Şəhidlər ölməz, Vətən bölünməz...

44 günlük İkinci Qarabağ müharibəsində Vətən torpağının hər qarışını canından əziz bilib bu yolda şəhidlik zirvəsinə ucalan minlərlə övladlarımızdan bir də Əsəd Mahir oğlu Əsədlidir. Şərəfli ölümü ilə bütöv Azərbaycan xalqının ürəyində özünə əbədi abidə qoyan bu Vətən sevdalısı 1995-ci ildə Masallının Çay qıraq kəndində dünyaya göz açıb. Sonradan ailəsi Bakıya köçüb və Əsəd Nizami rayonunda Milli Qəhrəman şəhid Yuri Kavalyov adına 229 saylı tam orta məktəbi bitirib. 2012-ci ildə Azərbaycan Dövlət İqtisadiyyat Universitetinə daxil olub. Cəmiyyətdə hamı onun mədəniyyətinə, əxlaqına, fəal vətəndaşlıq mövqeyinə heyran kəsilir.

Mərdlik, cəngavərlik, ən əsası Vətənə sevgi ruhu ana südü ilə bərabər canına, qanına hopan Əsəd Əsədli 2016-2018-ci illərdə Naxçıvanda ordu sıralarında xidmət edib, hərbi kəşfiyyatçı peşəsinə yiyələnib. Adına can dediyi Azərbaycanın keşiyini çəkdiyi müddətdə iki dəfə komandanlıq tərəfindən nümunəvi xidməti qeyd olunub, tərifnamə ilə təltif edilib.

Vətən müharibəsi zamanı isə Əsəd Əsədli Füzuli və Xocavənd döyüşlərində savaşıb. Elə Vətənə, torpağa sonsuz məhəbbəti sayəsində neçə-neçə ağır sinaqlardan üzüağ çıxıb. Son döyüşü noyabrın 9-da Xocavənd rayonunun strateji yüksəkliyin müdafiəsi uğrunda olub. Sözün əsl mənasında burada da erməni dığalarına qan uddurur. Ölüm-dirim savaşında qəhrəman kimi döyüşüb çoxlu sayda düşmən yaraqlısını məhv etsə də, 21 döyüş yoldaşını mühasirədən çıxarsa da, özü şəhidlik zirvəsinə ucalıb. Ölümündən sonra “Vətən uğrunda”, Füzulinin, Xocavəndin azadlığına görə və “Hərbi xidmətlərə görə” medallarla təltif olunub. İndi isə uyuduğu müqəddəs məkan II Şəhidlər xiyabanıdır.

Bəli, çox müqəddəs kəlamdır: “Şəhidlər ölməz, Vətən bölünməz”. Əsəd Əsədli cismən aramızdan getsə də, mənən bizimlə olmaqla ən daha ucada durur. O, qısa ömür yaşadı, qaldı ki, gələcək nəsillərimiz üçün də örnək olacaq qəhrəmanlıqla dolu bir tarix yazıb qoyub. Bu günlər qədəm qoyduğu ömrünün 28 ilində qəhrəman Vətən oğlunun əziz xatirəsinə ehtiram olaraq doğum günü adına layiq qeyd edildi.

Zəfər ORUCOĞLU

Azərbaycan Jurnalistlər Birliyinin üzvü

Hürriyyət.- 2023.- 18 iyul.- S.10.