Mehriban xanım Əliyeva: Mən humanizm tərəfdarıyam və mənim üçün insan həyatı hər şeydən üstündür

Bu gün Azərbaycanın birinci xanımı, Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın ad günüdür

Azərbaycanın birinci xanımı çox ağıllı və çox gözəl olmaqla bərabər, hər işdə uğurlu nəticə əldə etməyi bacarır. Onun rəhbərlik etdiyi Heydər Əliyev Fondu ölkənin sosial inkişafının ən mühüm vasitələrindən birinə çevrilmişdir. O, yeganə qadındır ki, həm YUNESKO-nun, həm də İSESKO-nun (İslam Ölkələrinin Təhsil, Elm və Mədəniyyət Təşkilatı) xoşməramlı səfiridir.

7 ildir ki, dünya Azərbaycanın birinci xanımı Mehriban Əliyevanı məhz belə tanıyır.

Müxbirlərin “Birinci xanım olmaq çətindirmi” sualına Mehriban xanımın cavabı belə olmuşdur: “Ölkə Prezidentinin xanımı olmaq məsuliyyətli və çətindir. Sən yalnız özünü və ailəni yox, həm də ölkəni təmsil edirsən. Xoşbəxtlikdən, mən hələ uşaqlıqdan qarşıma sərt tələblər qoymuşam, həmişə valideynlərimə, ailəmə layiq olmağa çalışmışam. Bu gün eyni məsuliyyəti öz üzərimdə ikiqat hiss edirəm.”

Görmək, duymaq çətin deyil ki, Mehriban xanım Əliyevanın dərindən hiss etdiyi məsuliyyət Prezident İlham Əliyevin Azərbaycanın daha da tərəqqisi naminə göstərdiyi siyasi fəaliyyəti tamamlayır, zənginləşdirir, bu fəaliyyətə bütövlük və əzəmət bəxş edir.

Qərb dövlətlərinin birinci xanımlarının öz ölkələrinin ictimai həyatında göstərdikləri xeyirxah, humanitar fəaliyyət barədə çoxlu sayda fakt məlumdur. Lakin inkaredilməz həqiqətdir: Azərbaycanın birinci xanımı Mehriban Əliyevanın son 7 ildə xalqımızın sosial həyatında yaratdığı yeniliklər, xüsusilə təhsil, səhiyyə, mədəniyyət və digər sahələrdə gördüyü işlərin həcmi istənilən ölkə ilə müqayisədə qat-qat üstündür.

Mehriban xanım Əliyevanın dediklərindən:

“Həyatda hər kəsin yerini və taleyini tarix özü müəyyən edir.”

O, Heydər Əliyev Fondunun prezidenti, millət vəkili, YUNESKO və İSESKO-nun xoşməramlı səfiri kimi ağır və məsuliyyətli vəzifələri xalqına yüksək səviyyədə xidmət etmək üçün bir vasitə hesab edir. Mehriban xanımın adı çəkiləndə, ilk növbədə, onu cəmiyyətimizin sabahı olan uşaqlar arasında göz önünə gətiririk. İnsanda xoş hisslər oyadan ən təsirli səhnə-qucağında tutduğu uşağa ana nəvazişi göstərən gənc bir qadın...Yenicə ayaq tutub yeriyən fidan balaların əhatəsində olan bu qadın qucağındakı uşağı yerə qoyub əlini ona uzadan başqa bir körpəni götürür. Uşaq ona, o da uşağa sarılır... Belə təsirli anları son illər dəfələrlə görmüşük. Uşağa məhəbbət - xalqa, millətə, Vətənə məhəbbətdir.

Mehriban xanım Əliyevanın uşaqlara, xüsusilə valideyn himayəsindən məhrum olan uşaqlara qayğı göstərdiyini görəndə bu alicənablığın, humanistliyin və mərhəmət hissinin haradan qaynaqlandığı aydın başa düşülür.

