Çıraq Neft Layihəsinə sanksiya verilmişdir

Martın 9-da Azərbaycan Dövlət Neft Şirkətinin Baş ofisində Çıraq Neft Layihəsinə sanksiya verilməsi ilə bağlı mərasim keçirilmişdir. Tədbirdə çıxış edən ARDNŞ prezidenti Rövnəq Abdullayev qeyd etmişdir ki, bu layihə Xəzər dənizinin Azərbaycan sektorundakı “Azəri-Çıraq-Günəşli” yataqlar blokunun hazırda davam edən işlənməsində növbəti əhəmiyyətli addımdır. O bildirmişdir ki, layihə “Əsrin müqaviləsi” çərçivəsində 360 milyon barel əlavə neft hasil etməyə imkan verəcək: “Bu da yeni nəhəng bir yatağın hasilatına bərabərdir”.

ARDNŞ-nin prezidenti çıxışında qeyd etmişdir ki, yeni layihənin həyata keçirilməsi prosesində ən müasir texnologiya və avadanlıqlar tətbiq olunacaq və bu da “Azəri-Çıraq-Günəşli” yataqlar blokunda maksimum hasilatın uzunmüddətli saxlanmasını təmin edəcəkdir. Bildirilmişdir ki, tərəfdaşların hesablamalarına görə Çıraq Neft Layihəsinə 6 milyard dollar yönəldiləcək. Layihənin bütün tikinti və quraşdırma işləri daxili qüvvələr hesabına icra olunacaq. Bu işlərin, əsasən, Heydər Əliyev adına Bakı Dərin Özüllər Zavodunda və ATA istehsal sahəsində həyata keçiriləcəyini söyləyən R. Abdullayev qeyd etmişdir ki, xaricdən yalnız avadanlıqlar gətiriləcək. Nəticədə Çıraq Neft Layihəsi ölkəmizin neft sektorunda 1800-dən artıq yeni iş yerinin açılmasına səbəb olacaq.

R.Abdullayev həmçinin bildirmişdir ki, “Azəri-Çıraq-Günəşli” yataqlar blokunun 15 il əvvəl başlanmış işlənməsinin davamı olan Çıraq Neft Layihəsindən ilk neft haslatı 2013-cü ilə planlaşdırılmışdır. Daha sonra “BP-Azerbaijan” şirkətinin prezidenti Rəşid Cavanşir çıxış edərək bildirmişdir ki, son dərəcə vacib olan bu layihə “Əsrin müqaviləsi” çərçivəsində ARDNŞ və ABƏŞ-in birgə həyata keçirdikləri böyük işlərin uğurlu davamıdır. R. Cavanşir 2009-cu ildə “Azəri-Çıraq-Günəşli” yataqlar blokundan 40 milyon tondan artıq neft hasil olunduğunu və Çıraq Neft Layihəsinin gerçəkləşdirilməsi ilə bu hasilatın daha da artacağını bildirmişdir.

Çıxışlardan sonra Çıraq Neft Layihəsinin rəhbəri İlqar Məmmədov layihənin konsepsiyasının prezentasiyasını keçirmişdir. Mərasimdə Çıraq Neft Layihəsinə sanksiya verilməsinə dair qətnamə imzalanmışdır. Qətnaməyə ARDNŞ prezidenti R.Abdullayev və “BP-Azerbaijan” şirkətinin prezidenti R.Cavanşir imza atmışlar. Sonda jurnalistlər üçün brifinq keçirilmişdir. Qeyd edək ki, layihə çərçivəsində Xəzər dənizində yeni platforma - Qərbi Çıraq Hasilat, Qazma və Yaşayış Bloklu platforma inşa olunacaq. 50-dən artıq yerli şirkətin ÇNL üzrə tikinti işlərində birbaşa və dolayısı ilə iştirak edəcəyi gözlənilir. Təkcə 2009-cu ildə 354 yerli şirkət və tərəfdaşları Azərbaycan şirkətləri olan 22 birgə müəssisə BP-nin operator olduğu layihələrə cəlb olunmuşdur.

İki sahil.- 2010.- 10 mart.- S. 2.