Ağıl və milli şüur kasadlığı…

Və yaxud Turan dövləti haqda utopik fikirlər

A kişilər, əvvələn türkdilli dövlətlərin birləşməsi üçün üç keçilməz maneə var…

Son vaxtlar Azərbaycanda, bir az da Türkiyədə mifik Turan dövləti barədə söz-söhbətlər gedir. Bəziləri yaxın dostlarımız olan bu adamlara üzümü tutub deyirəm: İnsanın ağır xəstəliyi olanda, iflic olanda fikirləşsə ki, filan dağın o tərəfində səfalı bir göl var və tezliklə hamılıqla dağı parçalayıb-dağıdıb gölə yol açsaydıq nə yaxşı olardı. Ah, görəsən bundan gözəl, bundan vacib nə var? Bunu elə bir xalq fikirləşir ki, elə bir xalqın beş-on ağıllısı bunun dərdini çəkir ki, nəinki özləri bir tikə çörək dərdindədirlər, hətta ümumiyyətlə hamısı, bütün xalq bu gündədir.

Aləm bir-birinə dəyib, hərə öz xalqının, öz millətinin, öz tayfasının hayındadır, hərə təzəcə əldə etdiyi azadlıq və müstəqilliyi qorumaq hayındadır, zorla qoruyub saxlayır, bir dəstə məni bağışlayın – Don Kixot ortaya atılıb təzədən hansı bir imperiyaya qatılmaq, bir-birləri ilə tamamilə uzaq və yad olan, hamısı da bizim kimi despotizm mühitində boğulan xalqların, millətlərin cəm halında köləliyə qovuşmasının arzusunu meydana atıb. Türk xalqlarının – xüsusilə Azərbaycan xalqının, eləcə də osmanlı, türkmən, özbək, qazax, qırğız və s. xalqların psixologiyasını, təbiətini, mahiyyət, istək və arzularını bilməyə-bilməyə onların birləşmiş dövlətini yaratmaq ideyası kimə və nəyə lazımdır? Bu açıq-aşkar görünən bir aksiomdur. A kişi sus! İsətyirsən göyə tullan, fərqi yoxdur, bu, belədir ki, var. Necə ki, bütün dünyaya səpənlənmiş azərbaycanlıların başında pul qazanmaq ehtirasından başqa heç nə yoxdur. Onların yalnız bir amalı var: daha çox qazanmaq, yığmaq, gözüaclıq, acqurdluq, bütün ətrafdakıları aldatmaqda birinci. Nəyin hesabına olursa-olsun, ancaq pul yığmaq, yığmaq!

Mən adını çəkməyə qorxub, bir nəfəri misal gətirmək istəyirəm. Rusiyada ona buna-kələk gəlib neçə milyon yığdı və qaçıb ölümdən güclə qurtardı. Sonra da başqa bir ölkəyə gedib Rusiyada etdiklərini orda da etdi və nəticəsi də göz qabağındadır. A kişi, biz buyuq. Biz hansı bir örtülü yerdə ac saxlanan siçovullar kimiyik.

Bu günlərdə internetdə iki güclü siyasətçinin, iki savadlı, intellektual jurnalistin dialoquna qulaq asdım. Bizi yəhudi, o birisi də rus (Viktor Tsıbin). Onlar əsasən Rusiyada yaşayan azərbaycanlı və erməni diasporlarının fəaliyyətindən və ümumiyyətlə Dağlıq Qarabağda baş verən hadisələrdən danışırdılar. Rus ermənilərin xeyrinə olan hadisələrdən, ancaq real hadisələrdən danışır, yəhudi də amansız məntiq və həqiqətlər də onun dediklərini darmadağın edirdi. Ümumiyyətlə, yəhudilər dağlıq Qarabağ ətrafındakı müharibə və mübahisələrdə bizim arxamızda durmasaydılar, bilmirəm vəziyyətimiz necə olardı?

