HEYDƏR ƏLİYEV AZƏRBAYCANDA MİLLİ BİRLİYİMİZİN YARADICISIDIR

Dünən YAP Gəncə şəhər təşkilatında Gəncə şəhər İcra Hakimiyyəti və şəhər təşkilatının birgə Tədbirlər Planına uyğun olaraq, 15 iyun-Milli Qurtuluş gününə həsr olunmuş “Heydər Əliyev milli birliyimizin yaradıcısıdır” mövzusunda elmi-praktik konfrans keçirilmişdir. Konfransda YAP Gəncə şəhər təşkilatının İdarə Heyətinin və Şurasının üzvləri, İcra Hakimiyyətinin məsul işçiləri, partiya fəalları və ziyalılar iştirak etmişlər.

Tədbir iştirakçıları ilk öncə Gəncənin baş meydanına gələrək, ulu öndər Heydər Əliyevin əzəmətli abidəsini böyük ehtiram və hörmətlə yad etmiş, abidə önünə gül-çiçək dəstələri qoymuşlar.

Elmi-praktik konfransı YAP Gəncə şəhər təşkilatının sədri, professor İsrafil İsmayılov açmışdır. Dahi şəxsiyyət Heydər Əliyevin əziz xatirəsi bir dəqiqəlik sükutla yad edilmişdir. Şəhər təşkilatının sədri tədbir iştirakçılarını 15 iyun - Milli Qurtuluş günü münasibətilə təbrik etmiş, müstəqil Azərbaycanın tərəqqisi və inkişafı yolunda onlara siyasi fəaliyyətlərində uğurlar arzulamışdır. O, Milli Qurtuluş gününün ölkəmizin tarixində mühüm əhəmiyyət kəsb etdiyini açıqlamış və yaddaşımıza həkk olunan 1993-cü ilin iyun hadisələrini, yaranmış ictimai-siyasi vəziyyəti geniş təhlil etmişdir. “15 iyun - Azərbaycanın Milli Qurtuluş tarixi Cənubi Qafqazda sülhün, sabitliyin təmin olunmasında Heydər Əliyev mərhələsinin başlanğıcıdır” adlı məruzəsində bildirmişdir ki, həmin dövrdə dövlətçiliyimizin başı üzərini almış fəlakəti xalqımızın təkidli tələbi ilə respublika rəhbərliyinə yenidən qayıdan ulu öndər Heydər Əliyev aradan qaldırdı. Onun təcrübəsi, qətiyyəti, cəsarəti, uzaqgörənliyi, sayəsində xalqımız düşdüyü bəlalardan xilas olaraq sabitliyə, əmin-amanlığa qovuşdu, demokratik prinsiplərə əsaslanan dövlət quruculuğuna başladı. Dahi Heydər Əliyevin zəngin dühası və qüdrəti ilə müstəqil Azərbaycan siyasi, ictimai, iqtisadi, mədəni həyatın bütün sahələrində irəliləyişlərə nail oldu. Bu gün ümummilli liderin layiqli davamçısı cənab İlham Əliyevin rəhbərlik etdiyi Azərbaycan demokratiyanın ardıcıllıqla bərqərar olduğu, insan haqlarının qorunduğu, iqtisadi inkişafın ən yüksək səviyyəsi ilə lider mövqeyi qazanan bir ölkədir.

Gəncə şəhər İcra Hakimiyyəti başçısının müavini Akif Ələkbərov məruzə ilə çıxış edərək bildirdi ki, Heydər Əliyev Azərbaycanda sabitliyin və inkişafın davamlı olmasını təmin edən alternativsiz siyasi kursun memarıdır. Bu siyasi kurs indi ümummilli liderimizin layiqli davamçısı cənab İlham Əliyev tərəfindən uğurla həyata keçirilməkdədir.

ADAU-nun dosenti, əməkdar müəllim Məleykə Əlizadə “Heydər Əliyevin siyasi hakimiyyətə qayıdışı: gerçəklik və tarixi zərurət” mövzusunda məruzə edərək bildirdi ki, bir-birinin ardınca beynəlxalq təşkilatlara üzv olan Azərbaycan öz Liderinin birbaşa rəhbərliyi ilə əsaslı iqtisadi, siyasi, hüquqi, sosial islahatların həyata keçirilməsi nəticəsində günü-gündən gücləndi.

GDU-nun baş müəllimi, əməkdar müəllim Mübariz Əliyev “15 iyun -Milli Qurtuluş günü müstəqil Azərbaycanın dövlətçilik tarixində yeni mərhələdir” mövzusunda çıxış edərək bildirdi ki, Heydər Əliyev Azərbaycan xalqına böyük maddi və mənəvi dəyərlər qoyub getmişdir. Onun ən qiymətli töhfəsi müstəqil Azərbaycan dövlətidir.

GDU-nun baş müəllimi Cavid Bağırzadə “Heydər Əliyev Azərbaycanda milli birliyin yaradıcısıdır” mövzusunda məruzəsində vurğuladı ki, Heydər Əliyev hakimiyyətə qayıdışından sonra tarixən özünün formalaşdırdığı azərbaycançılıq ideyalarının bərqərar olması üçün yaranmış reallığa biganə qala bilməzdi. O, dövlətçiliyin qorunub saxlanılmasında ilkin addım olan milli birlik, həmrəylik və mütəşəkkillik ideyalarının həyata keçməsi imkanlarını reallaşdırdı.

GDU-nun baş müəllimi Hüseyn Bəxtiyarov “15 iyun- Milli Qurtuluş gününün Azərbaycanın müasir tarixində siyasi əhəmiyyəti” mövzusunda çıxış edərək, Milli Qurtuluş gününün hər il qeyd edilməsinin mühüm əhəmiyyət daşıdığını, yeni nəslin vətənpərvər ruhda yetişdirilməsində əvəzsiz rol oynadığını diqqətə çatdırdı. Qeyd etdi ki, bu günün tarixini bilmək, onun elmi-praktiki əhəmiyyətini dərk etmək son dərəcə vacibdir. Çünki müstəqil dövlətçiliyimizin qorunması və inkişaf etdirilməsi kimi mühüm vəzifə gənc nəslin üzərinə düşür.

Tədbirin sonunda YAP sıralarına qəbul edilmiş bir qrup fəala partiya vəsiqələri təqdim edilmişdir.

Süsən Tağıyeva

İki sahil.- 2010.- 11 iyun.- S.4.