Qaliblər müəyyən edildi

Qədim dövrlərdən “qara qızıl”ın vətəni kimi tanınan Azərbaycanda gənc neftçi kadrların hazırlanması məsələsi həmişə diqqət mərkəzində olmuşdur. Bu sahədəki zəngin ənənələri əzmlə davam etdirən Azərbaycan Neftçi Geoloqlar Cəmiyyəti və Amerika Neftçi Geoloqlar Assosiasiyasının Azərbaycan Bölməsi bu günlərdə növbəti tədbirə imza atıblar. Aprelin 3-ü və 10-da “Azneft” İstehsalat Birliyinin akt zalında bu iki qurumun birgə təşkilatçılığı ilə ənənəvi xarakter daşıyan XV Respublika Tələbələr Konfransı keçirildi.

Tələbələrin tədbirə marağını daha da artırmaq məqsədilə konfrans müsabiqə şəklində təşkil edilmişdi. Bakı Dövlət Universitetinin və Azərbaycan Dövlət Neft Akademiyasının geologiya profilli fakültələrini təmsil edən 40-a yaxın tələbə müsabiqəyə öz işini təqdim etmişdi. Məhz iştirakçıların çoxluğundan tədbir iki mərhələdə keçirildi. Aprelin 10-da XV Respublika Tələbələr Konfransının münsiflər heyətinin sədri, Azərbaycan Neftçi Geoloqlar Cəmiyyətinin (ANGC) prezidenti Firudin Hacıyev müsabiqənin ikinci mərhələsini açıq elan etdi.

Bir-birinin ardınca tribunaya qalxan BDU və ADNA-nın bakalavr və magistr təhsili alan müsabiqə iştirakçıları öz tədqiqat işlərinin tezislərini konfrans iştirakçılarının diqqətinə təqdim etdilər. Tələbələrin seçdikləri tədqiqat mövzuları geologiyanın ən müxtəlif sahələrini - neft-qaz yataqlarının axtarışını, kəşfiyyatını və işlənməsini, onların ehtiyatlarının hesablanmasını, məhsuldarlığının qiymətləndirilməsini, ayrı-ayrı lokal strukturların xüsusiyyətlərini, neftlilik-qazlılıq perspektivlərini, faydalı qazıntı yataqlarının axtarışında istifadə edilən metodların müxtəlifliyini və digər çox aktual problemləri - əhatə edirdi.

Çıxışlardan sonra on üç nəfərdən ibarət münsiflər heyəti işləri qiymətləndirmək və yekun qərara gəlmək məqsədilə müşavirə keçirdilər. Qeyd edək ki, konfransın münsiflər heyətinə sədr, geologiya-mineralogiya elmləri doktoru, professor Firudin Hacıyevlə bərabər respublikanın tanınmış geoloqları, ANGC-nin vitse-prezidentləri - ARDNŞ-ın “Neftqazelmitədqiqatlayihə” institutunu təmsil edən Bakir Məhərrəmov və BP şirkətinin əməkdaşı Nazim Abdullayev, ADNA-dan Bəhman Hacıyev və Nəriman Nərimanov, “Azneft” İB-dən Qəhrəman Süleymanov və Mais Qasımov, BDU-dan Təranə Təhməzova, Kompleks Geoloji Kəşfiyyat və Topoqrafiya İdarəsindən Elşən Abdullayev, BP və “Qarasu Opereytinq” şirkətlərindən müvafiq olaraq Əfqan Hüseynov və Vaqif Həsənov, eləcə də Schlumbergerdən Nigar Sadıqova və Vüqar İsmayılov daxil idilər.

Müzakirələrdən sonra Amerika Neftçi Geoloqlar Assosiasiyasının Azərbaycan Bölməsinin prezidenti, “Azneft” İB-nin baş geoloqu, geologiya-mineralogiya elmləri doktoru Akif Nərimanov və ANGC-nin vitse-prezidentləri Bakir Məhərrəmov və Nazim Abdullayev münsiflər adından qalibləri elan etdilər. Birinci və ikinci yerlərə 25,70 və 25,42 balla ADNA-nın III kurs tələbələri Elçin Şəkərov və Zöhrab Cavadzadənin təqdim etdikləri müvafiq olaraq “İstismarda olan yataqlarda quyu kəsilişlərinin cari məhsuldarlığının qiymətləndirilməsi” və “Qarabağlı, Kürsəngi, Bəndovan və Pirsaat lokal strukturlarının neftqazlılıq perspektivləri ilə bağlı morfogenetik xüsusiyyətləri” tədqiqat işləri layiq görüldü. BDU-nun IV kurs tələbəsi Aydın Bayramovun “Filiz yataqlarının axtarışında maqnit anomaliyalarının effektivliyi” mövzusunda təqdim etdiyi iş isə 25,36 balla üçüncü yeri tutdu. Vurğulayaq ki, sırada dördüncü olmuş ADNA-nın IV kurs tələbəsi Fərid Ələkbərov üçüncü yerdən cəmi 0,14 bal geri qaldı.

Azərbaycan Neftçi Geoloqlar Cəmiyyəti və Amerika Neftçi Geoloqlar Assosiasiyasının Azərbaycan Bölməsi adından Akif Nərimanov qalibləri təbrik etdi, konfransın bütün iştirakçılarına müvəffəqiyyətlər arzuladı. Sonda Akif Nərimanov, Bakir Məhərrəmov və Nazim Abdullayev I - III yerləri tutmuş iştirakçılara diplomlar və qiymətli hədiyyələr təqdim etdilər. İlk dörd yeri tutmuş tələbələr BP və Total şirkətlərinin hədiyyələri ilə mükafatlandırıldılar. Schlumberger şirkəti isə konfransda iştirak etmiş bütün birinci kurs tələbələrinin işlərini həvəsləndirici mükafatlara layiq gördü.

Məmmədli İlqar

İki sahil.- 2010.- 13 aprel.- S. 6.