Vətənini canından artıq sevirdi

Əflatun Mircahangir oğlu Fərəcov bu işıqlı dünyada 21 il yaşadı. Qaldı ki, bu qısa ömrü xalqın qəhrəmanlıq simvolu kimi başa vurdu.

İkinci Qarabağ müharibəsində qanı, canı bahasına xalqımıza şanlı qələbə sevincini yaşadan qeyrətli Vətən oğullardan bir Əflatundur. Bu Vətən sevdalisının şərəfli ölümü ona əbədi olaraq ürəklərdə əzəmətli bir abidə ucaltdı. Həm də dövlət tərəfindən layiq görüldüyü “Vətən uğrunda”, “İgidliyə görə”, Laçının və Suqovuşanın azadlığı uğrunda medalları onun müharibə meydanında göstərdiyi şücaətə canlı nümunədir.

Əflatun Fərəcov 1999-cu ildə cənub mirvarisi Lənkəran rayonunun Osakücə kəndində təvəllüd tapıb. Ailədə 5 bacı, 4 qardaş olub, erkən yaşda valideynləri itiriblər. Böyük sevgisini görməyən uşaqların həyatı dərk edəni bütün arzuların zirvəsində Vətənin, xalqın xoşbəxtliyi dayanır. Məhz buna görə də Fərəcovlara el-obada əsl övlad məhəbbəti bəsləyir, onlara dərin ehtiram göstərirlər. Əflatunun əsgər yaş çatanda doğma Azərbaycanın qeyrətini hər şeydən əziz tutmaqla, ordu sıralarında xidmətə başlayır. Cəbhə bölgəsinə düşən vicdanlı, qeyrətli gənc Qarabağı işğal altında saxlayan erməni quldurlardan qisas almaqdan ötrü Vətəninə daha da ürəkdən bağlanır. Bütün hərbi təlimlərdə fəal olur, ən əsası əlinə silah alıb mübarizə meydanında yağıya qarşı döyüşmək amal onu rahat buraxmır. Əsgər yoldaşlarına ” Vətənin şərəfini qorumaq, düşmən tapdağına düşən müqəddəs torpaqları azad etmək bizim borcumuzdur . Bu yolda qan tökməyə dəyər”,- deyir.

Əflatun xidməti başa vurduqdan sonra el-obaya fayda vermək üçün halal zəhmətdən yapışır. Əməlləri ona hörmət gətirir, özünə yaxşı güzəran qurur. Düşməndən alacağı öcə də hazır olur...

İkinci Qarabağ müharibəsi başlanan kimi Əflatun Fərəcov Vətənin harayına birinci yetişir. Qaynar nöqtələrə can atır, həmişə öndə döyüşür. Göstərdiyi şəxsi şücaətlə əsgər yoldaşlarını da qələbəyə doğra aparır. Talış kəndi və Suqovuşanda haqq savaşımızda adı qəhrəmanlıq dastana dönüb dillərdən düşmür. Dəfələrlə ağır döyüşlərin qəhrəmanı olur. Əflatun şəhidlik zirvəsinə ucaldığı günü də yağı düşmənlə son nəfəsinə qədər vuruşur. Qan tökdüyü yerə qələbə bayrağımızı sancmaqla əbədiyyətə qovuşur.

Zəfər Orucoğlu,

Azərbaycan Jurnalistlər Birliyinin üzvü

Hürriyyət.- 2023.- 16 may.- S.7.