Abadlıq işləri aparılır

ARDNŞ-in Qaz Emalı Zavodunda ekoloji tarazlığın qorunması istiqamətində əsaslı tədbirlər həyata keçirilir

Bu gün ölkə iqtisadiyyatının inkişafında böyük rol oynayan neftçilər neft-qaz hasilatının artırılması ilə yanaşı, ekoloji tarazlığın qorunmasında da aktiv iştirak edirlər. Hazırda Bakı və Abşeron yarımadasında neft və neft məhsulları ilə çirklənmiş torpaqların təmizlənməsi Azərbaycan Respublikası Dövlət Neft Şirkətinin (ARDNŞ) qarşısında duran əsas vəzifələrdən biridir. Qeyd edək ki, hazırda bu istiqamətdə əsaslı işlər görülür.

2010-cu il “Ekologiya ili”dir. Bunun üçün də ARDNŞ neft və neft məhsulları ilə çirklənmiş torpaqların təmizlənməsi işini daha sürətlə həyata keçirir və həmin ərazilərdə geniş yaşıllıq zolaqları salınır. Dövlət Neft Şirkətinin Qaz Emalı Zavodu (QEZ) da bu istiqamətdə səylə çalışan müəssisələrdən biridir.

Qaz Emalı Zavodunun ümumi işlər üzrə direktor müavini Nizami Quliyev bizimlə söhbətində 2009-cu il ərzində müəssisədə su mənbələrinin və atmosfer havasının mühafizəsi üzrə texniki-təşkilati tədbirlərin yerinə yetirilməsi barədə məlumat verdi. Bildirdi ki, ötən il tədbirlər planına uyğun olaraq, zavodun istehsalat sahələrində istismar edilən texnoloji qurğular, avadanlıqlar, iş otaqlarının texniki vəziyyətinin yaxşılaşdırılması məqsədi ilə planlaşdırılan əsaslı təmir, tikinti və quraşdırma işlərinin yerinə yetirilməsinə ciddi nəzarət olunub. Köhnəlmiş və korroziyaya uğramış metal konstruksiyalar və köhnə söküntülərin tullantıları ərazinin təkrar çirklənmə mənbəyinə çevrilməməsi üçün xüsusi ayrılan yerlərə və təşkilatlara təhvil verilir.

QEZ-in qarşısında duran vəzifələrdən biri ARDNŞ-in Ekoloji Siyasətinə uyğun olaraq nəzərdə tutulmuş kompleks tədbirlər daxilində ekoloji maarifləndirmə işinin təşkil edilməsidir. ARDNŞ-in “Ekoloji təbliğat və maarifləndirmə haqqında” 12 avqust 2008-ci il tarixli əmrinin icrasını təmin etmək məqsədi ilə 2009-cu ildə zavodun sifarişi əsasında tərtib edilmiş kadr hazırlığı planına uyğun olaraq Təlim, Tədris və Sertifikatlaşdırma Departamentinin Təlim, Tədris Mərkəzində zavodun mütəxəssisləri ekologiya üzrə təlim kurslarına göndəriliblər.

N.Quliyevin sözlərinə görə, zavodun ərazisində, inzibati binanın daxilində və girişində ətraf mühitin mühafizəsini və yaşıllıqların qorunmasını əks etdirən stendlər quraşdırılıb. “2009-cu il ərzində ekoloji vəziyyətin yaxşılaşdırılması məqsədilə zavodun giriş sahəsində və sexlərdə 16500 ağac əkilib. Bunlardan 12400-ü Eldar şamı, 2000-i zeytun, 1200-ü nar, 500-ü qarağac, 400-ü şaftalı ağacıdır.”

Hesabat ili ərzində texnoloji qurğularda və digər istehsalat sexlərində və sahələrində abadlıq işləri aparılıb. Texnoloji sobaların, qazanxananın tüstü borularından, ventilyasiya qurğularından, məşəl şamından, qoruyucu qapaqların, texnoloji kommunikasiyaların birləşmələrində buraxıla bilən sızıntılardan karbohidrogen qazlarının atmosferə tullantıları əmələ gəlir. Buna görə də, atmosferə buraxılan tullantıların miqdarını azaltmaq məqsədi ilə bir çox tədbirlər həyata keçirilib. Müəssisədə hər il ətraf mühitin mühafizəsi sahəsində tədbirlər planı nəzərdə tutulur. Bu da qeyd olunan sahə üzrə müsbət nəticələrin əldə olunmasına səbəb olur.

Direktor müavini qeyd etdi ki, 2009-cu il ərzində Qaz Emalı Zavodunda ətraf mühitin mühafizəsi və təbii ehtiyatlardan səmərəli istifadə sahəsində bir çox tədbirlər həyata keçirilib. “Zavodun “Dənizkənarı su nasosxanası-Qaz Emalı Zavodu arası D500 mm-lik su kəməri” uzun müddət istismar olunduğuna və hazırda texnoloji, ekoloji baxımdan günün tələbinə cavab vermədiyinə görə obyektdə tikinti-quraşdırma işləri aparılıb və istismara verilib.”

Bununla yanaşı, Qaz Emalı Zavodu ilə “Ekol Muhəndislik Xidmətləri” Qapalı Səhmdar Cəmiyyəti arasında bağlanmış müqaviləyə əsasan zavodun balansında olan çənlər, qurğuların təmiri zamanı və digər hallarda formalaşan neftli-yağlı və mexaniki qarışıqlı tullantıların (neftşlamların) zərərsizləşdirilməsi həyata keçirilir.

Ötən il müəssisədə təsdiq olunmuş tədbirlər planına uyğun olaraq su mənbələrinin mühafizəsi və ondan səmərəli istifadə olunması üzrə işlər görülüb. Belə ki, suyun dövretmə sisteminə neft məhsullarının düşməsinin qarşısını almaqdan ötrü texnoloji qurğuların soyuducu və soyuducu-kondensatorlarında olan ilanvari boru kəmərləri, suyun dövretmə sistemində 2 saylı soyuducu qradirnidə ətrafa axan suyun qarşısının alınması üçün sıradan çıxmış şiferlər və texnoloji sexlərdən neftayırıcılara axıdılan dəniz suyu kollektor kanalında sınmış beton örtükləri yenisi ilə əvəz olunub. Aralıq əmtəə və təmizləyici qurğular sahəsində məişət və sənaye kanalizasiya xətləri əsaslı təmir olunub. Təmizləyici qurğudan dövretmə sisteminə axıdılan suyun tərkib hissəsi vaxtında analiz olunub. Görülən işlər nəticəsində müəssisənin nəinki texniki-iqtisadi göstəriciləri artıb, eyni zamanda, ətraf mühitin mühafizəsi sahəsində müsbət göstəricilər əldə olunub.

Nail Rəhimzadə

İki sahil.- 2010.- 3 mart.- S.13.