2003-cü ilin prezident seçkilərindən çox keçməmiş Azərbaycanın uşaq dünyasına mehriban bir baxış xalq arasında xoş hisslər oyatdı. Ən çox diqqətçəkən o idi ki, insanlar Mehriban xanımın uşaq evlərinə, internat məktəblərinə getməsini, xəstə övladlarını müalicə etdirmək üçün vəsait tapa bilməyən ailələrə köməyini, ən ucqar rayonlarda da yeni məktəb binaları, səhiyyə, mədəniyyət ocaqları tikdirməsini, köhnə binaları bərpa etdirməsini məhz insanpərvərlik və mərhəmət hisslərinə söykənən xeyriyyəçilik kimi dəyərləndirərək, bu fəaliyyəti yüksək qiymətləndirirdilər.

Azərbaycan mədəniyyətini, incəsənətini, tarixi memarlıq abidələrini dünya miqyasında tanıtdığına, ölkəmizin milli dəyərlərini Avropaya qovuşdurduğuna görə Mehriban xanıma 2004-cü ilin sentyabrında Parisdə YUNESKO-nun xoşməramlı səfiri adı verildi.

Daha sonra o, Türkiyədə və Azərbaycanda keçirilmiş rəy sorğularına əsasən, “İlin qadını” elan edildi.

Sonrakı illər Mehriban xanımın titullarının, fəxri adlarının sırasını zənginləşdirdi. “Yeniləşən Azərbaycana yeni məktəb”, “Uşaq evləri və internat məktəblərin inkişafı”, “Diabetli uşaqlara daha çox qayğı”, “Talassemiyasız həyat naminə” proqramları hazırlanıb icrasına başlandı. Məcburi köçkün uşaqlarının təhsili, müalicəsi təşkil olundu, Azərbaycan uşaqlarının bir çox problemləri beynəlxalq təşkilatların, o cümlədən YUNİSEF-in diqqətinə çatdırıldı.

2005-ci ildə Mehriban xanım əbədi minnətdarlıqla xatırlanacaq bir xeyriyyə əməlini həyata keçirdi. Bilgəh qəsəbəsindəki internat məktəbdə boya-başa çatmış gənclərin toy mərasimini keçirməsi bu nəcib qəlbli qadına ümumxalq məhəbbətini qat-qat artırdı.

Mehriban xanım Əliyevanın dediklərindən:

“Xalqımızın taleyüklü problemlərinin həllinə yardımçı olmaqdan qürur duyuram.”

2004-cü il mayın 4-də fəaliyyətə başlayan Heydər Əliyev Fondunun əsas məqsədi ulu öndərin həyat və fəaliyyətinin, elmi-nəzəri irsinin, azərbaycançılıq ideologiyasının öyrənilməsi, təbliği, gələcək nəsillərə çatdırılması yolunda üzərinə götürdüyü şərəfli missiyanı uğurla həyata keçirməkdir. Fondun prezidenti Mehriban xanım Əliyevanın təşəbbüsü ilə son 6 ildə uşaqların təhsili, sağlamlığı, uşaq evləri və internatların keyfiyyətli qida məhsulları ilə təminatı, uşaqlar üçün yay istirahət düşərgələrinin təşkili, yeni tədris müəssisələrinin tikilməsi, müalicəyə ehtiyacı olan ağır xəstə uşaqların xarici ölkələrə göndərilməsi, uşaqlar üçün yeni il və Novruz bayramları şənliklərinin keçirilməsi təmin olunmuşdur. Bundan başqa, 3 minə qədər insana yardım göstərilmişdir ki, onların çoxu ürək xəstəliklərindən əziyyət çəkən azyaşlılardır.

Bakının Əzizbəyov (indi Xəzər adlanır) rayonunun Mərdəkan qəsəbəsindəki kütləvi kitabxananın əsaslı şəkildə yenidən qurulması, Pir Həsən ziyarətgahının və Hacı Zeynalabdin Tağıyevin məzarının bərpa edilməsi Mehriban xanımın adı ilə bağlıdır.

Şüvəlan qəsəbəsində Mir Mövsüm Ağa ziyarətgahını vaxtaşırı ziyarət edən Mehriban xanım bu müqəddəs ocağa üzərində Quran ayələri olan xalça hədiyyə etmişdir.

Gəncə şəhərində köhnə məscid binalarının, eləcə də İmamzadə adlanan ziyarətgahın əsaslı şəkildə yenidən qurulması Mehriban xanım Əliyevanın təşəbbüsü ilə mümkün olmuşdur.