Mən artıq internetdə 10 dəfədən çoxdur görürəm ki, bu və ya digər yerdə yəhudi cəngavəri necə öz qüdrətli zəkaları və məntiqləri ilə düşmən məddahları, pulla satın alınmış rusları darmadağın edirlər. Mübahisənin bir yerində çox ağıllı və güclü, təcrübəli rus jurnalisti və siyasətçisi ermənilərin Rusiyadakı bir çox böyük şəhərlrdə fəaliyyət gözstərən universitetlərdə milli mərkəz yaratdıqlarını və bu mərkəzlərdə tanınmış rus elm və siyasət xadimlərinin ermənilərin xeyrinə necə geniş fəaliyyət göstərdikləri, o cümlədən saysız internet saytlarında çıxış etdiklərini və nəticədə əksər rus və dünya ictimaiyyətinin erməniləri dəstəklədiyini misal gətirəndə yəhudi dedi ki, axı həmin elm və siyasət xadimlərinin dedikləri ədalətsizdir. Onlar haqqı qoyub nahaqqı müdafiə edirlər. Rus dedi ki, bəli, elədir, amma nə olsun? Yüz minlərlə gənc rus tələbələri, eləcə yüz minlərlə internet istifadəçiləri onlara inanırlar, onları dəstəkləyirlər və onların dediklərini həqiqət kimi qəbul edirlər. Çünki erməni diasporu həmin elm və siyasət adamlarına yüz milyonlarla dollar pul xərcləyir.

Ermənilərdən çox qazanan və sayca ermənilərdən sənin azərbaycanlı diasporun isə o qədər acgöz, o qədər tamahkar, o qədər milli şüursuz, o qədər milli amalsız, o qədər miskindirlər ki, nəinki Rostov universitetində, hətta milyondan çox azərbaycanlının yaşadığı Moskvada belə, bircə dənə də milli, elmi və ideoloji mərkəz yoxdur. Çünki bunlar üçün pul lazımdır, azərbaycanlıdan isə pul çıxanda elə bil canları çıxır. Bunu rus jurnalisti və siyasətçisi Viktor Tsıbin dedi. Və bundan sonra bizi müdafiə edən qəhrəman yəhudi bir kəlmə də olsun söz tapıb deyə bilmədi.

A kişilər, biz buyuq. Sən də atılmısan meydana, bu cür tayfa ilə Turan dövlətini yaratmaq istəyirsən. Bu dövlət nəyinə lazım və bunun nə faydası olacaq? Bir halda ki, Qazaxıstan lideri Nazarbayevdən (özü də 4 şəhərdə heykəlini qoydurub və paytaxta da öz adını qoydurub) dönə-dönə bəyan edib ki, Qarabağ problemi onları o qədər də də narahat etmir. Və ümumiyyətlə görüşdə erməniləri, bizimkilərlə görüşdə isə bizə tərəfdar çıxır.

Türk xalqları, başda osmanlılar olmaqla, yüksək amal, milli fədakarlıq (orduya cəlb olunub cəsarət nümunəsi göstərmək başqa şeydir), var-yoxunu xalqının azadlığına, müstəqilliyinə, firavanlığına, şöhrətlənməyinə qurban verməyə hazır olan azərbaycanlı göstərə bilərsənmi? Azərbaycanlı analar hələ belə bir oğul doğmayıb.

O gün taksi ilə gələndə sürücü az qala ağlaya-ağlaya yolda danışırdı ki, benzini bahalaşdırıblar cəhənnəmə, üstəlik ona qaz da qatıblar və nəticədə maşınlar çox keçmədən xarab olub sıradan çıxırlar. Vallah- billah belədir. Vəhşi siçovullar belə benzini bahalaşdırıb onu qazla da keyfiyyətsiz hala salmazlar. Heç bir xalq belə alçaqlığı etməz. Heç bir xalq belə alçaqlığa dözməz. Adə ay zalım, bahalaşdırıb bu qədər qazandın, axı niyə malı, maşınlarımızı, dolanacağımızı, həyatımızı məhv edirsən? Axı bunun dolayı yolla sənə də ziyanı var. Çünki təkcə vicdanları olmasaydı cəhənnəmə, beyinləri, zəkaları da yoxdur. Allahın tısbağası belə, azərbaycanlıdan qat-qat ağıllı, xeyirxah və təəssübkeşdir. Vallah, doğrusunu deyirəm! İnanmırsız, “youtube” də baxın. Bir tısbağa necə olubsa arxası üstə çevrilib. Yazıq heyvan nə qədər əlləşirsə, ayaqları üstdə düşə bilmir. Belə çox olur. Qalıb-qalıb ya günün altında, ya da aclıqdan-susuzluqdan məhv olurlar. Budur, başqa bir tısbağa görünür. O həmcinsinin – yəni millətinin nümayəndəsinin dara düşdüyünün görür. Və ona yanaşıb yavaş-yavaş qaldırıb çevirməyə çalışır. Axırı ki, məqsədinə nail olur. Sonra da öz yoluyla çıxıb gedir. Heç elə bil heç nə olmayıb. Çünki bilir ki, adi bir iş, görməyə borclu olduğu bir iş görüb. Canı qurtaran tısbağa da onun dalınc yavaş-yavaş çıxıb getdi.

