Muğamla cazın ecazkar sintezindən doğan əbədiyaşarlıq

Vaqif Mustafazadənin yaratdığı kompozisiyalar dünya musiqi inciləri xəzinəsinə təkraredilməz nümunələr kimi daxil olub

Görkəmli Azərbaycan pianoçusu və bəstəkarı, Respublika Dövlət Mükafatı laureatı Vaqif Əziz oğlu Mustafazadənin 70 illik yubileyinin keçirilməsi barədə ölkə Prezidentinin 26 yanvar 2010-cu il tarixli sərəncamına uyğun olaraq, ARDNŞ-in təşkilatçılığı ilə martın 15-də Əzizbəyov rayonunun Pirallahı qəsəbəsində yerləşən Vaqif Mustafazadə adına Mədəniyyət Sarayında təntənəli yubiley gecəsi düzənləndi.

Mədəniyyət və Turizm Nazirliyinin, Bəstəkarlar İttifaqının, Milli Konservatoriyanın, Əzizbəyov rayon İcra Hakimiyyəti, ARDNŞ Sosial İnkişaf İdarəsi rəhbərliyinin və Əzizbəyov rayon ictimaiyyətinin qatıldığı yubiley gecəsində əvvəlcə Prezident İlham Əliyevin Vaqif Mustafazadənin 70 illik yubileyinin ölkə miqyasında qeyd olunması barədə sərəncamı səsləndirildi. Sərəncamda bildirilir ki, Vaqif Mustafazadə yaradıcılığı XX əsr milli musiqi mədəniyyətimiz tarixinin yeni parlaq səhifələrindən birini təşkil edir. V.Mustafazadə Azərbaycan incəsənətinin daha da zənginləşdirilməsi və geniş miqyasda tanıdılması naminə bir-birindən qiymətli töhfələr vermişdir.

Vaqif Mustafazadənin ömürlüyündən səhifələr

Vaqif Mustafazadə - 1940-ci il martın 16-da Bakıda doğulub. O, Asəf Zeynallı adına Bakı Dövlət Musiqi Məktəbini (İndiki Azərbaycan Dövlət Musiqi Akademiyası) bitirib.

Vagif Mustafazadə Azərbaycan caz musiqisinin banisi və yeni caz fikrinin (devizinin) təsisçisidir. O, Azərbaycan musiqisinin, muğamın, klassik Amerika caz musiqisi ilə sintezini yaradıb. Onun bu devizi Caz-Muğam adlanır. Azərbaycan Muğam Caz Hərəkatının memarı olan V.Mustafazadə 1979-cu il dekabrın 17-də -39 yaşında Daşkənddə ürək tutmasından dünyasını dəyişib. Hal-hazırda Vaqif Mustafazadənin davamçısı qızı Əzizə Mustafazadədir.

Yaradıcılığı:

* 1965-ci ildə Gürcustan Dövlət Filarmoniyasında “Qafqaz” adlı üçlük (trio) qrupunu,

* 1970-ci ildə “Leyli” vokal kvartetini (dördlük) yaradır.

* 1971-ci ildən 1977-ci ilə kimi “Sevil” vokal instrumental qrupuna başçılıq edir. 1977-ci ildən 1979-cu ilə kimi “Muğam” instrumental qrupuna başçılıq edərək “Tallin-66” və “Tbilisi-78” caz festivalının laureatı olmuşdur.

* 1978-ci ildə Monakoda keçirilən 8-ci Beynəlxalq Caz Festivalında “Əzizəni gözləyirəm” musiqisinə görə birincilik mükafatı alıb.

* 1979-cu ildə “Azərbaycan Xalq Artisti” adına laiq görülmüşdür.

* 1982-ci ildə artıq ölümündən sonra “Azərbaycan Dövlət Mükafatı” laureatına laiq görülmüşdür. O, fortepiano konsertlərinin, “Muğam” simfoniyası və başqa fortepiano şedevrlərinin müəllifidir.

