Tarix yaradan lider

Qaradağda ulu öndər Heydər Əliyevin anım günü münasibətilə konfrans keçirildi

Dünən YAP Qaradağ rayon təşkilatı ilə Qaradağ Rayon İcra Hakimiyyətinin birgə təşkilatçılığı ilə ümummilli lider Heydər Əliyevin anım gününə həsr edilmiş “Heydər Əliyev siyasəti Azərbaycanda əbədi yaşayacaqdır” adlı konfrans keçirildi.

Konfrans iştirakçıları öncə ümummilli liderin Lökbatan qəsəbəsindəki heykəli önünə əklil və gül dəstələri qoydular. Sonra Heydər Əliyev muzeyində ümummilli liderin həyat və fəaliyyətinə həsr olunmuş fotosərgi ilə tanışlıq oldu.

Lökbatan mədəniyyət evində davam etdirilən konfransda ulu öndərin xatirəsi bir dəqiqəlik sükutla yad edildi. Tədbiri giriş sözü ilə açan Qaradağ Rayon İcra Hakimiyyətinin başçısı Süleyman Mikayılov bildirdi ki, ümummilli lider Heydər Əliyev məqsədyönlü və düşünülmüş siyasəti ilə Azərbaycanı dünyada bir dövlət kimi tanıtdı , qüdrətli bir ölkəyə çevirdi. Sonrakı illərdə məhz onun daxili və xarici siyasətinin vəhdətliyi ölkənin tərəqqisinə geniş imkanlar yaratdı. Ulu öndər Heydər Əliyev Azərbaycanı sabitlik diyarına çevirməklə iqtisadi, siyasi, xarici siyasət sahəsində mühüm uğurların əldə olunmasına zəmin yaratdı.

Ümummilli lider Heydər Əliyev köhnə iqtidardan miras qalmış problemlərin həlli üçün atəşkəsə nail olmağın vacibliyini bəyan etdi. Belə ki, 1994-cü ilin mayın 12-də atəşkəsin əldə olunması ilə bütün sahələrdə inkişafın əsası qoyuldu. Azərbaycan bu addımı ilə eyni zamanda, sülh siyasətinə sadiqliyini də dünyaya nümayiş etdirdi. Məhz bu gün həmin siyasətin Prezident İlham Əliyev tərəfindən uğurla davam etdirilməsinin nəticəsidir ki, Azərbaycan dövləti iqtisadi nailiyyətlərinə görə, nəinki bölgənin, hətta Avropanın inkişaf etmiş ölkələri sırasına çıxmışdır.

Konfransda çıxış edən YAP Qaradağ rayon təşkilatının sədri, YAP Siyasi Şurasının üzvü Aydın Hüseynov bildirdi ki, ulu öndərin keçdiyi ömür yolu hər bir azərbaycanlı üçün fəxrdir. Belə bir dahinin siyasi fəaliyyətinin şah əsəri inkişaf edən, dünyaya yeni-yeni iqtisadi möcüzələr bəxş edən qüdrətli Azərbaycandır.

YAP sədrinin müavini, icra katibi, millət vəkili Əli Əhmədov qeyd etdi ki, Azərbaycan dövlətinin ilk müstəqillik illərində ölkədə baş verən xaos, qarşıdurma və hərc-mərclik onun süqutunu yaxınlaşdırırdı. Belə bir vaxtda hər bir azərbaycanlı Heydər Əliyevə öz xilaskarı kimi baxırdı və onun ölkəyə rəhbərliyə qayıtmasını təkidlə tələb edirdi. Məhz onun ölkəmizə rəhbərliyə qayıdışından sonra qısa müddətdə atəşkəs elan olundu, yeni nizami ordu quruculuğu, iqtisadi dirçəliş mərhələsi, xüsusən, neft strategiyası uğurla həyata keçirilməyə, torpaqların kəndlilərə verilməsinə başlandı. Məhz onun hakimiyyəti illərində qüdrətli Azərbaycanın iqtisadi, siyasi və sosial təməlləri qoyuldu.

Bu gün bu təməllər üzərində Prezident İlham Əliyev Azərbaycanı daha da qüdrətləndirir. Eyni zamanda insanlarımızın sosial rifah halı ilbəil yaxşılaşır, yeni təhsil, səhiyyə ocaqları tikilir, körpülər, yollar salınır. Bir sözlə, dövlət xalqın rifahını yüksəldə biləcək ən qlobal proqramları uğurla həyata keçirir.