A kişilər, əvvələn türkdilli dövlətlərin birləşməsi üçün üç keçilməz maneə var. Rusiya, Xəzər dənizi və İran. Türkiyə ilə Azərbaycan Orta Asiya respublikaları ilə necə birləşəcək? Üstəlik Rusiya da, İran da Turan ideyasının qatı düşmənləridir. Bütün Rusiya telekanalları və siyasətçiləri Turan ideyasını ələ salırlar və haqlıdırlar da. Xalq, millət yuxarıda qeyd etdiyimiz kimi ən zəruri nə lazımdır, ilk növbədə onun dərdini çəkər. Orta Asiyada isə bu dərdi çəkənlər yoxdur. Bütün orta Asiya türk respublikalarında Qırğızıstandan başqa hamısında dəhşətli köləlikdir, ağlasığmaz despotizm hökm sürür. Hansı türkmən despotu, tiranı, hansı özbək, qazax prezidenti hakimiyyətini kiməsə başqasına verər? Hər respublikanın özünəməxsus coğrafiyası, özünəməxsus təbii sərvətləri var. Hansı birisi öz sərvətlərini digərləri ilə bölüşdürüb bərabərləşdirər? Heç biri. Axısxa türkləri qazaxlara nə etmişdilər? Bazarlarda alver edirdilər. Onlara hücum edib yarısı qırdılar, yarısı da güclə qaçıb Azərbaycan və Gürcüstanda məskunlaşdılar. Budur, türkdilli xalqların dostluğu?

Avropa birliyi ölkələrinə gəldikdə isə onlar siyasi-mədəni-iqtisadi cəhətdən bir-birlərinə yaxındırlar. Eləcə də psixolji cəhətdən. Avropa dövlətlərinin hər yerində min illik demokratiya hakimdir. Diktatura nə olduğunu bilmirlər. Hətta hər hansı bir diktator xalqına azadlıq və müstəqillik versə belə, rüşvət və korrupsiya nə olduğununu bilməsə də ölümündən sonra bağışlanmır. Böyük İspaniya generalı Fransisko Franko buna ən parlaq misal sayıla bilər. Ölkəsini Stalin bolşevizmindən və sosializmindən güclə xilas edən, ölkəsinə azadlıq və firavanlıq gətirən Frankonun sonuncu heykəli də bu günlərdə götürüldü. Bundan böyük nankorluq olarmı? Franko heç kimi günahsız yerə həbsxanaya atmamışdı. Rüşvət və korrupsiya nə olduğunu bilmir, öz maaşı ilə yaşayırdı.

Sən də gözünü yumub yapışmısan Turan belə gəldi, Turan belə getdi. A kişi, işin-gücün yoxdur? Yoxdur ki, yapışmısan Xəzərin o tayında zorla nəfəs alan bədbəxt türkmənləri (amma qazpulu, işıqpulu, su pulu verməkdən azaddırlar, bizdə isə şanlı dövlətimiz beş qat artırıb), xoşbəxt eləmək istəyirsən. Türkmən, özbək də deyər ki, hər şeyim düzəlmişdi, bircə “Turan” olmağım qalmışdı.

Aydındır ki, bu ideya ancaq işi-gücü olmayan adamların beyninə hakim olub. Onun ən böyük daşıyıcılarından biri də Azər Turanın Salyanlı olduğuna görə pərəstiş etdiyi Əlibəy Hüseynzadədir ki, deyirlər səhərlər güzgüyə baxanda deyərmiş: “Yenə səhər-səhər üzümə səlyanlı göründü”. Kitabları da maşallah, nə azərbaycanca yazılıb, nə türkcə yazılıb, nə farsca, nə də ərəbcə. Hamısının qarışığıdır və heç nə anlamaq olmur. Kişi təzə dil yaradıb. Bu da “Turan” ideyasının bayraqdarlarından biri.

110 il qabaq bədbəxt Məhəmməd Hadi yazırdı:

Atmış imzasını miləl övraqi-həyata,

Yox millətimin xətti bu imzalar içində.

Doğrudan da 73 milyonluq İran əhalisinin 35-40 milyonu Azərbaycan türkü, 25 milyonu farsdillər, qalanları ərəblər və türkmənlərdir. Amma gör bu 40 milyonun adı “it dəftəri”ndə varmı? Yoxdur!

Əlisa NİCAT

Hürriyyət.- 2021.- 27 fevral-1 mart. S.7.