Neft sənayesi uzun illər Azərbaycanın sosial-iqtisadi inkişafını təmin edəcəkdir

Üç il əvvəl jurnalistlərin “Dövlət Neft Şirkətinin gələcək planları nədən ibarətdir?” sualına şirkətin prezidenti belə cavab vermişdir: “Artıq Azərbaycanın hüdudlarını aşan şirkətimiz xarici ölkələrdə bir sıra müəssisə və nümayəndəliklər açıb. Bu qurumlar vasitəsilə biz xaricdə həyata keçirilən irimiqyaslı layihələrdə iştirak etmək niyyətindəyik.”

Şirkətin prezidenti əlavə olaraq bildirmişdir ki, ARDNŞ daxili vəsaitlər hesabına “Ümid”, “Babək”, “Əşrəfi”, “Qarabağ” və digər yataqlarda kəşfiyyat işləri aparmağı planlaşdırır. “Azərbaycan Respublikasının yanacaq-energetika kompleksinin inkişafı (2005-2015-ci illər) üzrə Dövlət Proqramı”nda nəzərdə tutulmuş vəzifələrə uyğun işlər başa çatdırılacaqdır.

Ötən 3 ildə şirkətin əmək kollektivlərinin Dövlət Proqramında nəzərdə tutulmuş və ölkə Prezidentinin qarşıya qoyduğu vəzifələrin uğurla həyata keçirilməsi ilə əlamətdar oldu. İlk növbədə onu qeyd edək ki, Dövlət Neft Şirkəti beynəlxalq quruma çevrilmiş, müasir tələblərə cavab verən modern və güclü bir qurum kimi dünyada böyük nüfuz qazanmışdır. Şirkətin strukturunun beynəlxalq standartlara uyğunlaşdırılması təmin edilmişdir. Bununla bağlı şirkətin tabeliyində olan idarələrin sayı 18-ə çatdırılmışdır. Bundan başqa, şirkətin struktur bölmələri tərəfindən yaradılmış 29 müştərək müəssisə və 4 alyans neft və qaz sənayesinin bütün sahələrində uğurlu işlərini davam etdirir.

Xatırladaq ki, bu faktlar ARDNŞ prezidenti Rövnəq Abdullayevin 3 il əvvəl jurnalistlərə müsahibəsindən götürülmüşdür. Ötən müddətdə Azərbaycan neft sənayesinin daha böyük uğurlar əldə etdiyi dövlət başçısı İlham Əliyevin 2009-cu ilin sosial-iqtisadi yekunlarına həsr olunmuş yığıncaqdakı nitqində xüsusi vurğulanmışdır. Əfsanəvi dəniz şəhəri Neft Daşlarının 60 illiyində iştirak edən ölkə rəhbəri demişdir: “Azərbaycan Dövlət Neft Şirkətinin fəaliyyətini xüsusi qeyd etmək istəyirəm. Səmərəli fəaliyyət nəticəsində neft şirkəti Heydər Əliyevin neft strategiyasının icrasında çox böyük işlər görübdür.”

