MURADIN VƏTƏN SEVGİSİ

Sentyabrın 16-da son görüş zamanı Murad "Ana, mən şəhid olacam", Xavər ana isə cavabında "Oğlum sən general olacaqsan", - deyib. Ancaq ananın yox, Muradın arzusu çin olub...

Qəhrəmanlar anadan elə qəhrəman doğulurlar. Əgər elə olmasa, onlar peşələrin ən çətini, ən məsuliyyətlisi olan hərbçi peşəsini seçməzlər. Həyatlarının ən qayğısız zamanlarında ana köksündən, isti ev-eşiyindən ayrılıb, hərbi məktəbə yollanmazlar. Hərbçilər bu yola addım atdıqları yolun dönüşünün necə olacağını yaxşı bilirlər. Kimisinin ömür və döyüş yolları uzun olur, kimisində isə qısa. Muradın ömür yolu 23 il, müharibə ilə nöqtələnən hərbçi kimi qət etdiyi yol isə 9 il olmuşdur. Onun hərbçi peşəsinə vurğunluğu 2014-cü ildə yazdığı bu sətirlərdən duyulur.

VATAN UĞRUNA

14 yaşında giydik üniformayı cılız bedenlerimize,

Gençliğimizi harcadık Vatan uğruna.

Ama hiçbir zaman keşke demedik biz,

Siz sıcak yataklarınızda uyuyun diye.

Bakmayın gülüp eğlendiğimize.

Siz gezip tozarken, biz ayağımız yara-bere içinde eğitim yaptık.

Siz sevgilinizle müziğin ritminde kendinizi kaybederken,

Biz düdük sesiyle kollarımız parçalanana kadar "Vatan sağolsun!" diyerek süründük.

Siz alkolden üç kuruşluk insanların kollarına düşerken,

Biz yanı başımızda susuzluktan bir heykel gibi yerlere yapışan adamlar gördük.

Siz “aşk” dediniz, biz “Vatan” dedik.

Ne yaptıysak olmadı,

Kötü olan yine biz olduk.

Olsun, biz yine susar, bir sigara daha yakarız.

Ama şunu asla unutmayın:

Şayet bir gün güneş bizimle doğup, bizimle batmazsa,

Sizin için de artık güneş doğmayacaktır.

Müəllif: Nağıyev Murad

İstanbul, Türkiyə

4 fevral 2014

Nağıyev Murad Mayıl oğlu 9 fevral 1997-ci ildə Qazax rayonunda anadan olmuşdur. Ailədə üç oğul övladından sonuncusu, valideynlərinin istəklisi imiş. Murad hələ 1 yaşını tamam etməzdən öncə ailəsi Bakı şəhərinə köçmüşdü. Muradın sonrakı həyatı Bakıda davam etmişdi. 2003-cü ildə Bakı şəhəri Sabunçu rayonu Bakıxanov qəsəbəsi 271 N-li tam orta məktəbdə təhsil almağa başlamışdı. Muradın bir çox özünəməxsus xasiyyəti var idi. Mehriban, gülərüz, xeyirxah, mərhəmətli olmağı onu fərqləndirirdi. Elə bu xüsusiyyətlərinə görə də o hər kəs tərəfindən sevilirdi. Evlərinin ən balacası idi. Ancaq evlərindən ən tez uçanda o oldu. VIII sinfi bitirdikdən sonra hərbçi olmaq niyyəti ilə sənədlərini Cəmşid Naxçıvanski adına Hərbi liseyə vermiş və yüksək balla qəbul olmuşdu. Elə bu səbəbdən də təhsilini davam etmək üçün İstanbulda Kuleli Askeri Liseyə göndərilmişdi. Orada 4 il hərbi təhsil aldıqdan sonra Ankara Ali Hərbi Məktəbinə daxil olmuşdu. Türkiyədə baş verən iğtişaşlar səbəbindən 1 il sonra vətənə dönmüş və təhsilini Azərbaycan Ali Hərbi Məktəbində davam etdirmişdi. Keşməkeşli həyat yolu olan zabit 2020-ci ildə AAHM-i leytenant hərbi rütbəsi alaraq bitirmişdi. Pandemiya səbəbindən ailəsi həmin gün Muradın yanında ola bilməmişdi. Daha sonra Bakıda N saylı hərbi hissədə xidmətə başlamışdı. Murad tank komandiri kimi fəaliyyət göstərmişdi.

