Gəncənin qaz təsərrüfatı yenidən qurulur

Abunəçilərin 60 faizi “smartkart tipli sayğaclarla təmin olunub

“Azəriqaz” İstehsalat Birliyi əhalinin qazla fasiləsiz təchizatını prioritet vəzifə kimi dəyərləndirir və bu istiqamətdə ciddi tədbirlər həyata keçirir. Xüsusən, regionlarda əhalinin qaza olan tələbatını nəzərə alaraq yenidənqurma işləri sürətləndirilib.

Həmçinin qış mövsümü ilə əlaqədar qazın təzyiqinin artırılması, əhaliyə qazın itkisiz və təhlükəsiz çatdırılması üçün də səmərəli işlər görülür. Birliyin yerli strukturu kimi Gəncə Qaz İstismar Sahəsi sakinlərin qış mövsümündə təbii qaza olan tələbatını tam ödəmək üçün ötən ilin ikinci yarısında xeyli tədbirlər həyata keçirmişdir.

Şəhərin Qaz İstismar Sahəsinin rəisi Elxan Məmmədov bildirdi ki, qaz şəbəkəsi 2 qaz paylayıcı stansiyadan qidalanır. Şəhərin şimal girişində əsas qaz paylayıcı stansiyadan 5 magistral, “Bağbanlar” qaz paylayıcı stansiyadan isə 1 magistral qaz kəməri keçir. Sahə 791 km qaz kəmərinə xidmət edir. O cümlədən 81,7 kilometr yeraltı, 709,3 kilometr yerüstü qaz kəmərləri mövcuddur.

2009-2010-cu illərin payız- qış mövsümünə hazırlıq işləri barədə məlumat verən sahə rəisi dedi ki, qaz təsərrüfatının sabit və ahəngdar fəaliyyət göstərməsi üçün qərargah yaradılmışdır. Həmçinin ötən illərdə yaranmış nöqsanların aradan qaldırılması məqsədi ilə 7 bənddən ibarət tədbirlər planı hazırlanmışdır. Nəzərdə tutulan işlərin böyük qismini həyata keçirmişik.

Belə ki, qaz kəmərləri üzərində quraşdırılmış 410 ədəd siyirtmə, 484 ədəd qaz tənzimləyici şkaf təftiş və təmir olunmuşdur. Bundan başqa şəhərin müxtəlif hissələrində qaz təchizatının yaxşılaşdırılması məqsədi ilə müxtəlif diametrli 380 poqonometr uzunluğunda qaz xətlərinin çəkilməsini planlaşdırmışıq. Plana uyğun olaraq Təbriz və Ozan küçələrindəki mövcud 100 millimetrlik orta təzyiqli qaz kəmərindən 10 poqonometr uzunluğunda xətt çəkilərək dairəvi birləşmə aparılmışdır.

Eyni zamanda, Məhsəti, Darvin, M.Maqomayev və İ.Qayıbov küçələrinin qaz təminatının yaxşılaşdırılması məqsədi ilə Ozan küçəsindəki mövcud 159 millimetrlik orta təzyiqli qaz kəmərindən 20 poqonometr uzunluğunda dairəvi birləşmə yerinə yetirilmişdir. Qaranamazlı küçəsindəki mövcud orta təzyiqli qaz kəməri elə həmin küçənin 2-ci döngəsindəki aşağı təzyiqli qaz kəmərinə birləşdirilmişdir.

Ozan küçəsindəki mövcud orta təzyiqli qaz kəməri İ.Qayıbov küçəsi 135 saylı evin yaxınlığındakı aşağı təzyiqli qaz kəməri ilə dairəvi birləşdirilmişdir. Həm bu, həm də Qaranamazlı küçəsində yeni qaz tənzimləyici şkaflar quraşdırılmışdır. Bu kimi işlərimiz şəhərin digər küçələrində də davamlı olaraq aparılmışdır.

Sahə rəisinin sözlərinə görə, Gəncə şəhəri üzrə hazırda 66795 əhali abunəçi var. O cümlədən 911 sənaye müəssisəsi, büdcə təşkilatı və qeyri-dövlət müəssisələri abunəçilərimiz sırasındadır. Bu günədək 39500 abonentin mənzilində “smart- kart” tipli qaz sayğacı quraşdırılmışdır ki, bu da abunəçilərin ümumi sayının 60 faizi deməkdir.

Ötən il təbii qazdan qeyri- qanuni istifadə halları da aşkarlanmışdır. Belə ki, 480 mexaniki sayğacdan kənar, 55 “smartkart” tipli qaz sayğacından kənar xətdən istifadə olunmuş, o cümlədən 39 ədəd “smartkart” tipli qaz sayğacına müdaxiləyə görə hüquq mühafizə orqanlarına müraciətlər edilmişdir.

Konkret isə sayğaca müdaxilə ilə əlaqədar 397 abonent, qeyri- qanuni istifadə ilə əlaqədar 146 abonent barədə müraciətlər edilmişdir. Ötən il Gəncə QİS-ə vətəndaşlardan daxil olan 3850 ərizə araşdırılmış və problemlərin həlli istiqamətində tədbirlər görülmüşdür.

Elçin Zaman

İki sahil.- 2010.- 4 mart.- S.7.