Ötən ay neft hasilatı üzrə göstəricilər uğurlu olub

2010-cu ilə uğurla başlayan neftçilər dövlət tapşırıqlarının yerinə yetirilməsində səylə çalışırlar. Bu sırada Azərbaycan Respublikası Dövlət Neft Şirkəti “Azneft” İstehsalat Birliyi “Bibiheybətneft” NQÇİ-nin fəaliyyətini xüsusi vurğulamaq lazımdır. Cari ilin fevral ayında İdarədə neft-qaz hasilatı üzrə texniki-iqtisadi göstəricilər yüksək olub. NQÇİ-dən verilən məlumata görə, fevral ayında plan üzrə 9200 ton neft hasilatı nəzərdə tutulduğu halda, faktiki 9205 ton neft hasil olunub. Plan 100,1 faiz yerinə yetirilib. Neft təhvili planı da 100,1 faiz yerinə yetirilib. 9166 ton plana qarşı, 9174,983 ton neft təhvil verilib.

Fevral ayında qaz hasilatı planı isə 150,2 faiz yerinə yetirilib. Plan üzrə 1 milyon 40 min kubmetr qazın hasil olunması nəzərdə tutulduğu halda, faktiki olaraq bu rəqəm 1 milyon 562 min kubmetrə bərabər olub.

Bununla yanaşı, NQÇİ-də plan üzrə 830 min kubmetr qaz təhvili nəzərdə tutulduğu halda, faktiki olaraq 1 milyon 352,063 min ton qaz təhvil verilib. Plan 162,9 faiz yerinə yetirilib. Ötən ay həmçinin digər texniki-iqtisadi göstəricilər də yüksək olub. Plan üzrə 15 quyuda əsaslı təmir nəzərdə tutulduğu halda, 19 quyuda əsaslı təmir işi aparılıb. Plan 126,7 faiz yerinə yetirilib.

Ötən ay neft-qaz hasılatı və təhvili üzrə ən yüksək göstəricilər NQÇİ-nin 4 saylı Neft və Qazçıxarma Sexində qeydə alınıb. 4 saylı NQÇS müvafiq olaraq neft hasilatı planını 102,0 faiz, neft təhvili planını 102,2 faiz, qaz hasilatı planını 164,6 faiz və qaz təhvili planını isə 193,3 faiz yerinə yetirib.

160 ildən artıq bir tarixi olan “Bibiheybətneft” NQÇİ dünyanın neftqazçıxarma tarixində xüsusi əhəmiyyətə malik müəssisələrdən biridir. Qeyd edək ki, 1847-ci ildən neft mexaniki üsulla qazılmış quyulardan hasil edilməyə başlanıb və 1920-ci ilə kimi davam edib. 1847-1848-ci illərdə ilk dəfə Bibiheybət və sonra Balaxanı yataqlarında mexaniki üsulla qazılmış quyulardan sənaye əhəmiyyətli neft alınıb və həmin ildən də Azərbaycanın neft sənayesinin inkişafı başlanır. XIX əsrin əvvəllərində dünyada ilk dəfə olaraq Bibiheybətdə sahildən 30 metr aralı dənizdə qazılmış əl quyusundan neft hasil edilib. 1859-cu ildə isə Bakıda ilk neftayırma zavodu (qurğusu) tikilib. 1863-cü ildə Cavad Məlikov Bakıda kerosin zavodu tikdirir və dünyada ilk dəfə neftayırma prosesində soyuduculardan istifadə edilir.

Nail Rəhimzadə

İki sahil.- 2010.- 17 mart.- S. 8.