Hər oğul anasının bənzər arzuları olur. Oğlunun sevdiyinə elçi getmək. Oğlunun xoşbəxtliyinə şahid olmaq. Vağzalı sədası ilə sevincdən duyğulanmaq və daha nələr-nələr... Xavər ana da bu arzularının çin olacağı günün çox yaxın olduğunu düşünürdü. Heç təsəvvür etməzdi ki, bir gün bu arzuların nakam ömrünə göz yaşı tökəcək. Əslində Murad qəlbindəki arzusunu dilə gətirəndə Xavər ana çox təsirlənmişdi. Sentyabrın 16-da son görüş zamanı Murad "Ana, mən şəhid olacam", Xavər ana isə cavabında "Oğlum sən general olacaqsan" deyib. Ancaq ananın yox, Muradın arzusu çin olub.

Murad Vətən müharibəsinin ilk günündən döyüşlərə qatılanlar sırasında yer alıb. Füzuli, Cəbrayıl, Horadiz, Hadrut, Zəngilan uğrunda gedən döyüşlərdə misilsiz şücaətlər göstərib. "Murad, səni Allaha əmanət etmişəm" deyən Xavər ana Muraddan "Ana, bir bilsən, yanımda nə qədər şəhid var" cavabını alıb. O an Xavər ana Muradın öndə olduğunu anlayıb. Tank komandiri olan Murad bütün döyüşlərdə öndə gedib. Sonuncu dəfə oktyabrın 11-də Murada getməməsini deyiblər. Ancaq Murad ailəli bir hərbçini tankdan düşürüb onun yerinə özü minib. Kalonun önündə gedən tank düşmən tərəfindən vurulub.

11 oktyabrda qardaşına "Haqqınızı halal edin" yazıb. O mesajı oxuyan qardaş özünə yer tapa bilməyib. Edilən zənglərin cavabsız qalması Murada nə isə olmasından xəbər verirdi. Muradın şəhid olduğu xəbərini duyan qardaşı bu xəbəri anasına necə verəcəyini düşünür. Əvvəlcə Muradın yaralı olması xəbərini deyir. Ancaq şəhid xəbərini anadan gizlətmək mümkün deyil. Oktyabrın 19-da gecə Muradın nəşi məscidə gətirilir. Anasının ürəyi dözməz deyə anasına bildirmirlər. Oktyabrın 20-də Xavər ana son beşiyinin bayrağa bürünüb gələn tabutunu bağrına basır. Oğlunun döyüşdən qalib əsgər kimi dönüşünü xəyal edən ana ürəyi külə dönür. 20 oktyabrda Muradın nəşi II Fəxri Xiyabanda uğrunda can verdiyi torpağa tapşırılıb. Vətənə layiq oğul olmaq üçün ömrünün 9 ilini hərbinin sirlərinə dərindən yiyələnməyə həsr edən Murad zəfərin səbəbkarlarından biri kimi tarixin yaddaşına həkk olunub.

Leytenant Nağıyev Murad Mayıl oğlu Azərbaycan Respublikasının Prezidenti İlham Əliyevin sərəncamı ilə şəhadətindən sonra "Vətən uğrunda" medalı və "Cəbrayılın azad olunmasına görə" medalı ilə təltif edilib.

ŞƏHİD MURAD

Ötən zamanla birgə böyüyür həsrətin də,

Ölümsüzlük yazıldı sənin bəxt, qismətində,

Neçə ürək çırpınır qəmin əsarətində,

Sən olan xoş çağları Murad, unutmaq olmur,

Sənin qəlbdəki yerin dolmur şəhidim, dolmur.

Sən ömrünü vətəni yaşatmaqçün yaşadın,

Açılan hər səhəri "Vətən" deyib başladın,

Həsrətli torpaqları əzizləyib, oxşadın,

Əllərinin istisi donub torpaqda qaldı

Cismin torpağa döndü, ruhun göyə ucaldı.

Qəlblərdə yaşayırsan elin şəhid balası,

Zamanla da sağalmaz qəlbin şəhid yarası,

Biz bilirik cənnətdi şəhidlərin dünyası,

Cənnətinin nuruna qərq olub Azərbaycan

Özü dünyadan köçüb, adı tarixdə qalan.

Manya SƏXAVƏTQIZI

Hürriyyət.- 2021.- 23 noyabr. S. 7.