Bu gün Azərbaycan dünyanın inkişaf etmiş dövlətlərindən biridir. Bu yüksəlişin təməlində ulu öndərin işləyib tətbiq etdiyi, Prezident İlham Əliyevin uğurla başa çatdırdığı neft strategiyası dayanır. Ötən il dünyada ağır maliyyə böhranına baxmayaraq, ölkəmizdə ümumi daxili məhsulun artması respublikada iqtisadiyyatın neft amilindən aslılığının azaldılması istiqamətində həyata keçirilən siyasətin faktiki nəticəsidir. İrimiqyaslı neft layihələrinin və müqavilələrin icrası ən uğurlu nəticələr əldə etməyə imkan vermişdir. İqtisadi uğurların təmin edilməsi ölkənin ümumi inkişafına, xalqın həyat səviyyəsinin daha da yaxşılaşdırılmasına yönəlmiş proqramların icrasına şərait yaratmışdır. Neft strategiyasının nəticələri artıq hər bir Azərbaycan vətəndaşının həyatında özünü aydın göstərir. Neft gəlirləri hesabına ölkədə qeyri-neft bölməsi inkişaf etdirilir, sahibkarla kreditlər verilir, geniş həcmdə quruculuq işləri görülür. Son illər Dövlət Neft Şirkətinin əldə etdiyi uğurlar neftçilərlə yanaşı, bütövlükdə əhalinin həyat şəraitini yaxşılaşdırmışdır. Şirkətin Sosial İnkişaf İdarəsi regionlarda çoxsaylı layihələr həyata keçirmişdir. Şirkətin maliyyə vəsaiti hesabına demək olar respublikanın bütün rayonlarında yeni məktəblər, xəstəxanalar, müalicə-diaqnostika mərkəzləri, idman qurğuları, istirahət obyektləri tikilmiş, park və xiyabanlar salınmışdır. Bunlarla yanaşı, şirkətin müəssisələrində mənzil problemi artıq həll olunmaq üzrədir. Bakının Nizami rayonu ərazisində “Neftayıranlar” qəsəbəsinin salınması mənzil probleminin həllində ciddi irəliləyişdir. Bundan başqa, Şirvan şəhərində 35 mənzilli, Bakının Xətai rayonunda 54 mənzilli, Lökbatan qəsəbəsində 50 mənzilli, Qaraçuxur qəsəbəsində 120 mənzilli binalar tikilərək neftçilərin istifadəsinə verilmişdir. Bu istiqamətdə DNŞ-in icra etdiyi ən mühüm işlərdən biri qaçqın-məsburi köçkün soydaşlarımızın mənzil-məişət şəraitinin yaxşılaşdırılmasıdır. Bu sahədə görülmüş işlərin nəticəsidir ki, ölkədə artıq bütün çadır şəhərcikləri ləğv edilmiş, məcburi köçkünlər üçün müasir yaşayış binaları tikilib istifadəyə verilmişdir.

Bu gün Azərbaycan Dövlət Neft Şirkəti istehsalat, hasilat, kəşfiyyat, qazma işlərini uğurla davam etdirir. Bakıdan başlanğıc götürən neft-qaz kəmərləri Xəzər dənizindən çıxarılan Azərbaycanın təbii sərvətlərini dünya bazarlarına çatdırır. Əldə olunan neft gəlirləri ölkəmizdə əhalinin həyat şəraitinin yaxşılaşdırılmasına, yeni layihələrin icrasına yönəldilir. Neft sənayesi Azərbaycanda çoxsaylı sosial proqramları hərəkətə gətirən lokomotiv rolunu oynayır. Bu deyimin həqiqət olduğu 2 gün əvvəl ARDNŞ-in prezidenti Rövnəq Abdullayevin Xəzər dənizinin Çilov adasında bir sıra sosial obyektlərin istifadəyə verilməsi mərasimində təsdiqini tapdı. Uzun illər adının sakinlərinin icməli və texniki su təchizatı həmin gün həll olundu. Burada quraşdırılmış “ƏKS-OSMOS” qurğusu sutkada 300 kubmetr dəniz suyunu içməli vəziyyətə gətirməyə imkan verir. Şirkətin prezidenti adanın sosial-iqtisadi inkişafının daim diqqət mərkəzində olduğunu qeyd edərək bildirdi ki, son illər burada yeni tibb məntəqəsi, idman kompleksi, uşaq bağçası, yataqxana binaları tikilib istifadəyə verilmişdir. Çilovda aparılan və indi də davam etdirilən yaşıllaşdırma tədbirləri bu qəsəbəni dənizin ortasında yaşıl adaya çevirib.

Şirkətin prezidenti Rövnəq Abdullayev təmizləyici qurğudan keçmiş sudan birinci özü içdi. Su aydınlıqdır. Heç şübhəsiz, Dövlət Neft Şirkətinin yeni sosial layihələrin icrasının, ölkə iqtisadiyyatının inkişafına, əhalinin həyatının daha da yaxşılaşdırılmasına yönəlmiş layihələrin uğurla yerinə yetməsinin bundan sonra çox şahidi olacağıq. Prezident İlham Əliyevin qeyd etdiyi kimi, neft sənayesi uzun illər Azərbaycanın sosial-iqtisadi inkişafını təmin edəcəkdir.

Telman Qafar

İki sahil.-2010.- 1 aprel.- S. 3.