Bir dön bizim Qəbələyə bax!..

Azərbaycanın sosial-iqtisadi inkişafı regionların timsalında aydın görünür

Prezident İlham Əliyev 3 gün əvvəl Azərbaycanın qədim şəhərlərindən olan Qəbələyə səfərində vurğuladı ki, bu rayon son illərdə ölkəmizin nail olduğu hərtərəfli inkişafa əyani nümunədir. Qəbələdə böyük miqyasda quruculuq, abadlıq işləri görülür, ən yüksək standartlara cavab verən istehsalat sahələri yaradılır, sosial-məişət, turizm, təhsil, səhiyyə, istirahət obyektlərinin geniş şəbəkəsi istifadəyə verilir.

Bütün uğurların təməlində ölkə rəhbərinin regionların həyatına göstərdiyi diqqət və qayğı dayanır. Məhz bunun nəticəsidir ki, 2009-cu ildə Qəbələ rayonunda ümumi məhsul istehsalı 6 il əvvəlki ilə müqayisədə təqribən 4 dəfə, sənaye istehsalı 21 dəfə, kənd təsərrüfatı məhsulları 2 dəfə artmışdır. 2003-2009-cu illərdə rayonda 6500-ə yaxını daimi olmaqla 8300-ə qədər yeni iş yerinin açılması rayonun sosial-iqtisadi inkişafına dair Dövlət proqramlarında qarşıya qoyulmuş vəzifələrin uğurla yerinə yetirildiyinin təsdiqidir. Dövlət başçısının qeyd etdiyi kimi, ən önəmlisi ondan ibarətdir ki, bu inkişaf təkcə statistik rəqəmlərlə ölçülmür, eyni zamanda, burada aparılan abadlıq, quruculuq işləri hər bir vətəndaşın gözləri önündə baş verir, bu inkişaf hər bir ailənin həyatında özünü aydın göstərir.

Prezident İlham Əliyevin açılışında iştirak etdiyi, qırmızı lentlərini kəsdiyi obyektlərin şəbəkəsinə diqqət yetirin: məcburi köçkünlər üçün hər cür şəraiti olan çoxmərtəbəli yaşayış binaları, piano fabriki, avtovağzal, kənd təsərrüfatı məhsullarını saxlamaq üçün soyuducu anbarlar, yeni mehmanxanalar, elektrik yarımstansiyası, uşaq bağçası, “Qafqaz-park” gənclik mərkəzi, “Fitnes-sağlamlıq” kompleksi... Hər biri dünya standartları səviyyəsində inşa edilmiş istehsal -sosial təyinatlı bu obyektlər Azərbaycanın ümumi inkişafının yüksək səviyyəsinin göstəricisidir. Bu, eyni zamanda, belə bir həqiqətin təsdiqidir ki, ölkəmizin inkişafına xarici və yerli investorlarda böyük inam vardır. Bu inam regionları, ümumilikdə ölkənin qeyri-neft sektorunu böyük inkişaf yoluna çıxarmışdır.

Prezident İlham Əliyevin Qəbələyə səfəri zamanı açılışını etdiyi obyektlərin hər biri təkcə yeni iş yerləri demək deyil, bu obyektlər həm də regionun, bütövlükdə ölkənin beynəlxalq turizm diyarlarından birinə çevrilməsinə imkan verir. Bununla bağlı dövlət başçısı bildirdi ki, Qəbələni müasir, gözəl turizm mərkəzinə çevirmək üçün əlavə tədbirlər hazırlanır.

Qəbələdə yenicə istifadəyə verilmiş sosial-məişət obyektlərinin hər biri haqqında geniş danışmağa, bu obyektlərin regionun həyatına hansı yenilikləri gətirəcəyini şərh etməyə ehtiyac görmürük. Bu yeniliklərin Qəbələnin, ümumən ölkəmizin beynəlxalq aləmə qovuşmasına, xarici ölkələrlə mədəni əlaqələrin intensivləşməsinə, istehsal olunmuş kənd və sənaye məhsullarının dünya bazarlarına çıxarılmasına, turizmin inkişafına güclü təkan verəcəyi şəksizdir.

Qəbələnin xəritəsinə daxil olmuş yeni ünvanların hər birinin böyük əhəmiyyəti olduğunu qeyd edən Prezident İlham Əliyev bu inkişafın bütövlükdə ölkə həyatının müəyyənedici amilinə çevrildiyini, əhalinin bütün təbəqələrinin, xüsusilə məcburi köçkünlərin yaşayış səviyyəsinin yaxşılaşdırılmasına yönəldiyini vurğuladı. “Artıq Azərbaycanda bir dənə də çadır şəhərciyi yoxdur” deyən Prezident Bakıda, bir sıra rayonlarda məcburi köçkünlər üçün çoxmərtəbəli evlər tikildiyini, bu sırada Qəbələdə də xeyli iş görüldüyünü bildirdi.

Rayon mərkəzində məcburi köçkünlər üçün tikilmiş iki çoxmərtəbəli binanın açılış mərasimində çıxış edən dövlət başçısı sakinləri təbrik etməklə yanaşı qeyd etdi: “Siz bu evlərdə rahat yaşayacaqsınız. Ancaq əsas məsələ ondan ibarətdir ki, siz öz doğma torpaqlarınıza qayıdasınız.”

İstər yerlərdə, istərsə də xarici ölkələrdəki hər bir çıxışında Prezident İlham Əliyev sülh danışıqlarında kompromisə gəlməkdən hər vəchlə yayınan Ermənistan rəhbərliyinin ünvanına sərt ittiham səsləndirir. Dövlət başçısı Qəbələdə bir daha Ermənistan rəhbərliyinin və dünya ictimaiyyətinin diqqətinə çatdırdı: “Biz bu vəziyyətlə barışa bilmərik. Status-kvo bizi qane etmir. Erməni işğalçı qüvvələri torpaqlarımızdan qeyd-şərtsiz çıxarılmalıdır. Ondan sonra sülh və əməkdaşlıq yarana bilər. ...Bu məsələ Azərbaycanın ərazi bütövlüyü əsasında öz həllini tapmalıdır və tapacaqdır.”

Prezident İlham Əliyev münaqişənin ədalətli həlli üçün Azərbaycanın daha da inkişaf etməsini, güclənməsini əsas şərt hesab edərək bildirdi: “Bizim bütün proqramlarımız icra edilir, o cümlədən regionlarda gedən quruculuq işləri ölkəmizi gücləndirir. Mən şübhə etmirəm ki, Azərbaycan uğurlu inkişafını 2010-cu ildə də davam etdirəcəkdir. Qarşıda duran bütün vəzifələr icra ediləcək və ölkənin bütün sosial-iqtisadi problemləri öz həllini tezliklə tapacaqdır.”

Bu gün Qəbələ öz inkişafına görə Azərbaycanın kiçik modeli sayılsa da digər regionlar da sosial-iqtisadi inkişaf cəhətdən Qəbələdən geri qalmır. Ulu öndərin bir vaxtlar dediyi “vaxt gələcək, Azərbaycan bütün dünyaya günəş kimi doğacaqdır “ sözləri bu gün həqiqətə çevrilibdir. Ölkəmiz öz inkişafı ilə həqiqətən dünya üçün örnəkdir. Azərbaycanın inkişafı, qüdrətli bir dövlətə çevrilməsi səbəbi isə ulu öndərin müəyyən etdiyi sosial-iqtisadi inkişaf kursunun bu gün etibarlı əllərdə olması, bu kursun inamla davam və inkişaf etdirilməsidir.

Telman Qafar

İki sahil.- 2010.- 3 mart.- S. 2.