Tanınmış jurnalist Çingiz Ələkbərovun 85 illik yubileyi qeyd olunmuşdur

Noyabrın 2-də Azərbaycan Mətbuat Şurasında (MŞ) tanınmış jurnalist, Mərkəzi Seçki Komissiyası (MSK) Katibliyinin müdiri Çingiz Ələkbərovun anadan olmasının 85 illiyinə həsr olunmuş tədbir keçirilmişdir.

MŞ-nin sədri Əflatun Amaşov Çingiz Ələkbərovun şərəfli ömür yolundan, Azərbaycan jurnalistika sənətinin inkişafında, yeni jurnalist nəslinin yetişməsində xidmətlərindən, hazırda MSK Katibliyinin müdiri kimi səmərəli fəaliyyətindən danışmışdır. Ölkəmizdə jurnalistika sahəsinə və jurnalistlərə göstərilən diqqət və qayğıdan, jurnalistlərin əməyinin dövlətimiz tərəfindən yüksək qiymətləndirilməsindən, yubileylərinin geniş şəkildə qeyd olunmasından söhbət açan Ə.Amaşov yubilyarı təbrik etmiş, ona yeni yaradıcılıq uğurları arzulamışdır.

Tədbirdə çıxış edən Yusif Kərimov, Arif Hüseynov, Şəddad Cəfərov, Tahir Aydınoğlu, Vüqar Rəhimzadə, Məzahir Süleymanov, Ələsgər Cabbarov və başqaları Çingiz Ələkbərovun çoxşaxəli fəaliyyətindən, yüksək insani keyfiyyətlərindən, onun jurnalistlik fəaliyyətinin gənclər üçün örnək olmasından danışmış, Ç.Ələkbərovun təcrübəsindən faydalanmağın zəruriliyini qeyd etmişlər. 1941-1945-ci illər müharibəsində fədakarlıq göstərmiş, 1960-1980-ci illərdə milli mətbuatımızın inkişafında əlindən gələni əsirgəməmiş qocaman jurnalistin bu gün də gənclik həvəsi ilə çalışdığı, gənc jurnalistlərə faydalı məsləhətləri və tövsiyələri ilə kömək etdiyi vurğulanmışdır.

Sonda Ç.Ələkbərov yüksək hörmət və ehtirama görə tədbirin təşkilatçılarına və iştirakçılarına minnətdarlığını bildirmiş, xatirələrini bölüşmüş, sualları cavablandırmışdır.

İki sahil.- 2010.- 3 noyabr.- S. 16.