“Azəriqaz” İstehsalat Birliyi yeni texnika ilə təchiz olunur

Azərbaycan Respublikasının Prezidenti cənab İlham Əliyevin müvafiq Sərəncamı ilə İstehsalat Birliyi statusunda ARDNŞ-in strukturuna daxil edilmiş “Azəriqaz” tərəfindən əhalinin davamlı olaraq mavi yanacaqla təhlükəsiz və keyfiyyətlə təmin olunması, xidmət səviyyəsinin yüksəldilməsi istiqamətlərində təxirəsalınmaz tədbirlər həyata keçirilir. Ölkə rəhbərliyi tərəfindən qarşıya qoyulmuş bir çox məsələlər ARDNŞ tərkibində vahid idarəetmə sisteminin yaradılması ilə reallaşmışdır.

Şirkət “Azəriqaz” İB-in maddi-texniki bazasının yeniləndirilməsini daim diqqət mərkəzində saxlayır. Son vaxtlar lazımi müasir texnika və aqreqatların alınması Birliyin işində irəliləyişə səbəb olmuşdur. Qurum tərəfindən magistral qaz kəmərlərində baş vermiş qaz sızmalarının qarşısının alınması üçün ARW450 markalı 15 ədəd səyyar qaynaq aparatı, 2 ədəd “Kemba-250” qaynaq aparatı, “EXPRESSWELD İNVERTER161” markalı 2 ədəd elektrik qaynaq aparatı, 36 ədəd ADD 4004 markalı səyyar qaynaq aparatı və müxtəlif avtosistemli “AKSA” dizel və elektrik generatorları, 6 ədəd “AKSA” AAP 8000E markalı qaynaq aparatı alınmışdır.

Eyni zamanda, qaz kəmərləri və qaz xətlərinin cəkilişi, tikinti, təmir-bərpa və yenidənqurma işləri üçün 15 ədəd “BELARUS” tipli 82.1 traktoru və 2 ədəd “KTA-25” markalı avtokran alınmışdır. Qeyd olunmalıdır ki, “Azəriqaz” İB bu avadanlıqlar vasitəsi ilə təmir-tikinti işlərinin genişləndirilməsinə nail olmuşdur. Hazırda ARDNŞ tərəfindən Birliyin maddi-texniki bazasının gücləndirilməsi və lazımi texniki avadanlıqların alınması istiqamətində işlər davam etdirilir.

İki sahil.- 2010.- 13 mart.- S. 7.