YENİ TƏRƏFDAŞLIQLARA DOĞRU

Cənubi Koreyanın Qimçon Universitetinin Beynəlxalq Təhsil Mərkəzinin direktoru, Otelçilik və turizm idarəçiliyi fakültəsinin professoru Hee Chun Lee və adıçəkilən mərkəzin direktor müavini, İngilis dili fakültəsinin professoru David K.H.Lee Naxçıvan Dövlət Universitetində işgüzar səfərdə olmuşlar.

Universitetlə tanışlıqdan sonra qonaqları rektor, akademik İsa Həbibbəyli qəbul etmişdir. Görüş zamanı Qimçon Universitetinin təmsilçiləri universitet haqqında ətraflı məlumat vermişlər. Qeyd olunmuşdur ki, 1978-ci ildə yaradılmış, ailə idarəçiliyi prinsipinə əsaslanan bu ali məktəbdə 21 fakültə fəaliyyət göstərir. Universitetdə ingilis dili, tibb, beynəlxalq turizm və otelçilik, incəsənət sahəsi üzrə tədris yüksək səviyyədədir.

Rektor, akademik İsa Həbibbəyli qonaqları salamlayaraq Naxçıvan Dövlət Universitetində 11 fakültənin, 47 ixtisasın mövcud olduğunu, Misir Ərəb Respublikasından, Nigeriyadan, Banqladeşdən, Almaniyadan, Türkiyə Cümhuriyyətindən, İran İslam Respublikasından 251 tələbənin, o cümlədən Cənubi Koreyadan 6 nəfərin burada təhsil aldığını bidirmişdir. Rektor dünya elminə inteqrasiya edən bu ali məktəbdə elmin, təhsilin inkişafı ilə yanaşı ən müasir informasiya-kommunikasiya texnologiyalarının tətbiqinə də xüsusi əhəmiyyət verildiyini, dünyanın ən məşhur universitetləri ilə birgə videokonfransların, simpoziumların keçirildiyini, elmi tədqiqatlar, təcrübə mübadilələri aparıldığını vurğulamışdır. CİSCO texnologiyaları əsasında universitetdə yaradılan “Wi-FI” kampus internet şəbəkəsi isə hərtərəfli elmi əlaqələr qurulması üçün geniş imkanlar açmışdır.

Professorlar Hee Chun Lee və David K.H.Lee çıxışlarında universitetlərarası əlaqələrə, o cümlədən elmi nüfuza, mükəmməl kadr potensialına və maddi texniki bazaya malik Naxçıvan Dövlət Universiteti ilə tərəfdaşlığa böyük əhəmiyyət verdiklərini qeyd etmişlər.

Koreyalı qonaqlar universitetin tədris korpuslarında, struktur bölmələrində olmuş, xoş səfər təəssüratlarını Universitet televiziyası vasitəsilə paylaşmışlar. Universitetin konservatoriya binasında Cənubi Koreyanın Qimçon Universitetinin tanıtma filminin təqdimatı keçirilmiş, İncəsənət fakültəsinin müəllim və tələbələri rəngarəng konsert proqramı ilə çıxış etmişlər. Koreyalı tələbələrin də qatıldığı konsertdə hər iki xalqın milli musiqisini, mədəniyyətini əks etdirən maraqlı ifalar qonaqlarda xoş ovqat yaratmışdır. Konsertə Türkiyə universitetlərinin Naxçıvanda səfərdə olan nümayəndələri də tamaşa etmişlər.

Mehriban SULTAN

İki sahil.- 2010.- 22 aprel.- S.14.