Lahıc, Nic və Qırmızı qəsəbənin YUNESKO-nun siyahısına salınması istiqamətində işlər aparılır

Hazırda Azərbaycan xalça sənətinin də 2010-cu ildə bu siyahıya daxil edilməsi ilə əlaqədar müvafiq işlər aparılır

Azərbaycan mədəniyyətinin və ölkəmizdə tarixən mövcud olan tolerant mühitin beynəlxalq səviyyədə təbliği üçün Lahıc, Nic və Qırmızı qəsəbənin “Mədəniyyət məkanı” adı ilə YUNESKO-nun Bəşəriyyətin qeyri-maddi mədəni irsinin reprezentativ siyahısına daxil edilməsi məqsədilə müvafiq istiqamətdə işlərə start verilib.

Lent.az-ın Mədəniyyət Nazirliyinin rəsmi saytına istinadən verdiyi məlumata görə, Mədəniyyət və Turizm Nazirliyinin müvafiq əmrinə əsasən namizədlik fayllarının hazırlanması məqsədilə Azərbaycan Milli Elmlər Akademiyasının ekspertləri, eyni zamanda videoçarxların hazırlanması üçün rejissor heyəti cəlb olunub. İşlərin cari ilin iyul ayının ortalarında tamamlanması nəzərdə tutulur.

Lahıc, Nic və Qırmızı qəsəbənin YUNESKO-nun Bəşəriyyətin qeyri-maddi mədəni irsinin reprezentativ siyahısına daxil edilməsi istiqamətində müvafiq işlərə başlanılması Azərbaycanın tolerant dövlət olmasını sübut edən siyasətə söykənir. Azərbaycan tarixən atəşpərəstlik, xristianlıq, İslam və yəhudi dinlərinə mənsub insanların, müxtəlif azlıq və yerli xalqların mehriban və qarşılıqlı anlaşma şəraitində yaşadığı bir ölkədir. Gələcəkdə digər Azərbaycan qəsəbə və kəndlərinin mədəniyyət məkanı kimi YUNESKO-ya təqdim edilməsi nəzərdə tutulur.

Azərbaycan Respublikası 2006-cı ildə qeyri-maddi mədəni irsin qorunması haqqında 17 oktyabr 2003-cü il tarixli Konvensiyaya qoşulub. 26 noyabr 2009-cu il tarixdə “Mədəni özünüifadə müxtəlifliyinin qorunması və təşviqi haqqında” Konvensiyanın təsdiq edilməsi barədə Azərbaycan Respublikasının Qanunu Azərbaycan Respublikasının Prezidenti İlham Əliyev tərəfindən təsdiq edilib, 15 may 2010-cu il tarixdən etibarən isə Azərbaycan Respublikasına münasibətdə qüvvəyə minib.

Qeyd edilən bütün tədbirlər, eyni zamanda Lahıc, Nic və Qırmızı qəsəbənin YUNESKO-nun Bəşəriyyətin qeyri-maddi mədəni irsinin reprezentativ siyahısına daxil edilməsi ilə bağlı aparılan müvafiq işlər sözügedən konvensiyaların həyata keçirilməsi istiqamətində mühüm rol oynayacaq.

Azərbaycan muğamı, Azərbaycan aşıq sənəti və Novruz bayramı (beynəlmiləl fayl kimi) YUNESKO-nun Bəşəriyyətin qeyri-maddi mədəni irsinin reprezentativ siyahısındadır. Hazırda Azərbaycan xalça sənətinin 2010-cu ildə bu siyahıya daxil edilməsi ilə əlaqədar müvafiq işlər aparılır.

İki sahil.- 2010.- 22 iyun.- S. 13.