Əli Əhmədov ulu öndərin siyasi fəaliyyətinin bir çox istiqamətlərindən danışaraq dedi ki, onun hakimiyyətə qayıdışından sonra əsas diqqət göstərdiyi məsələlərdən biri məhz Azərbaycanın ətrafında yaradılan informasiya blokadasını yarmaq idi. O buna tədricən, cəsarətlə və öz müdrik siyasi fəaliyyəti ilə nail oldu. Hər bir ölkəyə səfərində Azərbaycan həqiqətləri barədə dolğun məlumatlar verir, dünya ictimaiyyətini erməni yalanlarına uymamağa, hadisələri olduğu kimi qəbul edib, düzgün qiymətləndirməyə çağırırdı. Azərbaycan dünyanın nüfuzlu təşkilatlarına üzv qəbul olunmaqla həqiqətlərini beynəlxalq aləmə çatdırmaq üçün növbəti tribunalar qazanırdı.

Ulu öndər Heydər Əliyevin hakimiyyətə qayıdışından sonra ilk görüşü ölkə ziyalıları ilə oldu. Onların qarşısında bir sıra həllivacib məsələlər qoyan ümummilli lider tarixin saxtalaşdırılmasına yol verməməyi tələb etdi. Tariximizi özündə əks etdirən kitabların nəşri, onların müxtəlif dillərə tərcümə olunaraq, beynəlxalq ictimaiyyətə çatdırılması qarşıya ümdə vəzifə kimi qoyuldu.

Bu gün Azərbaycanın yüzlərlə ölkə ilə diplomatik və ticari əlaqələri mövcuddur. 40-dan artıq beynəlxalq təşkilatda təmsil olunuruq. 50-dən artıq ölkədə səfirliyimiz, eyni zamanda beynəlxalq təşkilatların tərkibində Azərbaycan nümayəndəliyi fəaliyyət göstərir. Təbii ki, bu kimi addımlar Azərbaycan həqiqətlərinin dünya ictimaiyyətinə çatdırılması üçün olduqca əhəmiyyətlidir.

YAP fəallarından Qaradağ Uşaq sanatoriyasının müdiri Təranə İsmayılova çıxış edərək bildirdi ki, məhz ulu öndərin siyasi fəaliyyəti ilə Azərbaycan dünya birliyində özünə layiqli yer tutmaqla əsl söz sahibinə çevrildi. “Əsrin müqaviləsi”nin imzalanması zamanı bütün təzyiqlərə baxmayaraq, ulu öndər Heydər Əliyev Bakı-Tbilisi-Ceyhan marşrutunu irəli sürüb, bu qərarın dəyişməz olduğunu bildirməklə Azərbaycanın siyasətində müstəqil olduğunu bir daha dünya dövlətlərinə bəyan etdi.

Ulu öndər Heydər Əliyev dünyanın müxtəlif ölkələrinə səpələnmiş soydaşlarımızı bir amal, məqsəd uğrunda birliyə çağırdı. Hələ 1991-ci il dekabrın 16-da Nax.MR Ali Soveti “Dünya azərbaycanlılarının həmrəyliyi günü” ilə bağlı qərar qəbul etdi. Həmin sənədə əsasən hər il dekabrın 31-i Dünya azərbaycanlılarının həmrəylik günü kimi qeyd olunur. Ulu öndərin hakimiyyətə qayıdışından sonra diaspor quruculuğu dövlətin həyata keçirdiyi siyasətin əsas tərkib hissələrindən birinə çevrildi.

Bu gün harada yaşamasından asılı olmayaraq, hər bir azərbaycanlı bu ölkənin vətəndaşı olmaqdan böyük qürur duyur. Əsası ulu öndər Heydər Əliyev tərəfindən qoyulan düşünülmüş və məqsədyönlü siyasəti Prezident İlham Əliyevin uğurla davam etdirməsi Azərbaycanın gələcəyinə inamı daha da artırır, ölkəmiz bütün sahələrdə inamla irəliləyərək, dünya birliyində mövqelərini möhkəmləndirir.

Elçin Zaman

İki sahil.- 2010.- 10 dekabr.- S. 3.