Tərtərdə tədbir

Mayın 4-də Yeni Azərbaycan Partiyası Tərtər rayon təşkilatının qərargahında YAP rayon Gənclər Birliyi ulu öndər Heydər Əliyevin anadan olmasının 87-ci ildönümü ilə əlaqədar tədbir keçirdi.

Tədbir iştirakçıları öncə ümummilli lider Heydər Əliyevin rayonun mərkəzi meydanında ucaldılmış abidəsi önünə əklil, tər çiçək dəstələri qoyaraq, xatirəsini dərin hörmətlə yad etdilər.

YAP Tərtər rayon təşkilatı Gənclər Birliyinin sədri Cavanşir Musayev tədbiri giriş sözü ilə açaraq bildirdi ki, əsası ümummilli lider Heydər Əliyev tərəfindən qoyulmuş dövlət gənclər siyasətinin Prezident İlham Əliyev tərəfindən uğurla davam etdirilməsinin nəticəsidir ki, bu gün Azərbaycan gəncləri ictimai-siyasi, sosial-mədəni və digər sahələrdə fəal iştirak edirlər. Gənclərlə iş sahəsində görülən tədbirlər Azərbaycan gəncliyinin inkişafına təkan vermişdir.

Rayon uşaq musiqi məktəbinin müəllimi Emin Haqverdiyev, Qarağacı kənd orta məktəbin tarix müəllimi Rəşad Qarayev, 6 saylı kənd orta məktəbin müəllimi Zülfiyyə Abdullayeva, rayon mərkəzi xəstəxanasının həkimi Vüsalə Qəribova, Sarov kənd kitabxanasının müdiri Əfruz Babayeva və digərləri ümummilli lider Heydər Əliyevin zəngin irsinin təbliği, Azərbaycan dövlətçiliyinin xilas olması, müstəqilliyimizin möhkəmləndirilməsi istiqamətində misilsiz xidmətlərindən bəhs etdilər.

Aynurə Şirinova

İki sahil.- 2010.- 6 may.- S.7.