BP “Azəri-Çıraq-Günəşli” blokunun işlənməsi layihəsində öz payını artırıb

BP şirkəti “Azəri-Çıraq-Günəşli” (AÇG) blokunun işlənməsi layihəsində öz payını 34,1367%-dən 39,77%-ə qədər artırıb. Bu barədə şirkətin məlumatında deyilir.

Məlumatda bildirilir ki, BP Amerikanın “Devon” Energy Corp. şirkəti ilə bu şirkətin Braziliyada, Meksika körfəzində və Azərbaycanda aktivlərinin 7 milyard dollara satışı haqqında müqavilə bağlayıb.

Azərbaycanda “Azəri-Çıraq-Günəşli” layihəsində “Devon”un iştirak payının 5,63%-nin əldə edilməsi BP-nin bu layihədə payını 39,77%-ə qədər artırıb”, - deyə məlumatda qeyd edilir.

“Azəri-Çıraq-Günəşli” yatağının dərinsulu hissəsinin işlənməsi haqqında müqavilə 1994-cü il sentyabrın 20-də imzalanıb və həmin il dekabrın 12-də qüvvəyə minib.

BP-dən başqa AÇG layihəsinin iştirakçıları Amerikanın Chevron (10,2814%), ExxonMobil (8,0006%), Amerada Hess (2,7%), Azərbaycanın SOCAR (10%), Yaponiyanın Inrex Corr. (10%) və ITOCHU Oil (3,9205%) Norveçin Statoil (8,5633%), Türkiyənin TPAO (6,75%) şirkətləridir.

Devon öz fəaliyyətini Şimali Amerikadakı layihələrin inkişafına yönəltmək üçün hələ noyabrda aktivlərin satışı proqramını qəbul edib.

Şirkət 2,8 mlrd. barrel həcmində neft ekvivalentinin hasil edilə biləcəyi yataqları və ya “Devon” şirkətinin ehtiyatlarının təxminən 7%-ni satmaq niyyətindədir.

BP dünyada 2008-ci il 31 dekabr tarixinə 18,1 mlrd. barrel həcmində təsdiqlənmiş neft və qaz ekvivalentinə malik ən iri enerji şirkətlərindən biridir. Şirkət 29 ölkədə neft və qaz hasil edir, o cümlədən 17 neft emalı müəssisəsində paya malikdir. Şirkətdə təxminən 92 min nəfər çalışır. Səhmdarların sayı 1,2 mln-u keçir.

İki sahil.- 2010.- 13 mart.- S. 8.