V.Mustafazadənin yubiley gecəsində çıxış üçün səhnəyə Mədəniyyət və Turizm Nazirliyinin mədəniyyətşünaslıq İdarəsinin şöbə müdiri Polad Zeynalov dəvət olundu. O, Vaqif Mustafazadə yaradıcılığının Azərbaycan mədəniyyət və incəsənət tarixində özünəməxsus yeri olduğunu tutarlı faktlarla diqqətə çatdırdı.

Milli Konservatoriyanın rektoru, tanınmış bəstəkar, xalq artisti Siyavuş Kərimi Vaqif Mustafazadənin yaradıcılıq xüsusiyyətlərindən danışdı.

Qurban Abbasov adına Mədəniyyət Sarayının müşayiətçisi Siyavuş Qəmbərovun pianoda Vaqif Mustafazadənin repertuarından ifa etdiyi “Bayatı-şiraz” alqışlarla qarşılandı. Vaqif Mustafazadənin vaxtilə rəhbərlik etdiyi “Sevil” ansamblının repertuarından olan “Gözəllik nəğməsi”ni isə Qurban Abbasov adına Mədəniyyət sarayının solisti Vüsalə Qubadova təqdim etdi.

Bakı Musiqi Akademiyasının tələbəsi Natiq Hüseynov da öz musiqi töhfəsi ilə gəlmişdi. Onun Esmira Manafovanın fortepianoda oxuduğu musiqisi Tofiq Quliyevə məxsus “Bakı haqqında mahnı” maraqla qarşılandı. İsmayıl Məmmədlinin “Nüans”, Elnur Məcidovun dahi Niyazinin bəstələdiyi “Arzu” və musiqisi Tofiq Quliyevə məxsus “Sənə də qalmaz” mahnıları da tədbirə rəngarəng çələng bəxş etdi. Respublikanın əməkdar artisti Cavan Zeynallının özünəməxsus duzlu-məzəli söhbəti və ifa etdiyi caz parçaları yubiley gecəsinə toplaşanlarda xoş təəssürat yaratdı. Sonra isə Vaqif Mustafazadənin rəhbərlik etdiyi “Sevil” vokal ansamblının üzvü olmuş Rəna Talıbzadə alqışlarla səhnəyə dəvət olundu. O, ölməz sənətkarla bağlı işıqlı, həzin və kövrək xatirələrini retro mahnılarla yekunlaşdırdı. Yubiley gecəsində iştirak edən respublikanın əməkdar artisti Aygün Bəylər Vaqif Mustafazadənin “Ceyran” və digər tanınmış Azərbaycan bəstəkarlarının mahnılarını təqdim etdi.

Tədbirin sonunda çıxış edən ARDNŞ Sosial İnkişaf İdarəsinin rəis müavini Vasif İmanov bildirdi ki, ölkə Prezidenti İlham Əliyevin Bakı şəhərinin və ətraf qəsəbələrin sosial-iqtisadi inkişafı ilə bağlı imzaladığı sərəncama uyğun olaraq, son illər Əzizbəyov rayonunda da infrastruktur yeniləşdirilir, onlarla yeni sosial-mədəni obyekt tikilib və əsaslı təmir edilib. Bu işlərə ARDNŞ də öz böyük töhfələrini verməkdədir. “Əsaslı təmirdən sonra ötən il dekabrın 26-da ARDNŞ prezidenti Rövnəq Abdullayevin iştirakı ilə açılış mərasimi keçirilən Mərdəkan Mədəniyyət Sarayı həm də dünya şöhrətli pianoçu və bəstəkar, Azərbaycan musiqisində misilsiz xidmətlər göstərən Vaqif Mustafazadənin 70 illik yubileyinə bir töhfə oldu.

Əmrah Fəqanoğlu

İki sahil.- 2010.- 16 mart.- S. 16.