Vətənə ürəkdən bağlı olanlar...

Vətən, torpaq uğrunda ölümdən qorxmadan özünü odun-alovun içinə atıb 44 günə Azərbaycanın yeni, şanlı tarixini yazan şəhid oğullarını xalq bir an belə unutmur. Masallı Tarix-Diyarşünaslıq Muzeyi və Masallı Dövlət Rəsm Qalereyasının birgə təşkilatçılığı sayəsində baş tutan “Vətəni ürəkdən başlayıb şəhidliklə bitən igidlərimiz” adlı anım tədbiri də Vətən şəhidləri polkovnik-leytenant Ramiz Cəfərov, Natiq Həşimov və leytenant Vüsal Məhərrəmovun yubiley günlərinə həsr olunmuşdu.

Təşkilatçı müəssisələrin əməkdaşlarının, Masallı Dövlət Regional Kollecinin müəllim və tələbələrinin qatıldığı tədbirdə əvvəlcə Vətənin azadlığı və ərazi bütövlüyü uğrunda canından keçən şəhidlərin əziz xatirəsi ehtiramla anıldı.

Tədbiri giriş sözü ilə açan muzeyin direktoru, Əməkdar Mədəniyyət işçisi Əntiqə Tağıyeva dedi: - Təcavüzkar Ermənistanın təxribatlarına cavab olaraq əks hücum zamanı 44 günə Azərbaycan öz ərazi bütövlüyünün bərpa və tarixi yurd yeri Qarabağı işğaldan azad etdi. Müharibədə qazanılan möhtəşəm qələbə xalqımızın birliyi, həmrəyliyi, rəşadətli Azərbaycan Ordusunun əsgər və zabitlərinin misilsiz qəhrəmanlığı, əlbəttə, Müzəffər Ali Baş Komandanımızın sərkərdə məharəti, hücum diplomatiyasının və dəmir yumruğunun əzəməti sayəsində oldu.

Sonra muzeyin kiçik elmi işçisi Nazənin Heydərzadə, qalereyanın direktor əvəzi Təhmasib Məcidov Birinci Qarabağ müharibəsi şəhidi Natiq Həşimov, Vətən Müharibəsi şəhidləri Ramiz Cəfərov və Vüsal Məhərrəmov kimi igidlərin qısa, lakin şərəfli, hər gənc üçün örnək olan ömür yollardan böyük qürurla söhbət açdılar, eləcə də onların valideynlərinə ehtiramını ifadə edərək vurğuladılar ki, nə qədər Azərbaycan var, qədirbilən Azərbaycan xalqı var şəhidlərin adları əbədi qəlblərdə yaşayacaq, xatirələri həmişə əziz tutulacaq.

Yekunda tədbir iştirakçıları tərəfindən muzeydə şəhidlərə aid eksponatlar nümayiş edilən bölməyə baxış oldu və xatirə şəkilləri çəkildi.

Zəfər ORUCOĞLU

Hürriyyət.- 2024.- 24 dekabr, №48.- S.10.