətdə
şiddətli əzab verəcəyəm və onların
heç bir koməkçisi olmayacaqdır”. “Səcdə” surəsinin
21-ci ayəsində bəyan edilir: “Biz ən böyük əzabdan
öncə onlara mütləq ən yaxın əzabı
daddıracağıq, bəlkə qayıdalar!”
Göründüyü
kimi, kafirlərin cəzası həm bu dünyada, həm də
axirət aləmində veriləcəkdir. Cəzanın bu
cür mərhələli təyin edilməsi cəzanın
ikinci hissəsindən - Axirət cəzalarından insanın
qurtulması üçün təyin edilib ki, bu da Allahın əsas
məqsədinin cəza vermək yox, islah etmək olduğunu
sübut edir.
Dördüncüsü,
bəşəri cəzalar üçün fərdiləşdirmə
xarakterikdir. Bəzi İlahi cəzalarda cəza fərdiləşdirilmir
və bu zaman günahsızlar da günahkarlarla birlikdə cəzalandırılır.
Qurani-Kərimin “Ənfal” surəsinin 25-ci ayəsində bəyan
edilir: “Siz yalnız zalimlərin düçar olmayacağı
fitnədən qorxun və bilin ki, Allah ağır cəzalandırandır”.
İlk baxışdan bu məsələ ədalətsiz
görünsə də, əslində bu, bütün
insanları günahkarlığa qarşı mübarizəyə
cəlb etmək məqsədi daşıyır ki, bu da dində
“Pis əməldən çəkinmə və
başqalarını da pis əməllərdən çəkindirmə”
əmrinə əsaslanır. Yəni bir insanın yalnız
özünün günahdan çəkinməsi kifayət
deyil, o, başqalarını da günahlardan çəkindirməlidir.
Əks halda, fitnənin (ictimai sabitliyin pis niyyətlərlə
pozulmasi) nəticəsi olaraq verilən kollektiv cəzaya həm
də fitnəyə qarşı durmayanlar məruz qalır.
Beşincisi, xəbərdar
olanla xəbərsizin fərqləndirilməsi. Qurani-Kərimə
görə günakara münasibət iki yerə
ayrılır:
a) Günah edən
xəbərsizlərə münasibət. Bu məsələ
dünyəvi hüquqla zidiyyət təşkil edir. Dünyəvi
hüquqa görə, qanunu bilməmək şəxsi (qanundan bixəbər
olmaq) məsuliyyətdən azad etmir. Amma ilahi hüquqda xəbərsizlik
cəzadan azad edir. Buna görə, ibtidai insanlar, usaqlar və
ruhi xəstələr, o cümlədən Quran haqqında
heç bir məlumatı olmayanlara xəbərdarlardan fərqli
yanaşılır.
b) Günah edən
xəbərdarlara münasibət. Qurani-Kərimdən
görünür ki, Allah-təala əvəllər peyğəmbər
göndərib, insanlara ilahi cəza haqqında xəbərdarlıq
etdikdən sonra onları cəzalandırır. Bununla da xəbərsizlər
xəbərdarlardan differensasiya edilir.
(Ardı
var)
Sərdar Cəlaloğlu
Hürriyyət.-2021.-31 avqust.-S.6.