Tədbirlər planı müvəffəqiyyətlə həyata keçirilir

ARDNŞ-in “Azneft” İstehsalat Birliyinin bütün idarə və müəssisələri kimi “Siyəzənneft” NQÇİ də ötən ili uğurlu nəticələrlə başa vurmuşdur. Neft hasilatı üzrə proqnoz tapşırıqlara 100 faiz əməl edilmiş, qaz hasilatı planı isə 110,3 faiz yerinə yetirilmişdir.

Keçici quyu fondu üzrə neft hasilatı üçün proqnoz tapşırıqlar 116,2% yerinə yetirilmişdir. Bu fond üzrə faktiki 37616 ton “qara qızıl” hasil edilmişdir ki, bu da proqnozdan 5236 ton çoxdur. Yeni texnika və texnologiyanın istehsalat proseslərinə tətbiqi istiqamətində də xeyli iş görülmüşdür. Keçən il “Siyəzənneft” NQÇİ-də quyuların yeraltı və əsaslı təmiri sahəsində işlər gücləndirilmiş, kollektivin öz gücü ilə 3288 nasos təmir edilmişdir.

Azərbaycan Respublikası Prezidenti İlham Əliyevin 2010-cu ili “Ekologiya ili” elan etməsi ilə əlaqədar “Siyəzənneft” NQÇİ-də də ətraf mühitin mühafizəsi istiqamətdə görülən işlər daha böyük vüsət almağa başlamışdır. Bu barədə söhbət açan NQÇİ rəisi Zülfüqar Səlimov bildirir ki, ötən ilin sonlarından başlayaraq “Siyəzənneft” NQÇİ-nin mədən ərazilərində ayrılmış neftlə çirklənmiş torpaqların bioremidasiya işinin həyata keçirilməsi” proqramı icra edilir. Görülən işlərlə daha yaxından tanış olmaq məqsədilə Neft və suyun kompleks hazırlanması və vurulması sexinin Neftvurma sahəsinə yollanırıq.

Neft və suyun kompleks hazırlanması və vurulması sexinin rəisi Rəşad İbrahimov deyir ki, son bir neçə ayda buranın mənzərəsi kökündən dəyişib. “Siyəzənneft” NQÇİ-nin mədən ərazilərində ayrılmış neftlə çirklənmiş torpaqların bioremidasiya işinin həyata keçirilməsi” proqramına əsasən ərazidəki şlam daşınıb, bataqlıqlar qurudulub, landşaft tədricən bərpa olunur. Yaşıllaşdırma işlərində isə bütün kollektiv böyük həvəslə iştirak edir. R.İbrahimov ADNA-nın 1993-cü il məzunudur, neft-mədən fakültəsini bitirib. Əmək fəaliyyətinə “Siyəzənneft”də operator kimi başlayıb. 2006-cı ildən Neft və suyun kompleks hazırlanması və vurulması sexinin rəisidir.

“Siyəzənneft” NQÇİ-nin rəisi Z.Səlimov qeyd edir ki, ətraf mühitin qorunması və bərpası işlərində neftçilərlə bərabər “Ekol Mühəndislik Xidmətləri” Qapalı Səhmdar Cəmiyyətinin işçiləri də yaxından iştirak edirlər. Bildirildi ki, Neftvurma sahəsinin 47 nəfərlik kollektivi sutka ərzində 119-120 ton nefti qəbul edib hazırlayırlar. Ay ərzində üç dəfə hazırlanmış “qara qızıl” ARDNŞ Neft Kəmərləri idarəsinə təhvil verilir. Görülən işlərdə qaynaqçı Şakir Bayramovun, çilingər İlkin Mailovun, operatorlar Mais Ağamalıyev, Elman Səfərov və İslam Dadaşovun, maşinist Həşim Məlikovun zəhmət payı daha çoxdur.