Təhsilin, səhiyyənin, mədəniyyətin inkişafında, azərbaycançılıq məfkurəsinin təbliğində Heydər Əliyev Fondunun misilsiz xidmətləri təkcə ölkəmizdə deyil, xarici ölkələrdə də yüksək qiymətləndirilir. Bu mənada, “Qarabağ həqiqətləri” silsilə nəşrlərinin ingilis, rus, alman, ərəb, fransız dillərində çap olunaraq xarici ölkələrdəki Azərbaycan səfirliklərinə və diaspor təşkilatlarına göndərilməsi ölkəmizin əsas problemlərinin dünyaya yayılmasında müstəsna rol oynayır.

Mehriban xanım Əliyevanın dediklərindən:

“Mən humanizm tərəfdarıyam və mənim üçün insan həyatı hər şeydən üstündür.”

Heydər Əliyev Fondunun prezidenti, Milli Məclisin deputatı Mehriban xanım Əliyeva ötən il Novruz bayramı münasibətilə amnistiya elan edilməsi təklifi ilə parlamentə müraciət etmişdi. Mehriban xanımın təklifi ilə qəbul olunmuş amnistiya 9 min məhbusa şamil olundu. Xatırladaq ki, 2007-ci ildə də məhz onun təşəbbüsü ilə amnistiya haqqında qərar qəbul edilmiş, 1500-dən çox məhbus cəzaçəkmə müəssisələrindən azad edilərək cəmiyyətə qovuşmuşdu.

Ümumiyyətlə, Azərbaycanın birinci xanımı, millət vəkili Mehriban Əliyevanın ictimai fəaliyyətinin humanizmə və xeyirxahlığa kökləndiyi aydın nəzərə çarpır. Rəhbəri olduğu Heydər Əliyev Fondu müxtəlif problemləri olan minlərlə ailənin ümid yerinə çevrilmişdir.

Yazının əvvəlinə qayıdıb qeyd edək ki, Qərb ölkələrində dövlət başçılarının xanımlarının xeyirxahlıq missiyaları barədə çoxsaylı faktlar olsa da, Azərbaycanda birinci xanım institutu 7 ildir fəaliyyət göstərir. Lakin bu müddətdə Azərbaycanın birinci xanımı Mehriban Əliyevanın göstərdiyi fəaliyyət dünyada heyranlıqla izlənir, bu fəaliyyət xarici ölkələrə nümunə, örnək kimi göstərilir.

“Siz indiyə qədər gördüyünüz işlərlə artıq millət vəkili adını qazanmısınız”- bu sözlər 2005-ci ildə keçirilmiş parlament seçkiləri ərəfəsində Əzizbəyov (indiki Xəzər) rayonundan namizədliyini irəli sürmüş Mehriban xanım Əliyeva ilə seçicilərin görüşündə dönə-dönə səslənirdi. Seçicilərin çox böyük səs çoxluğu ilə Milli Məclisə deputat seçilmiş Mehriban xanım Əliyeva qısa müddətdə səmərəli fəaliyyəti ilə həqiqətən xalq elçisi- millət vəkili olduğunu sübuta yetirdi. Mərdəkan, Şüvəlan, Binə, Buzovna, Türkan, Zirə, Pirallahı qəsəbələrində, digər yaşayış massivlərində əhalinin yol, su, qaz, nəqliyyat problemləri həll olundu, rayonda böyük həcmdə tikinti, abadlıq, quruculuq, yaşıllaşdırma işləri aparıldı.

Prezident İlham Əliyevin sərəncamı ilə 2009-cu ilin Azərbaycanda “Uşaq ili” elan olunması Mehriban xanım Əliyevanın rəhbərlik etdiyi Heydər Əliyev Fondunun xeyirxahlıq təşəbbüslərinin genişləndirilməsinə böyük təkan verdi. Mehriban xanımın “Hər bir uşağın ailəyə ehtiyacı var” təşəbbüsü əhali tərəfindən təqdir olundu. Tezliklə onun icrasına başlanması və bu gün də uğurla davam etdirilməsi kimsəsiz və valideyn himayəsindən məhrum olmuş uşaqların fiziki və mənəvi cəhətdən sağlam böyümələri üçün stimula çevrildi.

