“Səfurə Əlizadə favoritdir!”

Bukmeyker hesablamalarına görə, bu il Azərbaycanı “Eurovision-2010” Mahnı Müsabiqəsində təmsil edəcək Səfurə Əlizadənin qalib olmaq şansı daha böyükdür.

Lent.az-ın məlumatına görə, favorit iştirakçılar arasında almaniyalı iştirakçı Lena, israilli Harel Skaat da var. Azərbaycanlı ifaçı Səfurə “Yeni Ulduz” Mahnı Müsabiqəsinin iştirakçısıdır. “Drip Drop” mahnısını onun üçün İsveç musiqiçisi yazıb.

Almaniyanın “Eurovision” təmsilçisi Lena Meyer Landrut - müsabiqənin ən gənc iştirakçılarından biridir, müsabiqədən sonra onun 19 yaşı tamam olacaq. “Eurovision”da o, “Satellite” mahnısını ifa edəcək.

Harel Skaat ölkəsinin “Ulduz fabriki” müsabiqəsinin finalçısıdır. O, ikinci yarımfinalda “Milim” mahnısını oxuyacaq.

Qeyd edək ki, ötən gün “Eurovision-2010” Mahnı Müsabiqəsinin birinci yarımfinalı olub. İkinci yarımfinal mayın 27-də olacaq. Qalibin adı 29 mayda müəyyənləşəcək. Konsertlərin üçü də Norveçin paytaxtı Osloda, “Telenor Arena” stadionunda keçiriləcək.

İki sahil.- 2010.- 26 may.- S. 16.