Mədən və Neftvurma sahəsində həyata keçirilən abadlıq işləri qonşuluqdakı Qaz-Kompressor sexinin 1 saylı Kompressor stansiyasında da davam etdirilmişdir. Stansiyanın mühəndisi Heydər Talıbov və maşinist Qurban Əliyev bildirirlər ki, birinci mədən ərazisindən gələn “mavi yanacaq” bu stansiya vasitəsilə Siyəzən şəhərinə ötürülür. Sutka ərzində 23-25 min kubmetri qaz 0,5-0,8 atmosfer təzyiqlə əhaliyə çatdırılır və Siyəzən şəhərinin tələbatının xeyli hissəsini ödəyir. Qaz-Kompressor sexinin 70 işçisinin on nəfəri 1 saylı Kompressor stansiyasında çalışır. Onlar iki qəbul və iki çıxış seporatoruna yüksək səviyyədə xidmət edirlər. Qeyd edək ki, Stansiyanın mühəndisi Heydər Talıbov 37 ildir burada çalışır. O neft sənayesində atası - müharibə iştirakçısı, 44 il neft mədənlərində usta kimi çalışmış Abdulla Talıbovun yolunu davam etdirir. Deyir ki, idarədə yaxşı işləmək üçün hər cür şərait yaradılıb, operatorların xidməti otaqları lap bu yaxınlarda təmir edilib.

Növbəti müsahibimiz NQÇİ-nin baş energetiki Əlibala İbrahimovdur. O, 1978-ci ildə Azərbaycan Neft və Kimya İnstitutunun energetika fakültəsini bitirərək “Siyəzənneft” NQÇİ-də əmək fəaliyyətinə başlayıb. 1981-ci ildə hələ gənc mütəxəssis ikən baş energetik vəzifəsinə təyin edilən Əlibala müəllim bu gün də öz işini gənclik həvəsi, gənclik enerjisi ilə davam etdirir. Deyir ki, Neftvurma sahəsinin işıqlandırma və güc sistemi yenidən qurulmuşdur. Yeni 6/0,4 kv-luq paylayıcı qurğu quraşdırılaraq istifadəyə verilmişdir. Ərazidə altı ədəd yeni elektrik dayaqları quraşdırılmış, işıqlandırma sistemi tam yenilənmişdir. Hava naqilləri yeraltı kabellərlə əvəz edilmiş, istehsalat estetikasının tələblərinə uyğun olaraq dirəklər rənglənmişdir.

Əlibala İbrahimov sahədə energetika üzrə görülən işlərdən bəhs edərkən deyir ki, bundan başqa neftvurma nasosunun yeni işəburaxma qurğusu da quraşdırılıb. İstismarda olan iki ədəd NB-125 tipli laya su vurmaq üçün nəzərdə tutulan nasosa yeni elektrik xətti çəkilərək onlar da istifadəyə verilmişdir. Bu işlərin yerinə yetirilməsində mühəndis Nəriman Muradov, elektrik montyorları Balakərim Əliməmmədov, Maqsud Cəfərov kimi işçilərin mühüm rolu olmuşdur.

“Siyəzənneft” NQÇİ-nin elektrik təsərrüfatında 2009-cu ildə və 2010-cu ilin I rübündə görülən işlər haqqında söhbətini davam etdirən Əlibala İbrahimov vurğulayır ki, NQÇİ-nin elektrik təchizatı sxemi 1949-1950-ci illərdən istismardadır. Bütün bu illər ərzində aparılmış qazma işlərinə uyğun olaraq neft təsərrüfatı inkişaf edərək 100 kilometrdən artıq məsafəni əhatə etmişdir. Neft təsərrüfatının yerləşməsinə uyğun olaraq bir sıra yarımstansiyalar, paylayıcı qurğular, elektrik hava xətləri və digər energetik qurğular tikilib istifadəyə verilmişdir.