Ötən il Azərbaycanın birinci xanımı Mehriban Əliyeva “XXI əsrin böyük qadını” fəxri tituluna layiq görüldü. Bu yüksək ad ona yaratdığı Azərbaycan Mədəniyyət Fondunun beynəlxalq miqyasda fəaliyyətinə görə verilmişdir.

“Muğam sənəti Azərbaycanın Milli sərvəti olmaqla yanaşı, eyni zamanda dünya musiqi xəzinəsinin incisidir”- bu fikirlər də Heydər Əliyev Fondunun prezidenti, millət vəkili Mehriban xanım Əliyevaya məxsusdur. Məhz onun təşəbbüsü ilə muğamlarımız dünya qeyri-maddi irs siyahısına daxil edilmiş, “Azərbaycan muğamı” və “Muğam aləmi” topluları nəşr edilmiş, Bakıda dünyada yeganə olan Beynəlxalq Muğam Mərkəzi yaradılmışdır.

Mehriban xanımın təşəbbüsü ilə 2011-ci ildə Bakıda Beynəlxalq Muğam Festivalı keçiriləcək.

Heydər Əliyev Fondunun prezidenti Mehriban xanım Əliyevanın beynəlxalq miqyaslı fəaliyyətinə dair çoxsaylı faktlardan biri: Pakistanda qəzalı vəziyyətdə olan bir məktəb fondun hesabına yenidən qurularaq istifadəyə verilmişdir.

Son illər Heydər Əliyev Fondunun dəstəyi, bu təşkilatın rəhbəri Mehriban xanım Əliyevanın təşəbbüsü ilə Azərbaycanda bir sıra beynəlxalq idman yarışları, musiqi festivalları keçirilməsi ənənəyə çevrilib. Bu il iyulun sonu-avqustun əvvəllərində Qəbələdə keçirilmiş ikinci beynəlxalq musiqi festivalı Azərbaycanın sorağını dünyaya yaydı. Açılış mərasimində iştirak edən YUNESKO-nun baş direktoru İrina Bokova Mehriban xanım Əliyevaya müraciətilə demişdir: “Sizi xoşməramlı səfirlər sırasında görmək bizim üçün, YUNESKO üçün şərəfdir. Siz YUNESKO-nun humanist dəyərlərinin bayraqdarısınız.”

Azərbaycanın birinci xanımı, Heydər Əliyev Fondunun prezidenti, millət vəkili, YUNESKO və İSESKO-nun xoşməramlı səfiri Mehriban Əliyeva artıq nəinki Azərbaycanda və regionda, hətta beynəlxalq miqyasda tanınır və sevilir. Bu ehtiramı, bu sevgini o, insanlara sevgisi, qayğısı ilə qazanmışdır.

Ötən ilin mart ayında İTAR-TASS müxbirinin Mehriban xanıma verdiyi “Nəyi özünüzün ən böyük uğuru hesab edirsiniz” sualına məhz belə cavabı almışdır: “Həyatda əsas uğurum üç təmiz, ləyaqətli və xeyirxah insan tərbiyə etməyimdir. İndi onlar artıq böyüyüblər və mən inamla deyə bilərəm ki, bu məhz belədir.”

Bu sözlərin deyildiyi vaxtdan ötən bir il ərzində çox şey dəyişib. Dəyişməyən isə Mehriban xanım Əliyevanın rəhbərlik etdiyi Heydər Əliyev Fondunun Azərbaycan naminə, xalqımızın problemlərinin həlli naminə göstərdiyi fəaliyyətdir. “İstər xoşməramlı səfir, istər millət vəkili, istərsə də Heydər Əliyev Fondunun prezidenti kimi mənə ehtiyac olduğunu hiss edirəm. Mənim adıma hər gün 200-dən çox məktub gəlir. Mən konkret iş görmək, insanlara kömək etmək istəyirəm”-Azərbaycanın birinci xanımı belə deyir, öz fəaliyyəti ilə insanlara sevinc, xoşbəxtlik bəxş edir.

Telman Qafar

İki sahil.- 2010.- 26 avqust.- S.3;5.