Hal-hazırda “Siyəzənneft” NQÇİ-nin balansında 3 ədəd 35/6 kv, 65 ədəd 6/0,4 kv-luq yarımstansiya və paylayıcı qurğular, 438 km elektrik hava xətləri,1000 ədədə qədər müxtəlif güclü elektrik mühərrikləri, 113 ədəd güc transformatorları və digər elektrik qurğuları mövcuddur ki, bütün bunlar vasitəsilə idarənin bütün sex və sahələrinin, eləcə də digər obyektlərin enerji təminatı həyata keçirilir.

2009-cu ildə “Siyəzənneft” NQÇİ-nin elektrik enerjisi təminatı sahəsində energetik təsərrüfatın mütəmadi olaraq texniki vəziyyətinin yoxlanılması, elektrik təsərrüfatında tərtib edilmiş illik profilaktik təmir qrafiklərinin vaxtlı-vaxtında yerinə yetirilməsi təmin edilmişdir.

Müəssisədə istismar olunan elektrik avadanlıqlarının işini və obyektləri fasiləsiz elektrik enerjisi ilə təmin etmək məqsədilə bir sıra təmir işləri həyata keçirilmişdir. 2009-cu ildə 51 ədəd mühərrik, 2 ədəd güc transformatoru və digər elektrik maşın və avadanlıqları, eləcə də 6 km-ə yaxın 0,4 və 6 kv-luq elektrik hava xətləri əsaslı təmir olunmuşdur. Əlibala İbrahimov qeyd edir ki, öz qüvvəmizlə 70 ədəd gücü 11 kvt-a qədər olan eiektrik mühərriki təmir olunub. “Siyəzənneft” NQÇİ-nin elektrik təchizatı obyektiərində elektrik avadanlıqlarının, rele mühafizəsi və avtomatika sistemlərinin , ölçü cihazlarının quraşdırılması, təmiri, sazlanması və digər təmir işlərini yerinə yetirmək üçün “AEEK” MMC ilə müqavilə bağlanmış və nəzərdə tutulmuş işlər yüksək səviyyədə yerinə yetirilmişdir.

İdarənin balansında olan 14 km 35 kv-luq , 30 km 6 kv-luq , 28 km 0,4 kv-luq elektrik hava xətti meşə massivindən və dağlıq ərazilərdən keçməsinə baxmayaraq təhlükəsiz istismarı üçün bütün işlər görülür. Cari ildə 12 ədəd 6/0,4 kv-luq paylayıcı qurğunun dam örtüyü təmir olunmuşdur.

2009-cu ildə idarə üzrə 27.988 min kvt.saat elektrik enerjisi sərf olunmuşdur ki, bu da əvvəlki ilə nisbətən 1020 min kvt.saat qənaət deməkdir. 1 ton neft hasilatına sərf olunan elektrik enerjisi norması 2009-cu ildə 268,56 kvt.saat olmuşdur.

Baş energetik deyir ki. 2010-cu ilin I rübündə də idarənin elektrik enerji təminatı sahəsində bir çox işlər görülmüşdür. I rübdə idarə üzrə elektrik enerjisi sərfi 7087 min kvt.saat olmuşdur. Ötən ilin müvafiq dövründə bu rəqəm 7489 min kvt.saat təşkil etmişdi. 422 min kvt.saat elektrik enerjisinə qənaət edilmişdir. l ton neft hasilatına 291,85 kvt.saat elektrik enerjisi sərf olunduğu halda bu rəqəm ötən ilin müvafiq dövründə 302,0 kvt.saat idi.

Bundan sonra da “Siyəzənneft” NQÇİ-nin sex və sahələrini fasiləsiz və etibarlı elektrik enerjisi ilə təminatını yaxşılaşdırmaq üçün bir sıra işlərin görülməsi nəzərdə tutulmuşdur. Belə ki, 2010-cu ildə elektrik enerjisinə qənaət etmək məqsədilə texniki-təşkilati tədbirlər planı tərtib olunmuş və onun həyata keçirilməsi üçün kollektiv var qüvvə ilə çalışır.

İlqar Məmmədli,

Orxan Vahidoğlu

İki sahil.- 2010.- 27 aprel.- S. 13.